ဥရောပတိုက်မြောက်ပိုင်းရှိ ဖင်လန် (Finland)နိုင်ငံသည် ကမ္ဘာပေါ်တွင် ပညာရေး၊ လူမှုရေး၊ ကျန်းမာရေးစနစ်များအထူးကောင်းမွန်၍ အိုင်တီနည်းပညာထွန်းကားပြီး လူနေမှုအ ဆင့်အတန်းအလွန်မြင့်မားသည့် နိုင်ငံတစ်နိုင်ငံဖြစ်ပါသည်။ စကန်ဒီနေးဗီးယား (Scandinavia)ကျွန်းဆွယ်တွင်တည်ရှိ၍ စကန်ဒီနေးဗီးယားဘာသာစကားနှင့် လူနေမှုစနစ်များကို ကျင့်သုံးကြသော ဒိန်းမတ်၊ ဆွီဒင်နှင့် နော်ဝေတို့ကဲ့သို့ နောက်ပိုင်းတွင် အိုက်စ်လန်နှင့်အတူ ဖင်လန်သည်လည်း စကန်ဒီနေးဗီးယားနိုင်ငံတစ်နိုင်ငံအဖြစ်သတ်မှတ်ခြင်းခံခဲ့ရသည်။ မြောက်အတ္တလန္တိတ် (North Atlantic ) သမုဒ္ဒရာအနီးတွင် တည်ရှိသော ဥရောပတိုက်မြောက်ပိုင်းနိုင်ငံများ ဖြစ် ကြသဖြင့် ယင်းတို့ကို Nordic နိုင်ငံများဟုလည်း ခေါ်ဝေါ်လေ့ရှိကြသည်။ မကြာမီက စာရေးသူရောက်ရှိခဲ့သည့် ဖင်လန်နိုင်ငံကို ဆွီဒင်၊ နော်ဝေ၊ ရုရှားနိုင်ငံနှင့် ဘောလ်တစ်ပင်လယ် တို့က ဝန်းရံထား၍ ယင်း၏ မြောက်ပိုင်းဒေသများသည် မြောက်ဝင်ရိုးစွန်းနှင့်နီးသဖြင့် ဥတ္တရ အလင်းတန်း(Nothern Light) ကို မြင်တွေ့နိုင်ခြင်းကြောင့် ကျော်ကြားလှသည်။ ထို့ပြင် စာနယ်ဇင်းလွတ်လပ်ခွင့်မြင့်မားခြင်းနှင့် အကျင့်ပျက်ခြစားမှုနည်းပါးခြင်းတို့ကြောင့်လည်း ထင်ရှားသည်။ လူဦးရေ ငါးသန်းခွဲခန့်ရှိ၍ ဥရောပသမဂ္ဂ(EU) အဖွဲ့ဝင်ဖြစ်ပြီး ယူရိုငွေကြေးကိုပင် သုံးစွဲကြသည်။ ဖင်လန်လူမျိုး ၈၉ ရာခိုင်နှုန်းခန့်နေထိုင်၍ ရုံးသုံးဘာသာမှာ ဖင်လန်ဘာသာ စကားဖြစ်ပြီး လူဦးရေ၏ ၇၃ ရာခိုင်နှုန်းသည် ခရစ်ယာန်ဘာသာကို ကိုးကွယ်ကြသည်။


ဖင်လန်နိုင်ငံ၏ အကြီးဆုံးမြို့နှင့်မြို့တော်မှာ ဟယ်လ်ဆင်ကီ(Helsinki)ဖြစ်၍ လူ ခြောက်သိန်းခွဲခန့်နေထိုင်ကြသည်။ ယင်းသည် ဖင်လန်နိုင်ငံ၏ တောင်ဘက်ရှိ ဆိပ်ကမ်းမြို့ကြီး ဖြစ်၍ ၁၅၅၀ ခုနှစ်က စတင်တည်ထောင်ခဲ့ပြီး ၁၈၁၂ ခုနှစ်တွင် မြို့တော်ဖြစ်လာခဲ့သည်။ အက်စတိုးနီးယားနိုင်ငံမြို့တော် Tallinn မြို့မှ မိုင် ၅၀ နှင့် ရုရှားနိုင်ငံ စိန့်ပီတာစဘတ်မြို့မှ မိုင် ၂၄၀ ကွာ ဝေးသည့် ဟယ်လ်ဆင်ကီမြို့သည် ၂၀၁၁ ခုနှစ်တွင် ကမ္ဘာ့နေချင့်စဖွယ်အကောင်းဆုံးမြို့နှင့် ၂၀၁၂ ခုနှစ်တွင် ကမ္ဘာ့ဖက်ရှင်ဒီဇိုင်းမြို့တော်အဖြစ် သတ်မှတ်ခြင်းခံခဲ့ရသည်။ နေ့စဉ် နံနက် ၁၀ နာရီမှ ညနေ ၄ နာရီအထိ နာရီဝက်လျှင်တစ်ကြိမ် ထွက်လေ့ရှိသည့် Hop on-Hop off ကားများဖြင့် မြို့တွင်း၌ လှည့်လည်ကြည့်ရှုလေ့လာနိုင်သကဲ့သို့ ရေယာဉ်များဖြင့်လည်း တူး မြောင်းတစ်လျှောက် လေ့လာကြည့်ရှုနိုင်သည်။ ဟယ်လ်ဆင်ကီမြို့တွင် ၁၇၄၈ ခုနှစ်က ရုရှားနိုင်ငံ၏ရန်မှ ကာကွယ်ရန် ကျွန်းငယ်ခြောက်ခုပေါ်၌ ဆက်စပ်တည်ဆောက်ထားသည့် Soumenlinna ခံတပ်ကြီးသည် ထူးခြားလှသဖြင့် ၁၉၉၁ ခုနှစ်တွင် ယူနက်စကိုအဖွဲ့က ယင်းကို ကမ္ဘာ့ယဉ်ကျေးမှုအမွေအနှစ်နေရာတစ်ခုအဖြစ် သတ်မှတ်ခဲ့ကြောင်းသိရသည်။ ဖင်လန်နိုင်ငံ၏ ထင်ရှားသည့် ကွယ်လွန်သူတေးရေးစာဆို Jean Silbelius အား ဂုဏ်ပြုသောအားဖြင့် Silbelius ဥယျာဉ်အတွင်း၌ ၁၉၆၇ ခုနှစ်က ဖွင့်လှစ်ခဲ့သည့် Silbelius Monument၊ မြို့လယ်ရှိ ၁၈၅၂ ခုနှစ်က ဖွင့်လှစ်ခဲ့၍ ထိုင်ခုံပေါင်း ၁၃၀၀ ရှိပြီး ၂၀၃ ပေမြင့်သည့် Helsinki Cathedral ဘုရားကျောင်းကြီးနှင့် မြေအောက်ရှိ ဘုရားကျောင်းကို ခေတ်မီအမိုးခုံးဖြင့် အုပ်မိုးထား၍ ကျောက်တုံးများဖြင့် ဝန်းရံကာ ၁၉၆၉ ခုနှစ်က ဖွင့်လှစ်ခဲ့ပြီး Rock Church ဟု အမည်တွင်သည့် ဒီဇိုင်းဆန်းလှသော Temppeliaukio Church တို့မှာ ဟယ်လ်ဆင်ကီမြို့တွင် မဖြစ်မနေသွားရောက်လေ့လာသင့်သော နေရာများဖြစ်ကြပါသည်။Helsinki Cathedral ရှေ့တွင် ဖင်လန်နိုင်ငံ၏ အမျိုးသားခေါင်းဆောင်ကြီးဖြစ်ခဲ့သည့် တော်ဝင်မင်းသားကြီး Alexander II အား ဂုဏ်ပြုတည်ထားသည့် ရုပ်တုကြီး ခမ်းနားထည်ဝါစွာတည် ရှိနေသည်ကို လည်း စာရေးသူ မြင်တွေ့ခဲ့ရပါသည်။


ထို့ပြင် ဆိပ်ကမ်းအနီးရှိ ၁၃၁ ပေခန့်မြင့်သည့် သံမဏိချားရဟတ်ကြီး (Finnair Skywheel)နှင့် ဈေးဆိုင်ပေါင်းများစွာ စုဝေးတည်ရှိရာ Market Square ၊ မြို့တော်ခန်းမ အဆောက်အအုံ၊ ကျောက်ခေတ်မှ ယနေ့ခေတ်အထိ ဖင်လန်နိုင်ငံနှင့် သက်ဆိုင်သည်များကို စုစည်းပြသထားသည့် ဖင်လန်နိုင်ငံအမျိုးသားပြတိုက်၊ ဂန္ထဝင်အနုပညာလက်ရာပြတိုက်၊ ခေတ်ပြိုင်အနုပညာများကို စုစည်းပြသထားသည့် Kiasma အနုပညာပြတိုက်နှင့်အနီရောင်အုတ်များဖြင့် တည်ဆောက်ထားသည့် Uspenski Cathedral ဘုရားကျောင်းတို့သည်လည်း ကမ္ဘာ့လှည့်ခရီးသည်များအား ဆွဲဆောင်နေသည့် အထင်ကရနေရာများဖြစ်သဖြင့် ဟယ်လ်ဆင်ကီမြို့တော်တည်ရှိရာ ဖင်လန်နိုင်ငံသည် ဥရောပတိုက်၌ သွားရောက်လေ့လာသင့်သည့် နိုင်ငံ တစ်နိုင်ငံဖြစ်ကြောင်း စာရေးသူ ညွှန်းဆိုလိုက်ရပါတော့သည်။

4-11-2017finland

 

ဥရောပတိုက်မြောက်ပိုင်းရှိ အက်စ်တိုးနီးယား(Estonia)နိုင်ငံသည် လက်ဗီးယားနှင့် ဖင်လန်နိုင်ငံတို့အနီး၌တည်ရှိ၍ မကြာမီက ယင်းသို့ စာရေးသူသွားရောက်လေ့လာခဲ့ပါ သည်။ အိမ်နီးချင်းနိုင်ငံများနှင့် ကား၊ ရထား၊ လေယာဉ် စသည်တို့ဖြင့် အလွယ်တကူသွား ရောက်နိုင်ပြီး ဖင်လန်နိုင်ငံနှင့်လည်း ပင်လယ်ကူးသင်္ဘောခရီးစဉ်ရှိသည်။ လက်ဗီးယားနိုင်ငံ မြို့တော် Riga မှ အက်စ်တိုးနီးယားနိုင်ငံမြို့တော် Tallinn သို့ လေးနာရီကြာ ကားဖြင့် သွားရောက်ခဲ့၍ တစ်ညအိပ်ကာ Tallinn မှ မိုင် ၅၀ သာဝေးသည့် ဖင်လန်နိုင်ငံမြို့တော် Helsinki သို့ နှစ်နာရီကြာ ပင်လယ်ကူးသင်္ဘော Ferry ဖြင့် ခရီးဆက်ခဲ့ပါသည်။ ဘောလ်တစ်ပင်လယ်(Baltic Sea) ကမ်းခြေတွင်တည်ရှိ၍ လစ်သူယေးနီးယားနှင့် လက် ဗီးယားတို့ကဲ့သို့ ဘောလ်တစ်နိုင်ငံတစ်နိုင်ငံလည်း ဖြစ်သည်။ ယင်းကို ရုရှား၊ လက်ဗီးယားနှင့် ဘောလ်တစ်ပင်လယ်၏ Riga ပင်လယ်ကွေ့နှင့် ဖင်လန်ပင်လယ်ကွေ့တို့က ဝန်းရံထား၍ ကျွန်းပေါင်း ၂၂၀၀ ခန့်ရှိသည်။

ဒုတိယကမ္ဘာစစ်အပြီး ၁၉၄၄ ခုနှစ်မှစ၍ ဆိုဗီယက် ပြည်ထောင်စုပြိုကွဲသည့် ၁၉၉၁ ခုနှစ်အထိ ဆိုဗီယက်ပြည်ထောင်စုအဖွဲ့ဝင်နိုင်ငံတစ်နိုင်ငံဖြစ်ခဲ့သည်။ လူဦးရေ ၁ ဒသမ ၄ သန်းခန့်ရှိ၍ ဥရောပသမဂ္ဂ(EU) နှင့် နေတိုး (NATO) အဖွဲ့ဝင်နိုင်ငံလည်းဖြစ်သည်။ အက်စ်တိုးနီးယန်းလူမျိုး ၆၉ ရာခိုင်နှုန်းနှင့် ရုရှား လူမျိုး ၂၅ ရာခိုင်နှုန်းနေထိုင်ကြ၍ ရုံးသုံးဘာသာမှာ အက်စ်တိုးနီးယန်းဘာသာစကား ဖြစ်ပြီး ယူရိုငွေကြေးကိုပင်သုံးစွဲကြသည်။ တောတောင်နှင့် ရေအိုင်ကြီးများရှိ၍ သာယာ လှပသည့် အက်စ်တိုးနီးယားနိုင်ငံသည် နိုင်ငံငယ်သော်လည်း ချမ်းသာကြွယ်၀ပြီး လူမှုရေး၊ စီးပွားရေးလွတ်လပ်မှုနှင့် စာနယ်ဇင်းလွတ်လပ်ခွင့်တို့တွင် ကျော်ကြားကာ ကျန်းမာရေးနှင့် ပညာရေးလည်း အဆင့်မြင့်သည်။ ယင်းနိုင်ငံသားများသည် ဂီတနှင့်အကတွင် ဝါသနာ ထုံကြ၍ ရိုးရာသီချင်းဆိုပွဲတော်ကြီးကို ၁၈၆၉ ခုနှစ်တွင် စတင်ကျင်းပခဲ့သည်။ မူလက Tartu မြို့တွင်ကျင်းပခဲ့၍ နောက်ပိုင်း၌ Tallinn မြို့တော်တွင် ငါးနှစ်တစ်ကြိမ် ကျင်းပ ခဲ့သည့်ယင်းပွဲတော်၌ များသောအားဖြင့် လူ ၃၀၀၀၀ခန့်သီဆို၍ လူ ၁၀၀၀၀ ခန့် ကပြ လေ့ရှိပြီး ၁၉၈၈ ခုနှစ်တွင် ကျင်းပသည့်ပွဲတော်၌ လူသုံးသိန်းခန့် စံချိန်တင်ပါဝင်ဆင်နွှဲခဲ့ရာ ထိုစဉ်က တစ်နိုင်ငံလုံးလူဦးရေ၏ လေးပုံတစ်ပုံမျှပင်ရှိကြောင်း သိရသည်။


အက်စ်တိုးနီးယားနိုင်ငံ၏ အကြီးဆုံးမြို့နှင့် မြို့တော်မှာ Tallinn မြို့ဖြစ်၍ နိုင်ငံ၏ မြောက်ဘက်ရှိ ပင်လယ်ဆိပ်ကမ်းမြို့ကြီးလည်းဖြစ်သည်။ မှတ်တမ်းများ၌ ၁၂၁၉ ခုနှစ် တွင် စတင်ဖော်ပြခြင်းခံခဲ့ရ၍ ၁၂၄၈ ခုနှစ်တွင် မြို့တော်အဖြစ်သတ်မှတ်ခံခဲ့ရသည့် Tallinn မြို့တွင် လူဦးရေ လေးသိန်းခွဲခန့်နေထိုင်ပြီး အိုင်တီနည်းပညာ၊ ကုန်စည်ပို့ဆောင် ရေးလုပ်ငန်းနှင့် ခရီးသွားလုပ်ငန်းတို့ ထင်ရှားသည်။ အိုင်တီကုမ္ပဏီများစွာ တည်ရှိ၍ ကမ္ဘာကျော် Skype ဆက်သွယ်ရေး Application ကို တီထွင်ခဲ့ရာ ဒေသလည်းဖြစ်ပြီး Sillicon Valley of Europe ဟုလည်းကျော်ကြားသည်။ ယူနက်စကိုအဖွဲ့၏ ကမ္ဘာ့ ယဉ်ကျေးမှုအမွေအနှစ်ဒေသတစ်ခုအဖြစ် သတ်မှတ်ခံရသည့် Tallinn မြို့ဟောင်းနေရာ တွင် ၁၃ ရာစုနှစ်က တည်ဆောက်ခဲ့၍ ၂၁၀ ပေ မြင့်သော မျှော်စင်ပါသည့် မြို့တော်ခန်းမ နှင့်ရင်ပြင်၊ ၁၃ ရာစုနှစ်က တည်ဆောက်ခဲ့သည့် St.Nicholas' Church EiS hfCathedral of  St.Mary (Dome Church)၊ ပါလီမန်အဆောက်အအုံ၊ ၁၂၆၇ ခုနှစ်တွင် စတင် ဖော်ပြခြင်းခံခဲ့ရ၍ ၁၅ ရာစုအကုန်တွင် လက်ရှိ အမြင့် ၅၂၂ ပေ အထိ တည်ဆောက်ခဲ့ပြီး ၁၅၄၉ ခုနှစ်မှ ၁၆၂၅ ခုနှစ်အထိ ကမ္ဘာ့အမြင့်ဆုံး အဆောက်အအုံဖြစ်ခဲ့သည့် St.Olaf's Church နှင့် ဗိသုကာလက်ရာမြောက်လှသည့် St. Alexander Nevsky Cathedralတို့ တည်ရှိကြသည်။ ထို့ပြင် ၁၅ ရာစုနှစ်က တည်ဆောက်ခဲ့၍ အမြင့် ၅၂ ပေကျော်၊ အထူ ၁၀ ပေရှိသည့် ရှေးဟောင်း မြို့ရိုးသည် ယခုအခါ ယခင်အလျား၏ ထက်ဝက်ခန့်(၂ ကီလိုမီတာ)အကောင်းအတိုင်း ကျန်ရှိနေပြီး ယခင်က မျှော်စင် ၄၆ခု ရှိခဲ့၍ ယခုတွင်မူ ၂၆ခုသာ ကျန်ရှိကြောင်း သိရသည်။ အခြားဥရောပမြို့ကြီးများနည်းတူ ရဲတိုက်များ၊ ဘုရားကျောင်းများ၊ ပြတိုက်များ၊ ပြပွဲခန်းမများနှင့် ကဇာတ်ရုံများရှိ၍ ရိုး ရာသီချင်းသီဆိုပွဲကျင်းပရာနေရာ၊ အမျိုးသားကဇာတ်ရုံ၊ ပေ ၁၀၃၀ မြင့်သည့် ရုပ် မြင်သံကြားမျှော်စင်၊ လွတ်လပ်ရေးရင်ပြင်နှင့် Russalka Monument ကျောက်တိုင် တို့သည် ယင်းမြို့၏ထင်ရှားသည့် နေရာများဖြစ်ကြသည်။ ထိုကျောက်တိုင်ထိပ်တွင် နတ်သမီးရုပ်တုရှိ၍ ၁၈၉၃ ခုနှစ်တွင် ဖင်လန်ပင်လယ်ကွေ့၌ မုန်တိုင်းမိ၍ နစ်မြုပ် သေဆုံးသွားခဲ့သူ ၁၇၇ ဦးကို ရည်စူး၍ ၁၉၀၂ ခုနှစ်တွင်စိုက်ထူခဲ့ကြောင်း သိရသည်။


နိုင်ငံငယ်သော်လည်း လေ့လာစရာ၊ စိတ်ဝင်စားစရာများပြားလှသဖြင့် Tallinn မြို့တော်သို့ နှစ်စဉ် ကမ္ဘာလှည့်ခရီးသည် လေးသန်းခွဲနီးပါးအထိ လာရောက်လည်ပတ် လေ့ရှိသည်ဟုဆိုခြင်းကို စာရေးသူယုံကြည်လက်ခံရတော့မည် ဖြစ်ပါသည်။

30-10-17estonia

 

 

 

ဥရောပတိုက်မြောက်ပိုင်းရှိ လက်ဗီးယား(Latvia)နိုင်ငံသည် လစ်သူယေးနီးယား နိုင်ငံနှင့် ကပ်လျက်တည်ရှိ၍ မကြာမီက စာရေးသူသွားရောက်လေ့လာခဲ့ပါသည်။ အိမ်နီးချင်းနိုင်ငံများနှင့် ကား၊ ရထား၊ လေယာဉ် စသည်တို့ဖြင့် အလွယ်တကူသွားရောက် နိုင်၍ လစ်သူယေးနီးယားနိုင်ငံမြို့တော် Vilnius မှ အဝေးပြေးကားဖြင့်သွားလျှင် လေး နာရီခန့်ကြာ၍ လက်ဗီးယားနိုင်ငံမြို့တော် Riga မှ အက်စတိုးနီးယားနိုင်ငံမြို့တော် Tallinn သို့လည်း လေးနာရီခန့်သာကြာမြင့်သည်။ စာရေးသူအနေဖြင့် အချိန်မရ သောကြောင့် နံနက်ပိုင်းတွင် Vilnius မှ Riga သို့ ကားဖြင့်သွား၍ နေ့လယ်ပိုင်းတွင် လက်ဗီးယား၌ လေးနာရီခန့် ကြည့်ရှုလေ့လာပြီး ညနေပိုင်းတွင် Riga မှ Tallinn သို့ ဆက်လက်သွားရောက်ခဲ့ပါသည်။ ဘော်လ်တစ်ပင်လယ်(Baltic Sea) ကမ်းခြေတွင် တည်ရှိ၍ လစ်သူယေးနီးယားကဲ့သို့ ဘော်လ်တစ်နိုင်ငံ တစ်နိုင်ငံလည်းဖြစ်သည်။

ယင်း ကို အက်စတိုးနီးယား၊ ရုရှား၊ ဘီလာရု(စ်)၊ လစ်သူယေးနီးယားနိုင်ငံတို့နှင့် ဘော်လ်တစ် ပင်လယ်တို့က ဝန်းရံထားသည်။ ဒုတိယကမ္ဘာစစ်အပြီး ၁၉၄၄ ခုနှစ်မှစ၍ ဆိုဗီယက် ပြည်ထောင်စုပြိုကွဲသည့် ၁၉၉၁ ခုနှစ်အထိ ဆိုဗီယက်ပြည်ထောင်စုဝင်နိုင်ငံ တစ်နိုင်ငံဖြစ် ခဲ့ပြီး ၁၉၉၀ ပြည့်နှစ်တွင် ဆိုဗီယက်မှခွဲထွက်၍ လွတ်လပ်ရေးကြေညာခဲ့သည်။ လူ နှစ်သန်းခန့်နေထိုင်၍ ဥရောပသမဂ္ဂ(EU)နှင့် နေတိုး (NATO)အဖွဲ့ဝင်နိုင်ငံလည်း ဖြစ်သည်။ လက်ဗီယန်လူမျိုး ၆၂ ရာခိုင်နှုန်းနှင့် ရုရှားလူမျိုး ၂၇ ရာခိုင်နှုန်းနေထိုင်ကြ၍ ခရစ်ယာန်ဘာသာကို ၇၉ ရာခိုင်နှုန်းကိုးကွယ်ကြပြီး ရုံးသုံးဘာသာမှာ လက်ဗီယန် ဘာသာစကားဖြစ်ကာ ယူရိုငွေကြေးကိုပင် သုံးစွဲလျက်ရှိကြသည်။ ဒေသထွက်လက်မှု ပစ္စည်း၊ အစားအစာ၊ ဆေးဝါး၊ ဂီတနှင့် အိုင်တီနည်းပညာတို့ဖြင့်ကျော်ကြား၍ ရေလုပ် ငန်းနှင့် ခရီးသွားလုပ်ငန်းများကလည်း အရေးပါလှသည်။


လက်ဗီးယားနိုင်ငံ၏ အကြီးဆုံးမြို့နှင့်မြို့တော်မှာ Riga မြို့ဖြစ်၍ Daugava မြစ်က Riga ပင်လယ်ကွေ့သို့ စီးဝင်ရာမြစ်ဝတွင် တည်ရှိသည်။ သမိုင်းမှတ်တမ်းများ၌ ၁၂၀၁ ခုနှစ်က စတင်ဖော်ပြခြင်းခံရသည့် Riga မြို့တွင် ယခုအခါ လူဦးရေ ခြောက် သိန်းခွဲခန့်နေထိုင်ပြီး အလယ်ခေတ်အဆောက်အအုံများတည်ရှိရာ Old Town ၊ ပြ တိုက်များ၊ ကဇာတ်ရုံများနှင့် ထူးခြားဆန်းပြား၍ လက်ရာမြောက်လှသည့် Art Nouveau ဗိသုကာလက်ရာဖြင့် ဖန်တီးထားသော သစ်သားအဆောက်အအုံများဖြင့် ထင်ရှားလှ သည်။ Hop on – Hop Off Sightseeing ကားများသည် Old Town ရှိ မြို့တော်ခန်းမ ရင်ပြင်မှ ၄၅ မိနစ်လျှင် တစ်စီးနှုန်းဖြင့် စတင်ထွက်ခွာလေ့ရှိ၍ မြို့တစ်ပတ် အတက် အဆင်းမလုပ်ဘဲစီးပါက တစ်နာရီခွဲခန့်သာ ကြာသော်လည်း စာရေးသူအနေဖြင့်မူ စိတ်ဝင်စားဖွယ်နေရာအချို့၌ အချိန်ရသမျှ ဆင်း၍ကြည့်ရှုလေ့လာခဲ့ပါသည်။ Daugava မြစ် နှင့် ဆက်သွယ်ထားသည့် တူးမြောင်းအတွင်း၌လည်း စက်လှေစီး၍ လေ့လာနိုင်ပါသည်။ မြို့တော်ခန်းမရင်ပြင်တစ်ဝိုက်တွင် မြို့တော်ခန်းမနှင့် မျှော်စင်၊ ၁၄ ရာစုနှစ်က တည်ဆောက်ခဲ့သည့် House of Blackheads ၊ လွတ်လပ်ရေးကာကွယ်သူကို ဖော် ညွှန်းသည့် Rolandိ ရုပ်တုနှင့် ၁၂၀၉ ခုနှစ်က စတင်ဖော်ပြခဲ့ကြသည့် St. Peter ဘုရား ကျောင်းတို့ တည်ရှိပါသည်။ ၁၃၃၀ ပြည့်နှစ်က စတင်ဆောက်လုပ်ခဲ့၍ ၁၉၂၂ ခုနှစ်က သမ္မတအိမ်တော်ဖြစ်လာခဲ့သည့် Riga ရဲတိုက်၊ ဥရောပတိုက်၏ အကြီးဆုံးနှင့် သက် တမ်းအရင့်ဆုံးဈေးကြီးဖြစ်၍ အမိုးခုံးအဆောက်အအုံကြီး ငါးခုပါဝင်သည့် Central Market ၊ ရှေးဟောင်းမြို့ရိုး၊ လက်ဗီယန်အမျိုးသားကဇာတ်ရုံ၊ ၁၃၃၀ ပြည့်နှစ်တွင် ဆောက်လုပ်ခဲ့၍ Sand Tower ဟု အမည်တွင်ခဲ့ပြီး ၁၇ ရာစုတွင် ယန်းမှုန့်များစုဆောင်း ခဲ့သဖြင့် Powder Tower ဟုအမည်တွင်ကာ ယခုအခါ စစ်သမိုင်းပြတိုက်အဖြစ်တည် ရှိနေသည့် မျှော်စင်ကြီး၊ အမျိုးသားစာကြည့်တိုက်နှင့် မြို့လယ်ရှိ ၁၂၁၀ ပေမြင့်သော Freedom Monument ကျောက်တိုင်တို့သည် Riga မြို့၏ ထင်ရှားသည့် အ ဆောက်အအုံများဖြစ်ကြသည်။

စိတ်ဝင်စားဖွယ်ကောင်းသည်မှာ Elizabetes လမ်း နှင့် Alberta လမ်းတို့တွင် အများအပြားတည်ရှိ၍ မြို့လယ်ဧရိယာ၏ သုံးပုံတစ်ပုံခန့်ကို နေရာယူထားသော ၁၉ ရာစုမှ Nouveau အနုပညာဗိသုကာလက်ရာ အဆောက်အအုံများကို ယူနက်စကိုက ကမ္ဘာ့ ယဉ်ကျေးမှုအမွေအနှစ်များအဖြစ် သတ်မှတ်ခဲ့ခြင်းဖြစ်သည်။ သို့ဖြစ်ရာ နိုင်ငံငယ် သော်လည်း သမိုင်းကြောင်းရှည်လျားပြီး လေ့လာစရာတို့လည်း များပြားလှသဖြင့် Riga မြို့သို့ ယခင်နှစ်က ကမ္ဘာလှည့်ခရီးသည် ၂ ဒသမ ၃ သန်း လာရောက်ခဲ့သည်ဟု ဆိုခြင်းကို စာရေးသူ လုံးဝယုံကြည်မိပါတော့သည်။

ဥရောပတိုက် အရှေ့မြောက်ပိုင်းရှိ လစ်သူယေးနီးယား (Lithuania) နိုင်ငံ၏အ လံမှာ မြန်မာနိုင်ငံ၏အလံနှင့် အလွန်ဆင်တူပြီး ကြယ်ဖြူတစ်လုံးသာ ကွာခြားသဖြင့် ယင်းနိုင်ငံကို စာရေးသူ စိတ်ဝင်စားခဲ့မိပါသည်။ မကြာမီက ပိုလန်နိုင်ငံမှတစ်ဆင့် လေ ယာဉ်ဖြင့် လစ်သူယေးနီးယားနိုင်ငံသို့ စာရေးသူသွားရောက်ခဲ့ရာ စီးပွားရေးဖွံ့ဖြိုး တိုး တက်လာနေသော အေးချမ်းသာယာလှသည့် နိုင်ငံဖြစ်ကြောင်းလည်း တွေ့မြင်သိရှိခဲ့ ရပါသည်။ ဂျာမနီ၊ ပိုလန်၊ လက်ဗီးယားတို့မှ လေယာဉ်အပြင် ရထား၊ ကားတို့ဖြင့်လည်း လစ်သူယေးနီးယားနိုင်ငံမြို့တော် Vilnius သို့ သွားရောက်နိုင်သည်။

ဘောလ်တစ်ပင် လယ် (Baltic Sea) ကမ်းခြေတွင် တည်ရှိ၍ အက်စ်တိုးနီးယား (Estonia)နှင့် လက် ဗီးယား (Latvia) နိုင်ငံတို့ကဲ့သို့ ဘောလ်တစ်နိုင်ငံတစ်နိုင်ငံလည်းဖြစ်သည်။ ယင်းကို လက်ဗီးယား၊ ဘီလာရု(စ်)၊ ပိုလန်၊ ရုရှား၏ဒေသတစ်ခုနှင့် ဘောလ်တစ်ပင်လယ်တို့က ဝန်းရံထားသည်။ ဒုတိယကမ္ဘာစစ်အပြီးမှစ၍ ဆိုဗီယက်ပြည်ထောင်စု ပြိုကွဲသည့် ၁၉၉၁ ခုနှစ် အထိ ဆိုဗီယက်ပြည်ထောင်စုဝင်နိုင်ငံတစ်နိုင်ငံဖြစ်ခဲ့ပြီး ၁၉၉၀ ပြည့်နှစ် တွင် ဆိုဗီယက်ပြည်ထောင်စု၌ ပထမဆုံးခွဲထွက်၍ လွတ်လပ်ရေးကြေညာခဲ့သည့် နိုင်ငံဖြစ်သည်။ လူဦးရေ ၂ ဒသမ ၈ သန်း နေထိုင်သည့် ယင်းနိုင်ငံသည် ဥရောပသမဂ္ဂ (EU) အဖွဲ့ဝင်လည်းဖြစ်သည်။ လစ်သူယေးနီးယန်းလူမျိုး ၈၇ ရာခိုင်နှုန်း နေထိုင်၍ ရိုမန် ကတ်သလစ် ခရစ်ယာန်ဘာသာကို ၇၇ ရာခိုင်နှုန်း ကိုးကွယ်ကြပြီး ရုံးသုံးဘာသာမှာ လစ်သူယေးနီးယန်းဘာသာစကားဖြစ်ကာ ယူရိုငွေကြေးကိုပင် သုံးစွဲလျက်ရှိကြသည်။ အထူးသဖြင့် Vilnius မြို့တော်မှ ရထားဖြင့် နှစ်နာရီခွဲ၊ ကားဖြင့် သုံးနာရီခွဲအကွာတွင် ရှိ၍ နေ့ချင်းပြန်သွားနိုင်သော လက်ဝါးကပ်တိုင်ပေါင်း တစ်သိန်းကျော်ရှိသည့် တောင် ကုန်း (Hill of Crosses) သည် ထင်ရှားလှပါသည်။


ယင်းနိုင်ငံ၏မြို့တော်နှင့် အကြီးဆုံးမြို့ဖြစ်သော Neris မြစ်က ဖြတ်သန်းစီး ဆင်းလျှက်ရှိသည့် Vilinus မြို့ကို ၁၃၂၃ ခုနှစ်ကစ၍ မြို့အဖြစ်ဖော်ပြခဲ့ကြ၍ ၁၃၈၇ ခုနှစ်တွင် မြို့တော်အဆင့် သတ်မှတ်ခဲ့ကြသည်။ လူဦးရေ ခြောက်သိန်းခန့်သာ နေထိုင်၍ သာယာအေးချမ်းလှသည့် ယင်းမြို့၏ ရှေးမြို့ဟောင်း (Old Town) နေရာရှိ Cathedral Basilica ဘုရားကျောင်း၊ Grand Duke Dedminas ရုပ်တုတည် ရှိရာ Grand Dukes နန်းတော်၊ ၁၈၇ ပေ မြင့်၍ ခေါင်းလောင်းများတည်ရှိသည့် Bell Tower မျှော်စင်၊ ၁၄ရာစုမှ ၁၇ ရာစုအတွင်း ရဲတိုက်ပုံစံငယ်များ ပြသထားသော ပြတိုက်တည်ရှိသည့် Gediminas Tower နှင့် လွန်ခဲ့သည့် နှစ် ၅၀ဝခန့်က လက်ရာ အတိုင်း မပြောင်းလဲဘဲ တည်ရှိနေသည့် St. Anne ဘုရားကျောင်းတို့ပါဝင်သည့် ရှေး ဟောင်းဗိသုကာလက်ရာများကို UNESCO အဖွဲ့က ၁၉၉၄ ခုနှစ်တွင် ကမ္ဘာ့ယဉ်ကျေး မှုအမွေအနှစ်ဒေသတစ်ခုအဖြစ် သတ်မှတ်ခဲ့ကြောင်း သိရသည်။ ဥရောပတိုက်တွင် ဂျူးလူမျိုးများနှင့်ပတ်သက်သည့်နေရာများစွာ တည်ရှိသည့်မြို့တစ်မြို့ဖြစ်သဖြင့် Jerusalem of the North နှင့် Rome of the North ၊ Athens of the North၊ New Babylon စသဖြင့် တင်စားခေါ်ဝေါ်ခြင်းခံရသည့်မြို့လည်း ဖြစ်သည်။


ထို့အပြင် ၁၅၂၂ ခုနှစ်တွင် တည်ဆောက်ခဲ့သည့် Gate of Dawn၊ ၁၀၇၁ ပေ မြင့်၍ ၃၆၀ ဒီဂရီလည်ပတ်ပြီး ရှုခင်းကြည့်ရှုနိုင်သည့် ကော်ဖီဆိုင်ပါရှိသော ရုပ်မြင် သံကြားမျှော်စင်၊ မြို့တော်ခန်းမအဆောက်အအုံ၊ ၁၉ ရာစု အစောပိုင်းက တည်ဆောက် ခဲ့သည့် သမ္မတနန်းတော်၊ ဆိုဗီယက်တို့၏ လွှမ်းမိုးခဲ့မှုကို သရုပ်ဖော်ထားသည့် KGB Museumပြတိုက်၊ ၁၆ ရာစုနှစ်က တည်ဆောက်ခဲ့၍ ဂိတ် ၉ ခုပါဝင်သော ရှေးဟောင်း မြို့ရိုး တို့သည်လည်း Vilnius မြို့၏ ထင်ရှားသည့် အဆောက်အအုံများဖြစ်ကြသည်။ စာရေးသူ အနေဖြင့် အချိန်မရသဖြင့် အခြား မြို့တော်ကြီးများနည်းတူ Vilnius မြို့၌ ရှိသည့် Hop on Hop off Sightseeing bus များဖြင့် ဆက်တက်ကာ လှည့်လည် ကြည့်ရှုလေ့လာခဲ့သော်လည်း အားမရခဲ့ပါ။ အနည်းဆုံး နှစ်ညအိပ်ခရီး သွားမှသာလျှင် ရောက်သင့်ရောက်ထိုက်သည့် နေရာများသို့ စုံလင်စွာရောက်နိုင်မည့် သွားရောက်လေ့ လာသင့်သည့် စိတ်ဝင်စားဖွယ်ရာ နိုင်ငံငယ်တစ်နိုင်ငံဖြစ်ကြောင်း စာရေးသူညွှန်းဆို ချင်မိပါတော့သည်။

ဂယောင်ဘောက်ကွန်းနန်းတော်ကြီးက သမိုင်းအစဉ်အလာကြီးမားခဲ့တာကြောင့် တောင်ကိုရီးယားနိုင်ငံရဲ့ အဓိကအထင်ကရနေရာကြီး ဖြစ်လို့နေပါတယ်။ ဂျိုဆောင် မင်းဆက်အစောပိုင်း တေးဂျိုဘုရင် မင်းမူခဲ့စဉ် ကိုရီးယားမြို့တော်ကို လက်ရှိမြောက်ကို ရီးယားနိုင်ငံဘက်ရှိ Kaesong မြို့ကနေ အဲ့ဒီတုန်းက Hanyang လို့ခေါ်တဲ့ ဆိုးလ် မြို့ကိုပြောင်းလဲခဲ့လို့ မြို့တော်အသစ်ပြောင်းလဲတာနဲ့အမျှ နန်းတော်အသစ်လည်း လိုအပ်တာကြောင့် ၁၃၉၅ ခုနှစ်မှာ စတင်တည်ဆောက်ခဲ့တာဖြစ်ပါတယ်။ တည် ဆောက်လည်းပြီးရော ဒီနန်းတော်ကြီးဟာ ကိုရီးယားနိုင်ငံရဲ့ ရင်နှစ်သည်းခြာ ရတနာ တစ်ပါးဖြစ်လာခဲ့တယ်။


ဂယောင်ဘောက်ကွန်းဆိုတဲ့ အဓိပ္ပါယ်က နိဗ္ဗာန်ကောင်းချီးပေးရာနန်းတော်လို့ အဓိပ္ပါယ်ရပါတယ်။ ဒီနန်းတော်ကြီးက မြို့တော်ရဲ့ အဓိက နန်းတော်ဖြစ်ခဲ့ပြီး ဆိုးလ်မှာ ရှိတဲ့နန်းတော်ကြီး ၅ ခုအနက် အကြီးဆုံးနန်းတော်ဖြစ်ခဲ့ပါတယ်။ တောင်ကိုရီးယား နိုင်ငံမြို့တော် ဆိုးလ်မြို့ရဲ့ အလည် ဘူဂါဆန်တောင်နဲ့ နမ်ဆန်တောင်ပတ်လည်ဝိုင်း လို့ တည်ရှိနေပါတယ်။ စတည်ဆောက်ခဲ့တဲ့ အချိန်ကစပြီး လွန်ခဲ့တဲ့ နှစ်ပေါင်း ၆၀၀ ကျော်အတွင်း နန်းတော်ကြီးဟာ အခြေအနေမျိုးစုံကို ကြုံကြိုက်ခဲ့ရပါတယ်။
ဂျိုဆောင်မင်းဆက်မှာ အာဏာဗဟိုချက်ဖြစ်ခဲ့တဲ့ နန်းတော်ကြီးဟာ ၁၅၉၂ခုနှစ် ကနေ ၁၅၉၈ ခုနှစ်အထိ ဂျပန်တွေကျူးကျော်တိုက်ခိုက်မှုကြောင့် မီးလောင်ပြာကျ သွားခဲ့ပါတယ်။ အဲ့အချိန်ကစပြီး နန်းတော်ကြီးဟာ နောက်နှစ် ၂၇၀အထိ စွန့်ပစ်ခံ ထားရပါတယ်။ ၁၈၆၈ ခုနှစ်ကျမှ ဂယောင်ဘောက်ကွန်းနန်းတော်ကြီးကို ပြန်လည် တည်ဆောက်ခဲ့ကြပါတယ်။ အဲ့တုန်းက ပြန်လည်တည်ဆောက်ရာမှာ မူလနန်းတော် ကြီးနဲ့ ကွဲပြားစွာ တည်ဆောက်ခဲ့တယ်လို့ သိရပါတယ်။ ရှေးဟောင်းတရုတ် ဗိသုကာ လက်ရာနဲ့ ဂျိုဆောင်မင်းဆက်ရိုးရာကို ပေါင်းစပ်ထားပြီး အဆောက်အအုံပေါင်း ၃၃၀ ကျော်ကို တည်ဆောက်ခဲ့ပါတယ်။ အသစ်တည်ဆောက်မှုက စတုရန်းပေပေါင်း ၄၄ သန်းကျော် အကျယ်ရှိတာကြောင့် မြို့သေးလေးတစ်မြို့လိုဖြစ်နေပါတယ်။
၁၉ရာစုမှာ ဂျပန်တွေထပ်မံကျူးကျော်ခဲ့တဲ့ ကာလအတွင်း နန်းတော်ကြီးဟာ အားလုံးနီးပါး ပြိုပျက်ခဲ့ပြီး အဆောက်အအုံ ၁၀ခုလောက်သာ ကျန်ရစ်ခဲ့ပါတယ်။ အခြားအဆောက်အအုံတွေကတော့ ၁၉၅၀ကနေ ၁၉၅၃ခုနှစ်ကြားမှာ ဖြစ်ပွားခဲ့တဲ့ ကိုရီးယားစစ်ပွဲအတွင်း ပျက်စီးခဲ့ကြပါတယ်။ ဂျပန်တွေကျူးကျော်မှုနဲ့ ကိုရီးယားစစ်ပွဲ တွေကြောင့် ပျက်စီးရာမှာ ကျန်ရစ်ခဲ့တဲ့ အဆောက်အအုံတွေကတော့ ပုလ္လင်ထားရှိရာ အကြီးဆုံးခန်းမဆောင်ကြီးဖြစ်တဲ့ Geunjeongjeon Hall၊ နိုင်ငံတကာကသံတမာန်တွေကို ဧည့်ခံရာ Gyeonghoeru Pavilion နဲ့ ရေကန်အလည်က ကျွန်းတုလေး ပေါ်မှာရှိတဲ့ Hyangwonjeong Pavilion တို့ပဲဖြစ်ပါတယ်။


စစ်ကြီးပြီးဆုံးတဲ့အခါမှာ ကိုရီးယားအစိုးရအနေနဲ့ တစ်ချိန်က ရွှေထီးဆောင်းခဲ့တဲ့ ကိုရီးယားတို့ရဲ့ ဂုဏ်ယူဖွယ်ရာနန်းတော်ကြီးကို ဟိုးအရင်မူလအတိုင်း ပြန်လည်တည် ဆောက်ခဲ့ကြပါတယ်။ ၁၉၈၉ ခုနှစ်က စတင်လုပ်ဆောင်ခဲ့တဲ့ ပြန်လည်တည်ဆောက်ရေး လုပ်ငန်းစဉ်က အနှစ်၂၀ကြာခဲ့တယ်လို့ သိရပါတယ်။
အခုလက်ရှိအချိန်မှာတော့ နန်းတော်ဝင်းအတွင်းမှာ နန်းတော်ဆောင်ကြီးတွေ အပြင် ကိုရီးယားအမျိုးသားရိုးရာပြတိုက်နဲ့ ကိုရီးယားအမျိုးသားနန်းတော်ပြတိုက်ဆိုပြီး ပြတိုက်နှစ်ခုပါရှိလို့နေပါတယ်။ ပြတိုက်ထဲမှာ ဂျိုဆောင်မင်းဆက်မှာ တော်ဝင်မိသားစု တွေ အသုံးပြုခဲ့တဲ့ ရှေးဟောင်းပစ္စည်းပေါင်း ၄၀၀၀၀ ကျော်ကို ပြသထားပါတယ်။ နန်းတော်ဝင်းအတွင်း နေ့လည် ၁နာရီ ကနေ ၃နာရီကြားအချိန်အတွင်း ဂိတ်စောင့် ရဲမက်တွေ ပြောင်းလဲတဲ့အခမ်းအနားကို တစ်နာရီကြားတစ်ခါ ကျင်းပလေ့ရှိပါတယ်။ အခကြေးငွေပေးစရာမလိုဘဲ နန်းတော်အနှံ့ အင်္ဂလိပ်၊ ဂျပန်နဲ့ တရုတ်လို လိုက်ရှင်းပြတဲ့ အစီအစဉ်တွေလည်း ရှိပါတယ်။
နောက်ပြီး နန်းတော်ဝင်းအတွင်း ကိုရီးယားနန်းတွင်းသူ၊ နန်းတွင်းသားတွေလို ဝတ်စားကာ လည်ပတ်နိုင်အောင် ကိုရီးယားရိုးရာအဝတ်အစားတွေ ငှားရမ်းတဲ့ဆိုင်တွေ နန်းတော်ပတ်ဝန်းကျင်မှာ အများကြီးရှိလို့နေပြီး ဧည့်သည်တိုင်းလိုလို ကိုရီးယားရိုးရာ အဝတ်အစားတွေဝတ်ကာ နန်းတော်ထဲလျှောက်ကြည့်ဓာတ်ပုံရိုက်ရတာ ပျော်စရာ ကောင်းလှပါတယ်။ ရှေးခေတ်ပြန်ရောက်သွားသလိုလို၊ ကိုရီးယား ရှေးဟောင်းဇာတ် ကားထဲ ဝင်သရုပ်ဆောင်ရသလိုလို ခံစားရပါတယ်။ နန်းတော်တွင်းဝင်ကြေးကို ကိုရီး ယားဝမ် ၃၀၀၀ (မြန်မာငွေ ၄၀၀၀ဝန်းကျင်) ကျသင့်ပေမဲ့ ရိုးရာဝတ်စုံ ဝတ်ဆင်ထားရင် ဝင်ကြေးမကောက်ခံဘူးလို့လည်း သိရပါတယ်။ ဒီလိုစီစဉ်ထားမှုတွေက အဆင် ပြေလှပြီး ကိုရီးယားနိုင်ငံရဲ့ ခရီးသွားလုပ်ငန်းကို အထောက်အကူဖြစ်စေတာကြောင့် အတုယူသင့်ပါတယ်။

 

More Articles ...