အီဂျစ်တို့၏ အသက်သွေးကြောမြစ်ဖြစ်ပြီး အီဂျစ်နိုင်ငံအရှေ့ဘက်၌ တောင်မှ မြောက်သို့ စီးဆင်းနေသည့် နိုင်းမြစ်သည် ကမ္ဘာပေါ်တွင် အရှည်ဆုံးမြစ်ဖြစ်ကာ မိုင် ပေါင်း ၄၁၆၀ မိုင်အထိရှည်လျားပါသည်။ အီဂျစ်တစ်နိုင်ငံလုံးကို ဖြတ်သန်းစီးဆင်းနေ သော်လည်း နိုင်းမြစ်တစ်ခုလုံး၏ ၂၂ ရာခိုင်နှုန်းသာ အီဂျစ်မှာတည်ရှိနေခြင်းဖြစ်သည်။ နိုင်းမြစ်သည် တောင်ပိုင်းရှိ ဘရူရွန်ဒီနိုင်ငံမှ နိုင်းမြစ်ဖြူအဖြစ် မြစ်ဖျားခံလာကာ ဆူဒန် နိုင်ငံအရောက်တွင် အီသီယိုးပီးယားနိုင်ငံမှ မြစ်ဖျားခံလာသည့် နိုင်းမြစ်ပြာနှင့်ပေါင်း ဆုံသွားပြီး နောက်ဆုံး၌ အီဂျစ်န်ိုင်ငံတွင် မြေထဲပင်လယ်ထဲသို့ စီးဝင်သွားလေသည်။
နိုင်းမြစ်သည် ကမ္ဘာပေါ်ရှိ အခြားသောမြစ်အများစုကဲ့သို့ မြောက်မှတောင်စီးဆင်း သည်မဟုတ်ဘဲ တောင်တန်းများရှိရာ တောင်မှမြောက်သို့ စီးဆင်းသောကြောင့် မြစ်ဖျားပိုင်းရှိရှာတောင်ပိုင်းကို အီဂျစ်အထက်ပြည်၊ မြစ်အောက်ပိုင်းရှိရာ မြောက်ပိုင်းကို အီဂျစ်အောက်ပြည်ဟု သတ်မှတ်ခေါ်ဝေါ်ထားကြပါသည်။ နိုင်းမြစ်ကမ်းဘေး မြစ်ဝှမ်း များတွင် နိုင်းမြစ်ရေလျှံပြီးနောက်ကျန်ခဲ့သည့်နုန်းမြေများမှာ လွန်စွာစိုက်ပျိုးဖြစ်ထွန်းသဖြင့် နိုင်းမြစ်ကို အခြေခံပြီး ရှေးခေတ်တွင် နှစ်ပေါင်းများစွာတိုင် အင်ပါယာကြီးမားခဲ့ သော အီဂျစ်ယဉ်ကျေးမှုကြီးပေါ်ထွန်းခဲ့ခြင်းဖြစ်သည်။ နုန်းမြေများရှိရာ မြစ်ဝှမ်းဒေသ တွေကို အနက်ရောင်မြေဟုခေါ်ကြပြီး အီဂျစ်ဟူသောအမည်မှာ အနက်ရောင်မြေဟု အဓိပ္ပာယ်ရသဖြင့် ဤသည်ကိုအစွဲပြုပြီး မှည့်ခေါ်ခဲ့ခြင်းဖြစ်သည်။ မြစ်ကမ်းနှင့်ဝေးရာ သဲကန္တာရများကိုတော့ အနီရောင်မြေဟုခေါ်ကြောင်း သိရသည်။
နိုင်းမြစ်သည် အီဂျစ်ပြည်၏စိုက်ပျိုးရေးကဏ္ဍအတွက်အရေးပါရုံမက မျက် မှောက်ခရီးသွားခေတ်တွင် ခရီးသွားကဏ္ဍ၌လည်း လွန်စွာအရေးပါလျက်ရှိနေသည်ကို ကိုယ်တွေ့ကြုံခဲ့ရပါသည်။ ယခင်နှစ်ဒီဇင်ဘာလက Tour Diamondခရီးစဉ်နှင့် အီဂျစ်နိုင်ငံကိုသွားရောက်လည်ပတ်ခဲ့စဉ်က အဆိုပါနိုင်းမြစ်တစ်လျှောက် အပျော်စီး သင်္ဘောပေါ် သုံးညတာအနားယူအိပ်စက်ကာ အီဂျစ်နိုင်ငံ ရှေးဟောင်းမြို့တော်များသို့ တစ်မြို့ဝင်တစ်မြို့ထွက် ကမ်းကပ်ကာသွားရောက်လည်ပတ်ဖြစ်ခဲ့ပါသည်။ ဦးဆုံးအနေ ဖြင့် မြို့တော်ကိုင်ရိုမှ အာစွမ်န်(Aswan)မြို့သို့ ညအိပ်ရထားဖြင့် သွားရောက်ကာ ထိုမြို့မှတစ်ဆင့် လပ်ဆွာ(Luxor)မြို့သို့ မြစ်တစ်လျှောက်စုံဆင်းခဲ့ခြင်းဖြစ်သည်။
ထိုသင်္ဘောခရီးစဉ်တစ်လျှောက်တွင် အီဂျစ်တစ်နိုင်ငံလုံးအသုံးပြုသော လျှပ်စစ် စွမ်းအားကိုရရှိပြီး ကမ္ဘာ့အကြီးဆုံးရေကာတာများတွင် တစ်ခုအပါအဝင်ဖြစ်သည့် အာစွမ်န်ရေကာတာသို့ရောက်ဖြစ်ခဲ့သည်။ ယင်းရေကာတာဆောက်လုပ်မှုကြောင့် နိုင်းမြစ် တွင်း ရေကြီးရေလျှံခြင်းကိုကာကွယ်နိုင်ခဲ့ပြီး လူတို့ပြုလုပ်သော ကမ္ဘာ့အကြီးဆုံး ရေ ကန်ဖြစ်သည့် နာဆာရေကန်ကိုဖြစ်ပေါ်စေခဲ့ပါသည်။ အာစွမ်န်မြို့တွင် ထိုနာဆာရေ ကန်ကို မျက်နှာမူ၍ တည်ဆောက်ထားသော ဖီလေးဘုရားကျောင်း၊ ကိုမိုဘိုမြို့တွင် ကလီယိုပါထရာဘုရင်မတည်ဆောက်ခဲ့ပြီး ရှေးခေတ် က ဆေးရုံအဖြစ်အသုံးပြုခဲ့သည့် ကိုမိုဘိုဘုရားကျောင်း၊ နာဆာကန်စပ်တွင်ရှိပြီး အီဂျစ် နိုင်ငံတွင် အလွန်ကျော်ကြားသည့် အဘူဆင်ဘဲလ်ဘုရားကျောင်း၊ အက်ဒ်ဖူမြို့တွင် အာဖရိကရိုးရာမြင်းလှည်းများဖြင့် သွားရောက်ခဲ့ရသည့် အက်ဒ်ဖူဘုရားကျောင်းနှင့် လပ်ဆွာမြို့၌ နိုင်းမြစ်အရှေ့ဘက်နှင့် အနောက်ဘက်ကမ်းများရှိ ထူးခြားခံ့ညားသော ရှေးဟောင်းအဆောက်အအုံများဆီသို့ သွားရောက်လည်ပတ်ဖြစ်ခဲ့ပါသည်။
သင်္ဘောခရီးစဉ်တစ်လျှောက်တွင်မြစ်ထဲ၌ နိုင်းမြစ်၏ရေအနက်မညီမျှမှုကို ချိန် ညှိသည့် ရေတံခါးများကို ဖြတ်သန်းခဲ့ရကာ ရေတံခါးများ၏ရေပြင်ချိန်ညှိမှုကို စိတ်ဝင် စားဖွယ်ရာမြင်တွေ့ခဲ့ရသည်။ ရေဂါလန်တန်ပေါင်းများစွာကိုထိန်းညှိပြီး သင်္ဘောများကို ဖြတ်သန်းသွားစေသည့်အပြင် နှစ်စဉ်ရေကြီးမှုကိုပါ ထိန်းညှိပေးသည့်ရေတံခါးများဖြစ် ကြောင်း သိရသည်။ နိုင်းမြစ်တွင် အပျော်စီးသင်္ဘောများအပြင် ဒေသခံတို့၏ရွက်လှေ စီး၍ နေဝင်ချိန်အလှကို ခံစားခဲ့ရပါသေးသည်။ နိုင်းမြစ်အတွင်း အပျော်စီးသင်္ဘောများ ကို ရက်တိုရက်ရှည်၊ ဝန်ဆောင်မှု၊ သင်္ဘောအမျိုးအစားပေါ်မူတည်ပြီး ရွေးချယ်နိုင်ခြင်းကြောင့် အီဂျစ်နိုင်ငံရောက်ခဲ့ပါက နိုင်းမြစ်တွင်း အပျော်စီးသင်္ဘောများ မဖြစ်မနေစီး သင့်ကြောင်း တိုက်တွန်းလိုက်ရပါသည်။

23-2-17egypt

 

စိတ်ကူးယဉ် နတ်သမီးပုံပြင်တွေ၊ ဒစ္စနေးကာတွန်းကားတွေထဲက ရဲတိုက်ကြီး တွေဟာ အပြင်မှာလည်းတကယ်ရှိတာ အံ့ဩစရာပါ။ ရှေးခေတ်အဆက်ဆက်က ဘုရင်ဧကရာဇ်တွေဟာ သူတို့စံမြန်းဖို့နန်းတော်တွေ၊ ရန်သူတွေတိုက်ခိုက်မှုကိုကာကွယ် နိုင်ဖို့ ရဲတိုက်တွေ ဆောက်ထားခဲ့ကြပါတယ်။ ကမ္ဘာ့အနှံ့မှာရှိတဲ့ ရဲတိုက်ကြီးတွေအနက် အလှဆုံးရဲတိုက်ကြီးကတော့ ဂျာမနီနိုင်ငံရှိ နယူချွမ်(န်)စတိန်း ရဲတိုက်(Neuschwanstein Castle)ပဲဖြစ်ပါတယ်။ ဘယ်လောက်တောင်လှလဲဆိုရင် Disney ကထုတ်တဲ့ Sleeping Beauty ကာတွန်းကားထဲက ရဲတိုက်ကြီးကို ဒီရဲတိုက်ကြီး အခြေခံပြီး ဆွဲခဲ့ရတဲ့ အထိပါ။ ဒါကြောင့်လည်း ဒီရဲတိုက်ကြီးကို နတ်သမီးပုံပြင်ရဲတိုက်၊ Sleeping Beauty ရဲတိုက်လို့ အမည်ပေးထားကြပါတယ်။ ရဲတိုက်ကြီးရဲ့ တည်နေရာကလည်း ရဲတိုက်ကြီးကို အိပ်မက်ဆန်ဆန်လှစေနေတာပါ။ မြို့တော် မြူးနစ်ကနေ ၂ နာရီကြာ ကား မောင်းသွားနိုင်တဲ့ ဖူဆန်မြို့နားက တောင်ထိပ်ပေါ်မှာရှိပြီး ရေကန်နဲ့ ဘာဗေးရီးယန်း တောင်တန်းနောက်ခံရှုခင်းက ရဲတိုက်ကြီးနဲ့အတူ ရင်သပ်ရှုမောဖွယ်ကောင်းလှပါတယ်။
ရဲတိုက်ကြီးဟာ အပြင်ပန်းလှပခမ်းနားရုံမျှမက အတွင်းပိုင်းအခန်းတွေကိုလည်း လက်ရာမြောက်စွာ အနုစိတ်ဖန်တီးထားလေရဲ့။ လှပသက်ဝင်တဲ့ နံရံဆေးရေးပန်းချီ ကားတွေ၊ တဖိတ်ဖိတ်တောက်နေတဲ့ ပရိဘောဂတွေနဲ့ မြင်မြင်သမျှ အံ့အားသင့်စရာပါ။ ဘုရင်ကြီး အိပ်ခန်းတစ်ခုတည်းက ပရိဘောဂတွေ၊ နံရံပန်းပုတွေ အလှဆင်ဖို့အတွက် လက်သမား ၁၄ ယောက်က ၄ နှစ်ကြာ အချိန်ယူပြီး ထုဆစ်ပုံဖော်ပေးခဲ့ရပါတယ်တဲ့။ ရဲတိုက်ကြီးက အပြင်ပန်းမှာ အလယ်ခေတ်ဒီဇိုင်းဖြစ်ပေမဲ့ တကယ်တမ်းက ၁၉ ရာစု ကျမှဆောက်လုပ်ခဲ့တာပါ။ အပြင်ပန်းက ရှေးဟောင်းဆန်ပေမဲ့ အတွင်းဘက်က အဲ့ ခေတ်က ခေတ်ပေါ်နည်းပညာတွေသုံးခဲ့ပါတယ်တဲ့။ အိမ်သာတွေ အလိုအလျောက်ရေ ဆွဲချစနစ်၊ အခန်းတွင်းအပူပေးစနစ်၊ ရေပူရေအေးစနစ်၊ လျှပ်စစ်ခေါင်းလောင်း၊ တယ် လီဖုန်းစတာတို့ကို အသုံးပြုခဲ့တယ်လို့ သိရပါတယ်။ ပလ္လင်ထားရာအခန်းကို နှစ်ထပ် ခေါင်မြင့်ဆောက်ထားပြီး အနုပညာလက်ရာမြောက်ပေမဲ့ ဒီရဲတိုက်ကြီးမပြီးမီ ဘုရင် ကြီးနတ်ရွာစံသွားတာကြောင့် ပလ္လင်မရှိဘဲဖြစ်နေတာကို တွေ့ခဲ့ရပါတယ်။
ရဲတိုက်ကြီးကစိတ်ဝင်စားစရာကောင်းရုံမက ရဲတိုက်ကိုတည်ဆောက်ခဲ့တဲ့ ဘုရင်ကြီးဟာလည်း စိတ်ဝင်စားစရာကောင်းပါတယ်။ ဒီရဲတိုက်ကြီးဟာ ဂျာမနီအင်ပါယာ လက်အောက်မကျရောက်မီ ဘာဗေးရီးယန်းဘုရင့်နိုင်ငံအဖြစ် တည်ရှိနေခဲ့စဉ်က အုပ်ချုပ်ခဲ့တဲ့ ဘာဗေးရီးယန်းဘုရင်ကြီး လူးဝစ် II ရဲ့ စိတ်ကူးတွေကို အကောင်အထည် ဖော်ခဲ့တာပါ။ အနုပညာကိုချစ်မြတ်နိုးပြီး စိတ်ကူးယဉ်ဆန်တဲ့ဘုရင်ကြီးဟာ ငယ်စဉ် ကလေးဘ၀က ဒီရဲတိုက်ကြီးရှိရာတောင်ခြေရှိ ဖခမည်းတော်စံမြန်းခဲ့တဲ့ Hohenschwangau ရဲတိုက်ကြီးမှာကြီးပြင်းခဲ့ရပြီး ပြတင်းပေါက်ကနေလှမ်းမြင်ရတဲ့ တောင်ထိပ် ပေါ်မှာ နန်းတော်ကြီးတည်ဆောက်ဖို့ စိတ်ကူးခဲ့တာပါ။ အသက် ၁၉ နှစ် အရွယ်မှာ ဘုရင်ဖြစ်ပြီး နောက် ၅ နှစ်အကြာ ၁၈၇၉ ခုနှစ်မှာ စိတ်ကူးကိုအကောင် အထည်ဖော်ပြီး ဒီရဲတိုက်ကြီးကိုစတင်ဆောက်လုပ်ခဲ့ပါတယ်။ ဆောက်လုပ်ခဲ့တုန်းက ၃ နှစ်နဲ့အပြီး မှန်းထားပေမဲ့ အသေးစိတ်အနုစိတ်လွန်းတဲ့ဘုရင်ကြီးကြောင့် ၁၇ နှစ် ကြာသွားကာ ၁၈၈၆ ခုနှစ်မှာ ဘုရင်ကြီးရုတ်တရက် နတ်ရွာစံသွားတဲ့အထိ ရဲတိုက်ကြီးကို အဆုံး မသတ်နိုင်ခဲ့ပါဘူး။ ဘ၀တလျှောက်လုံး ဒီရဲတိုက်ကြီးကို အားစိုက်ပြီး ဆောက်လုပ်ခဲ့ ပေမဲ့ ဘုရင်ကြီးဟာ ရဲတိုက်မှာ ၁၁ ရက်သာ စံမြန်းခဲ့ရတာတော့ စိတ်မကောင်းစရာပါ။
လူးဝစ်ဘုရင်ကြီးဟာ ကမ္ဘာကျော်ဂျာမာန်အော်ပရာပြဇာတ်ဒါရိုက်တာ ရစ်ချတ် ဝက်ဂ်နာရဲ့အမာခံပရိသတ်ဖြစ်ပြီး ဒီရဲတိုက်ကြီးကို သူ့ကိုရည်စူးပြီးဆောက်လုပ်ခဲ့တာပါ။ Neuschwansteinဆိုတဲ့အမည်ဟာ အင်္ဂလိပ်လို New Swan Stone (ငန်း ကျောက်တုံးအသစ်)လို့ အဓိပ္ပါယ်ရပြီး ဝက်ဂ်နာရဲ့ဇာတ်ကောင်တွေထဲက တစ်ခုဖြစ်တဲ့ ငန်းသူရဲကောင်းကို ရည်စူးပြီး အမည်ပေးထားတာပါ။ ရဲတိုက်ထဲက အခန်းတွေ၊ ပန်းချီ ကားတွေဟာ ဝက်ဂ်နာရဲ့အော်ပရာပြဇာတ် ဇာတ်ဝင်ခန်းတွေလွှမ်းခြုံနေပါတယ်။ အဲဒီ ခေတ်က လူးဝစ်ဘုရင်ကြီးဟာ ဒီရဲတိုက်အပါအဝင် အခြားနန်းတော်တွေကို မလိုအပ် ဘဲဆောက်လုပ်မွမ်းမံခြင်းကြောင့် တိုင်းပြည်ဘဏ္ဏာထိခိုက်တယ်ဆိုကာ ဘုရင်ကြီးကို စိတ်မနှံ့သူဟု တောင် စွပ်စွဲခဲ့ကြပါတယ်။ ဒါပေမဲ့ ခုချိန်မှာတော့ ဒီရဲတိုက်ကြီးဟာ ခရီး သွားတွေဆီကနေ နေ့စဉ်ဝင်ငွေများစွာ ပြန်ယူပေးနေတာတော့ အသေအချာပါပဲ။ ဘုရင် ကြီး နတ်ရွာစံပြီး ၇ ပတ်အကြာမှာ ရဲတိုက်ကြီးကို အများပြည်သူကြည့်ရှုဖို့ ဖွင့်ပေးခဲ့ပါ တယ်။ ရှက်တတ်ပြီး လူတွေနဲ့ဝေးရာမှာ အေးအေးဆေးဆေးနေလိုတဲ့ ဘုရင်ကြီးဟာ သွားလာရခက်ခဲတဲ့ တောင်ထိပ်ပေါ်မှာ ရဲတိုက်ကြီးကို တည်ဆောက်ခဲ့ပေမဲ့ ခုချိန်မှာ တော့ ခရီးသွားဧည့်သည်များစွာ လာရောက်လေ့လာနေပါတယ်။ တစ်နှစ်ကို ဧည့်သည် ပေါင်း ၁ ဒသမ ၄ သန်းနီးပါးလာလေ့လာကြတယ်လို့သိရပါတယ်။
ကဗျာဆန်တဲ့လူးဝစ်ဘုရင်ကြီးရဲ့ ဒီနတ်သမီးပုံပြင်ရဲတိုက်ကြီးဟာ ဂျာမနီနိုင်ငံ မှာ အလှပဆုံးနေရာဖြစ်ပြီး နှစ်ပေါင်းရာကျော်တိုင် ဒဏ္ဏာရီဆန်စွာလှပ ခမ်းနားနေပါ တယ်။ ရဲတိုက်ပိုင်ရှင်ဘုရင်ကြီး ရေကန်ထဲမှာသေဆုံးနေပြီး သေဆုံးရခြင်းအကြောင်း ရင်း ရှာမတွေ့ဘဲဖြစ်နေတာကလည်း ပဟေဠိဆန်လှပါတယ်။ ဒီလောက် အပင်ပန်းခံ ဆောက်လုပ်ထားပြီး ဘယ်သူမှမနေခဲ့ရတာလည်း ထူးဆန်းတဲ့အချက်တစ်ချက်ပါ။ ဘယ်သူမှအသုံးမပြုခဲ့ရဘဲ ခရီးသွားလုပ်ငန်းမြှင့်တင်ဖို့ သက်သက်ဆောက်ထားသလား အောက်မေ့ရလောက်တဲ့ စိတ်ကူးယဉ်ရဲတိုက်ကြီးလို့ပဲဆိုရမှာပါ။

15-2-17castleB

ယခင်တစ်ပတ်မှ အဆက်
ဒီမောဆိုမြို့မှ တောင်ငူဘက်သို့သွားသောလမ်းအတိုင်း ကားဖြင့်နာရီဝက်ခန့်သွား ပြီးနောက် ကမ္ဘာလှည့်ခရီးသည်များအကြား ရေပန်းစားနေသည့် ပန်ပက်ကျေးရွာများသို့ ရောက်ခဲ့ပါသည်။ ပြည်သူလူထုအခြေပြုခရီးသွားလုပ်ငန်း (Community Based Tourism) (CBT) ကို အကောင်အထည်ဖော်နေ၍ ပဒေါင်ဟုလူသိများသော လည်ပင်း၌ ကြေးကွင်းစွတ်လေ့ရှိသည့် ကယန်းတိုင်းရင်းသူမိသားစုများနေထိုင်ရာ ပန်ပက်ရွာ ၄ ရွာ မှ ပန်ပက်စလူးကနားရွာတွင် ကျေးရွာသူတို့၏အိမ်နှင့် တစ်နိုင်တစ်ပိုင်ရိုးရာလုပ် ငန်းများကို လေ့လာခဲ့ကြသည်။ ရွာမှ တာဝန်ရှိသူတစ်ဦးက လိုက်လံပို့ဆောင်ပြသသဖြင့် အိမ်များသို့ သွားရောက်၍ ရင်းရင်းနှီးနှီးလေ့လာခွင့်ရခဲ့ရာ စိတ်ဝင်စားစရာကောင်းလှ ပါသည်။ ယင်းနောက် ပန်ပက်ရွာများနှင့် လမ်းမအနီးရှိ ကယန်းလူမျိုးများ၏ရိုးရာလက် မှုအမှတ်တရပစ္စည်းအရောင်းဆိုင်များရှိရာဈေးသို့ ရောက်ခဲ့ရာ ဝယ်၍ပင်မကုန်နိုင် အောင်ဖြစ်သကဲ့သို့ လည်ပင်း၌ကြေးကွင်းများစွတ်၍ ကယန်းအမျိုးသမီးများနှင့်အတူ အမှတ်တရဓာတ်ပုံရိုက်နေကြသူများကိုလည်း တွေ့မြင်ခဲ့ရသည်။
နေ့လယ်ပိုင်း၌ လူသိများသည့် ကန်ခုနစ်ဆင့်သို့သွားခဲ့ရာ မြောက်ဘက်မှ တောင်ဘက်အတိုင်း အဆင့်ဆင့်တည်ရှိနေသော ကန်ခုနစ်ကန်ကို မြေပုံပေါ်၌ မြင် တွေ့ခဲ့ရ၍ အချိန်မရသဖြင့် အချို့ကန်များကိုဖြတ်သန်းပြီး တနီးလာလဲကျေးရွာအနီးမှ အပန်းဖြေစခန်းငယ်နှင့် ဆိုင်အချို့တည်ရှိသည့် ကန်အမှတ်-၆ သို့ ရောက်ခဲ့ပါသည်။ နောက်ခံတောင်တန်းများနှင့်အတူ စိမ်းစိုနေသည့်ရေကန်မြင်ကွင်းမှာ လွန်စွာသာယာ လှပနေပြန်ပါသည်။ ကန်စပ်တစ်နေရာ၌ သံကိုလုံး၀အသုံးပြုထားခြင်းမရှိသော ကယား ရိုးရာအိမ်ကိုလည်းလေ့လာရ၍ ဒဏ္ဍာရီလာ ကယားသူရဲကောင်းဖိုးဗျားကိုအစွဲပြု၍ ဖိုးဗျားရိုးရာအိမ်ဟု အမည်တပ်ထားသည်ဟု သိရသည်။ ယင်းကန်ခုနစ်ဆင့်မှ ခရီး ဆက်ရာ ခဏကြာ၌ ငွေတောင်ဆည်၏အရှေ့တောင်ဘက် ထီးပွင့်ကန်တောင်တန်းသာသနာပြုဘုန်းတော်ကြီးကျောင်း၏ သာသနာ့မြေပရဝုဏ်အတွင်း၌ တည်ရှိသော သမိုင်းဝင်ထီးပွင့်ကန်သို့ ရောက်ခဲ့ပါသည်။ ရေကန်အတွင်း၌ ရွံ့နုန်းမြေများဖြင့် ထီးပွင့် သဏ္ဌာန်ရေပြင်ပေါ်သို့ ပြူတက်လာလေ့ရှိ၍ ထီးပွင့်ကန်ဟု အမည်တွင်ခြင်းဖြစ်သည်။ သမိုင်းကြောင်းအရ ကိန္နရီခုနစ်ဖော် ရေကစားသည့် ''ဘုတ်တလုတ်ကန်''ဟုလည်း အမည်တွင်သည်။ ရှေးနှစ်ပေါင်းများစွာကပင် ထီးပွင့်ကန်ကို ကယားလူမျိုးတို့က အမြတ်တနိုးထားကာ ကန်ပေါင်တွင်တံခွန်တိုင်များစိုက်ထူထားလေ့ရှိသည်။ ဘူမိဗေဒ သဘောအရ ယင်းသည် ရှေးအခါက မြေပြင်အနီးကပ်ဖြစ်ထွန်း ခဲ့သည့်မီးတောင်ဟောင်း ဖြစ်ခဲ့၍ ချောခဲတို့တွင် ထုံးဓာတ်များပါဝင်ပြီး ထိုချောခဲတုံးနှင့် ရေထိတွေ့သောအခါ ထုံးဓာတ်သည်အခိုးထွက်လာသည်။ ထွက်လာသည့်အခိုးနောက်သို့ သဲနုန်းများပါလာ ၍ တဖြည်းဖြည်းစုပြုံပြီး ရေပြင်အပေါ်၌ ထီးသဏ္ဌာန်တွေ့ မြင်ရကြောင်း သိရှိရသည်။ အချို့မြင်တွေ့ကြရသည့်ထီးသဏ္ဌာန်သည် အချင်းတစ်ပေခွဲမှ သုံးပေခန့်ကျယ် ပြန့် သော်လည်း ၎င်း၏ရေထဲရှိအခြေခံသဲနုန်းထုထည်ပမာဏသည် ကားကြီးတစ်စီးတိုက် သို့ မဟုတ် နှစ်စီးတိုက်ရှိကြောင်း သိရသည်။ စပွက်သည်မှ ထီးသဏ္ဌာန်ဖြစ်ပြီးနောက် သဲနုန်းတို့သည်ရေကန်ထဲ၌ လှိုင်းများနှင့်အတူ ပြန့်ကြဲသွားလေ့ရှိသည်ဟု ဆိုသည်။ စာရေးသူအနေဖြင့် ကြီးမားသည့်ထီးပွင့်များကို မတွေ့ခဲ့ရသော်လည်း ထီးပွင့်ဖြစ်ရန် အစပျိုးနေသည့် ထုံးဓာတ်အခိုးများပွက်လာသည်ကိုမူ မြင်တွေ့ခဲ့ရသည်။
အမှန်စင်စစ်ကယားပြည်နယ်၌ လေ့လာစရာအများအပြားကျန်နေသေး၍ တစ် ရက်ခန့်သာ အချိန်ထပ်ရပါက ဒီမောဆိုမြို့နယ်အတွင်းရှိ ရှေးခေတ်ရိုးရာအိမ်အများစုရှိနေသည့် ရှေးကယားရွာများ၊ ဖရူးဆိုးမြို့နယ်အတွင်းရှိ နား၌ အပေါက်ကြီးများဖောက် ထားသည့် ကယောတိုင်းရင်းသူတို့၏ရွာ၊ လွိုင်ကော်မြို့အနီးမှ မြကလပ်တောင်ပေါ်စေတီ နှင့်အောင်သပြေဂူစသည်တို့ကိုလည်း လေ့လာသင့်ကြောင်း Amazing Kayah ခရီး သွားလုပ်ငန်းထံမှ သိရသည်။ ထို့အပြင် ထိုင်းနိုင်ငံ၊ မဲဟောင်ဆောင်မြို့နှင့်ဆက်သွယ် နိုင်သည့် နယ်စပ်ဝင်ပေါက်နှစ်ပေါက်ကိုလည်းတိုးမြှင့်ဖွင့်လှစ်ရန် စီစဉ်လျက်ရှိကြောင်း လည်းသိရရာ များမကြာမီကာလတွင် လေ့လာစရာများပြား လွန်းလှသည့် ကယား ပြည်နယ်သို့ ပြည်တွင်း၊ ပြည်ပခရီးသည်အများအပြား ပိုမိုလာရောက်ကြလိမ့်မည်ဟု စာရေးသူယုံကြည်နေမိပါတော့သည်။

9-2-17demawsoU

 

ယခင်တစ်ပတ်မှ အဆက်
လွိုင်ကော်မြို့ပြင်ရှိ လေ့လာစရာများအနက် စိတ်ဝင်းစားစရာအကောင်းဆုံး နေရာတစ်ခုမှာ ကြတ်ဂူပင်ဖြစ်ပါသည်။ လွိုင်ကော်မြို့၏ အရှေ့ဘက် ၁၀ မိုင်ခန့်အကွာ တွင် ကြတ်ဂူသဘာ၀ကာကွယ်တောနယ်မြေ၌ ပင်လယ်ရေပြင်မှ ပေ ၂၉၉၀ အမြင့် တွင်တည်ရှိသည့် ကြတ်ဂူမှာထုံးကျောက်(Limestone)နှင့် Dolomite ကျောက်တို့ ဖြင့် ဖွဲ့စည်းထားသော ကယားပြည်နယ်၏ယုံကြည်မှုဆိုင်ရာညွှန်းဆိုသော ထူးဆန်း လှသည့်သဘာ၀ဂူဖြစ်ကြောင်း ဂူတည်ရှိရာတောင်ခြေတွင်စိုက်ထူထားသည့် ဆိုင်းဘုတ် စာသားအရ သိရှိရသည်။ အချို့သော လမ်းညွှန်ဆိုင်းဘုတ်များ၌မူ ''ကျတ်ဂူ''ဟု ရေးသားထားသည်ကိုလည်း တွေ့ရသည်။ ဂူ၀ရှိရာ တောင်ပေါ်သို့ အနည်းငယ်တက်ရ၍ ဂူအတွင်း၌ ၂ ပေမှ ၁၅ ပေအထိရှည်သော သစ်လုံးထွင်းခေါင်းတလားများရှိကာ ထောင်လျက်လဲလျက်ရှိပြီး အချို့မှာ ပေ ၂၀၊ ၃၀ မြင့်သည့် ဂူမျက်နှာကျက်၌ရှိသည်ဟု ဆို သည်။ လွန်ခဲ့သည့် နှစ် ၇၀ ခန့်က ဂူအတွင်းသို့ ရောက်ဖူးသူများ၏အဆိုအရ ယင်း ခေါင်းတလားများအတွင်းတွင် အရိုးစုများရှိခဲ့သည်ဟု သိရသည်။ ယင်းနောက် အရိုး များကို စုပြီးသင်္ဂြိုဟ်ပေးခဲ့ကြောင်း အချို့ကဆို၏။ ကမ္ဘာပေါ်ရှိ တရုတ်၊ ဖိလစ်ပိုင် စသည့်အချို့နိုင်ငံများ၏ဒေသအချို့နှင့် ဟာဝိုင်ယီကျွန်းများတွင် ဂူများအတွင်း၌ သင်္ဂြိုဟ် လေ့ရှိကြောင်း လေ့လာဖတ်ရှုခဲ့ရပါသည်။
တောင်ခြေရှိ ကြတ်ဂူတောရကျောင်းတိုက်မှ ဆရာတော်အားလျှောက်ထားသဖြင့် မီးစက်ထွန်းပေးရာ ဂူအတွင်းသို့ စာရေးသူတို့ ဝင်ရောက်နိုင်ခဲ့ပါသည်။ အတွင်းဘက်သို့ ပေပေါင်းများစွာသွားနိုင်၍ ပေ ၂၀၀၀ ခန့်အထိ မီးထွန်းပေးထားသော်လည်း ဖိနပ်မစီး ဘဲသွားရခြင်းဖြစ်ပြီး အချိန်လည်းမရသဖြင့် ပေ ၁၂၀၀ ခန့်အထိသာ စာရေးသူတို့ ရောက်ခဲ့ပါသည်။ ပေ ၁၈၀၀ ခန့်တွင် အောက်ဘက်ရှိ ရေကန်သို့ဆင်းသည့် လမ်းခွဲရှိ ကြောင်း လည်းသိရသည်။ ယခင်ကဂူအတွင်း၌ ဆိုလာမီးအချို့ကြိုးသွယ်၍ ထွန်းပေး ထားခဲ့ပြီး ယခုအခါ လျှပ်စစ်မီးစက်နှိုး၍သာ သွားနိုင်ပါသည်။ စာရေးသူတို့အနေဖြင့် ဂူအတွင်း၌ ပေ ၅၀၀ မှ ၁၂၀၀ ခန့်အထိ ခေါင်းတလားအပျက်အစီးများနှင့် တူသည့် သစ်သားအပိုင်းအစများစွာ မြင်တွေ့ခဲ့ရသော်လည်း အရိုးစုများကိုမူ မမြင်တွေ့ရခဲ့ပါ။ အချို့ကလည်းဂူအတွင်းရှိ လင်းနို့ချေးများဖြင့် ယခင်က ယမ်းပြုလုပ်ရာတွင် ပထမ အဆင့်၌ ထင်းအဖြစ်အသုံးပြုခဲ့သည့် သစ်တိုသစ်စများဖြစ်သည်ဟုဆိုကြောင်း သိရ သည်။ မိမိတို့အနေဖြင့်မူ မီးကျွမ်းထားသည့် သစ်တိုသစ်စများကိုတော့ မတွေ့ခဲ့ရပါ။
နောက်တစ်နေ့တွင် ငွေတောင်ပြည်ဟုလည်း အမည်တွင်သည့် ဒီမောဆို(အချို့ ကလည်း ဒီးမော့ဆိုဟုသုံးနှုန်းသည်)မြို့နယ်အတွင်း၌ တစ်နေကုန် လှည့်လည်လေ့လာ ခဲ့ပါသည်။ လွိုင်ကော်မြို့၏ ၁၀ မိုင်ခန့်အကွာရှိ ဒီမောဆိုမြို့သို့ ကားလမ်းမှာ ပြေပြစ် ကောင်းမွန်၍ လမ်းတစ်ဖက်တစ်ချက်၌ အိမ်ခြံဝင်းများဆက်စပ်နေပြီး မိနစ် ၂၀ ခန့် အကြာတွင်ရောက်ခဲ့ကြပါသည်။ ဒီမောဆိုမြို့တွင်းသို့ ရောက်သည်နှင့် နာမည်ကျော် ငွေတောင်ဆည်ကြီးကို ကားလမ်း၏ ဝဲဘက်တွင် ထင်ရှားစွာမြင်တွေ့ရသည်။ ၁၉၆၅ ခုနှစ်ကဖွင့်လှစ်ခဲ့၍ လယ်ဧကပေါင်း ၂၃၀၀၀ ခန့်ကို ရေသွယ်မြောင်းများဖြင့် ရေပေး ဝေလျက်ရှိသော ငွေတောင်ဆည်၏အရှေ့ဘက်တွင် ရွှေတောင်၊ ငွေတောင်နှင့် ပတ္တမြား တောင်ဟု အမည်တွင်သည့် တောင်သုံးလုံးကို လှမ်းတွေ့နေရပြီး သုဓနုမင်းသားနှင့် ငွေတောင်ပြည်ဘုရင်၏ အငယ်ဆုံးသမီးတော် ဒွေးမယ်နော်ကန္နရီမင်းသမီးလေးတို့ ၏ ဒဏ္ဏာရီဇာတ်လမ်းတွင်အဓိကပါရှိခဲ့သည့်ငွေတောင်နှင့် အနီးရှိငွေတောင်ရွာကို အစွဲပြု၍ ငွေတောင်ဆည်ဟု အမည်တွင်သည်ဟု ယူဆရသည်။ ယင်းဆည်ကြီးသည် အလွန်ကျယ်၍ ပတ်ဝန်းကျင်ရှုခင်းအလွန်သာယာပြီး လေကောင်းလေသန့်လည်း ကောင်းစွာရစေပါသည်။ ယင်းနောက် တစ်ပတ်လျှင် တနင်္လာ၊ ဗုဒ္ဓဟူးနေ့နှင့် စနေနေ့ သုံးရက်သာဖွင့်သော စည်ကားလှသည့် ဒီမော့ဆိုမြို့မဈေးကိုလည်း သွားရောက်လေ့ လာခဲ့ပါသည်။ ဒီမောဆိုမြို့အနီးရှိ ကျေးရွာများမှ အချို့က ပဒေါင်ဟုခေါ်သည့် လည် ပင်း၌ကြေးကွင်းစွပ်ထားသည့် ကယန်း၊ ကယော၊ ယင်းတလဲ၊ ယင်းဘော်၊ ဇယိမ်း စသည့်ကယားမျိုးနွယ်စု တိုင်းရင်းသားမျိုးစုံက ဒေသထွက်ကုန်များ၊ လက်မှုပစ္စည်းများ ကို လာရောက်ရောင်းချဝယ်ယူကြခြင်းဖြစ်ရာ ထူးခြားလှပါသည်။ အထူးသဖြင့် ဒေသ ထွက် ပျားရည်နှင့် ပြောင်းမှချက်လုပ်သည့် ခေါင်ရည်အမျိုးမျိုးကိုလည်း အစီအရီထိုင် ပြီးရောင်းချပေးလျက်ရှိရာ စိတ်ကြိုက်မြည်းစမ်းသောက်ကြည့်၍ ဝယ်ယူအားပေးနေ ကြသူများကိုလည်း မြင်တွေ့ရပါသည်။
မြို့ပြင်၌မူ ကမ္ဘာလှည့်ခရီးသွားများ အထူးစိတ်ဝင်စားကြည့် ကယန်းလူမျိုးများ နေထိုင်ရာ ပန်ပက်ကျေးရွာများ၊ ယင်းရွာများအနီးမှ ကယန်းလူမျိုးတို့၏ အမှတ်တရပစ္စည်းအရောင်းဆိုင်ဈေးတန်း၊ နာမည်ကျော်သည့်ကန်ခုနစ်ဆင့်နှင့် ထူးဆန်းလှသည့် သမိုင်းဝင်ထီးပွင့်ကန်တို့ကိုလည်း သွားရောက်လေ့လာခဲ့ရာ အလွန်စိတ်ဝင်စားစရာ ကောင်းလှပါသည်။
နောက်တစ်ပတ် ဆက်လက်ဖတ်ရှုပါရန် 

2-2-17demawsoA

 

ကယားပြည်နယ်၏ မြို့တော် လွိုင်ကော်မြို့သို့ ယခင်က လုပ်ငန်းတာဝန်များဖြင့် သာ စာရေးသူရောက်ခဲ့ရာ နေရာအနှံ့လေ့လာခွင့်မရခဲ့ပါ။ သို့သော် ယခုအခါ ကမ္ဘာ လှည့်ခရီးသည်များအကြား ရေပန်းစားလာနေသည့် ကယားပြည်နယ်သို့ မကြာမီက လေ့လာ ရေးခရီးအဖြစ် နှစ်ရက်သာသွားရောက်ခဲ့ရာ လွိုင်ကော်မြို့နှင့် ဒီမောဆိုမြို့ တစ်ဝိုက် လေ့လာစရာများကိုရနိုင်သမျှ သွားရောက်လေ့လာဖြစ်ခဲ့ပါသည်။ ပထမနေ့တွင် လေယာဉ်ကွင်းမှစ၍ Amazing Kayah ခရီးသွားလုပ်ငန်းမှ Super Custom ကားကို စီးလုံးငှားပြီး လွိုင်ကော်မြို့ပေါ်နှင့် မြို့ပြင်တစ်ခွင်ကို သွားရောက်လေ့လာခဲ့ရာ စိတ်ရှည်စွာဖြင့် မငြီးမငြူလိုက်လံပို့ဆောင်ပေးသည့်အတွက် တည်းခိုမည့် Kayah Resort Hotel သို့ ည ၉ နာရီခန့်မှ ရောက်ရှိခဲ့ပါသည်။
တောင်များဝန်းရံလျက် မြို့လယ်မှ ဘီလူးချောင်းက ဖြတ်သန်းစီးဆင်းနေသည့် လွိုင်ကော်မြို့သည် ယခုအခါ ယခင်ထက် ပိုမို၍အထူးသန့်ရှင်းလှပနေသည်ကို စာရေးသူသတိပြုမိပါသည်။ ထို့ပြင် ဇန်နဝါရီလ ၁၅ ရက်တွင် ကျရောက်မည့် (၆၅) နှစ်မြောက် ကယားပြည်နယ်နေ့ အခမ်းအနားအတွက် ကြိုတင်ပြင်ဆင်ထားကြသည် များကိုလည်း တွေ့ခဲ့ရပါသည်။ မြို့ပေါ်တွင် နာမည်ကျော် သာယာလှပသည့် နောင် ယားကန်၊ မြို့လယ်က မြို့နာမ်စေတီတော်၊ ထူးခြားထင်ရှားလှသည့် သီရိမင်္ဂလာ (တောင်ကွဲ)စေတီတော်၊ ပြည်နယ်ယဉ်ကျေးမှုပြတိုက်၊ ကန္ဒရ၀တီဟော်ကြီးတို့ သာမက လွိုင်ကော်မြို့၏ နာမည်ကျော်အစားအစာများဖြစ်ကြသည့် ကယား ဝက်အူချောင်း၊ ကြက်အူချောင်းနှင့် ဟင်းထုပ်များပြုလုပ်ရောင်းချသည့်နေရာများကိုပါ လေ့လာခဲ့ပါသည်။ တောင်ကွဲစေတီမှာ အမှန်စင်စစ် ၃၈၇ ပေခန့်မြင့်၍ ကိုးစိတ်ကွဲနေသော ကျောက်တောင်ထွတ်များထက်တွင် စေတီတစ်ဆူစီတည်ထားခြင်းဖြစ်၍ အဝေးမှတစ်စု တစ်စည်းတည်း တွေ့မြင်ဖူးမြော်ရပါသည်။ ကျောက်တောင်တစ်ခုနှင့် တစ်ခုကိုလည်း တံတားငယ်များဖြင့် ဆက်သွယ်ထား၍ တောင်ကွဲစေတီတော်ရင်ပြင်မှ လွိုင်ကော် မြို့တစ်ခွင်၏ သာယာလှပပုံများကို လေးဘက်လေးတန် လှည့်ပတ်ကြည့် ရှုနိုင်ပါသည်။ ပြည်နယ်ယဉ်ကျေးမှုဗိမာန်ဟု အမည်တွင်သည့် စာကြည့်တိုက်နှင့် ပြတိုက်တွင် ကယားတိုင်းရင်းသားအမျိုးမျိုး၏ ဝတ်စားဆင်ယင်ပုံ၊ အသုံးအဆောင်၊ ပန်းချီကားနှင့် တူရိယာပစ္စည်းများကို ပြသထားရာ စိတ်ဝင်းစားစရာကောင်းလှပါသည်။ ၁၉၁၂ ခုနှစ်တွင် တည်ဆောက်ခဲ့သော နယ်ရှင်စော်ဘွားများ ရုံးစိုက်စိုးစံခဲ့ရာ ကန္ဒရ၀တီဟော်ကြီးကို ၁၉၉၄ ခုနှစ် ပြန်လည်ပြုပြင်ခဲ့ကြပြီး ယခုအခါ သီရီမင်္ဂလာပုံကျောင်း မင်္ဂလာဟော်ကြီး ပရိယတ္တိစာသင်တိုက်အဖြစ် တွေ့မြင်လေ့လာခဲ့ရပါသည်။
မြို့ပြင်၌မူ လောပီတရေအားလျှပ်စစ်စက်ရုံ၊ လောပီတ ရေတံခွန်၊ ကယားနှင့် ရှမ်းပြည်နယ်နှစ်ခု၏ နယ်စပ်ရှိ ထီးစဲခါးရေတံခွန်နှင့် ထူးဆန်းအံ့ဩဖွယ်ကောင်းလှသည့် ကြတ်ဂူ(အချို့ကလည်း ကျတ်ဂူဟုရေးကြသည်) တို့ကိုလည်း သွားရောက် လေ့လာဖြစ်ခဲ့ပါသည်။ ထီးစဲခါးရေတံခွန်သို့ သွားရာလမ်းအနီးရှိ လှပသည့် ကျောက် ပန်းဆွဲများရှိသော အောင်သပြေဂူသို့မူအချိန်မရတော့သဖြင့် မရောက်ခဲ့ပါ။ လွိုင် ကော်မြို့မှ အရှေ့တောင်ဘက် ၁၄ မိုင်ခန့်အကွာတွင် ဘီလူးချောင်း အမှတ်(၂) ရေအားလျှပ်စစ်ဓာတ်အားပေးစက်ရုံတည်ရှိ၍ လောပီတရှိ ရေအားလျှပ်စစ်စက်ရုံ သုံးခုတွင် အကြီးဆုံးဖြစ်သည်။ ၁၉၅၈ ခုနှစ်က စတင်တည်ထောင်ခဲ့၍ တာဘိုင်စက် ကြီး ခြောက်လုံးရှိကာ တစ်လုံးစီမှ ၂၈ မဂ္ဂါဝပ်ဖြင့် စုစုပေါင်း ၁၆၈ မဂ္ဂါဝပ်ထုတ်လုပ်နိုင် ကြောင်း သိရသည်။ အင်းလေးကန်မှ ရေကို မိုးဗြဲရေလှောင်တမံ၌ စုစည်းထိန်းသိမ်းထားပြီး ဘီလူးချောင်းမှတစ်ဆင့် ရေစီးဆင်းကာအဆင့်ဆင့်လျှပ်စစ်ဓာတ်အား ထုတ် ယူခြင်းဖြစ်သည်။ အမှတ်(၁)စက်ရုံမှ ၂၈ မဂ္ဂါဝပ်နှင့် နောက်ဆုံးတည်ဆောက်ခဲ့သည့် အမှတ်(၃) စက်ရုံမှ ၅၂ မဂ္ဂါဝပ်ထုတ်လျက်ရှိရာ လောပီတစက်ရုံများမှ စုစုပေါင်း လျှပ်စစ် ၂၄၈ မဂ္ဂါဝပ် ထုတ်လုပ်လျက်ရှိကြောင်းသိရသည်။ အမှတ်(၂) စက်ရုံအနီးရှိ အေးချမ်းဆိတ်ငြိမ်လှသည့် တောတောင်ထဲရှိ လောပီတရေတံခွန် မှကျလာသည့် ဘီလူးချောင်းရေများမှာ ကြည်လင်၍ စိမ်းပြာရောင်သန်းလျက်ရှိ သည်ကိုတွေ့မြင်ရပါသည်။ လွိုင်ကော်မှ မြောက်ဘက်ရှိ တောင်ကြီးမှသွားသည့်ကားလမ်းအတိုင်း မိနစ် ၄၀ ခန့်သွား၍ လမ်းခွဲမှ ဘယ်ဘက်သို့ ၁၀ မိနစ်ခန့် ထပ်သွားပြီးနောက် ရှမ်း နှင့် ကယားပြည်နယ်နှစ်ခု၏နယ်စပ်ရှိ သာယာလှပသည့် ထီးစဲခါးရေတံခွန်သို့ရောက် ခဲ့ပါသည်။ ချောင်းကိုဖြတ်ရာ တံတားအလယ်ရှိ ကန္နာရီ၊ ကန္နရာမောင်နှံရုပ်ထုနှင့်အတူ ထိုရေတံခွန်အဆင့်ဆင့်၏ မြင်ကွင်းမှာ လွန်စွာလှပတင့်တယ်လွန်းလှပါသည်။
ဆက်လက်ဖတ်ရှုပါရန် 

26-1lwaikawunder

More Articles ...