ယခုအခါ တရုတ်ပြည်သူ့သမ္မတနိုင်ငံတွင် အကြီးဆုံးနှင့် ချမ်းသာကြွယ်၀မှု၊ ဖွံ့ ဖြိုးတိုးတက်မှု အများဆုံးမြို့ကြီးငါးမြို့တွင်အပါအဝင်ဖြစ်၍ ပေကျင်း၊ ရှန်ဟိုင်းနှင့် ကွမ်ကျိုးမြို့တို့ပြီးလျှင် စတုတ္ထလိုက်သည့် ရှန်းကျန့်(အချို့ကလည်း ရှင်းကျင့်ဟု အသံ ထွက်သည်) (Shenzhen)မြို့ကြီးသည် များမကြာမီကာလက တံငါရွာလေးတစ်ရွာ သာဖြစ်ခဲ့ပါသည်။ ကွမ်တုံပြည်နယ်၏ ဒုတိယမြို့တော်ဖြစ်၍ စီးပွားရေးဖွံ့ဖြိုးတိုးတက် သည့် ရှန်းကျန့်မြို့သည် ကွမ်တုံပြည်နယ်တောင်ပိုင်း၊ တောင်တရုတ်ပင်လယ်သို့ စီး ဆင်းသည့် ပုလဲ(Pearl)မြစ်၀တွင် ဟောင်ကောင်မြို့အနီး၌ တည်ရှိပါသည်။ ယခင်က ပင်လယ်ကမ်းရိုးတန်း တံငါရွာလေးသာဖြစ်ခဲ့၍ ၁၉၇၉ ခုနှစ်တွင် လူ ၃၀၀၀၀ နေထိုင် သည့်မြို့ငယ်မှ မြို့ကြီးအဆင့်သတ်မှတ်ခြင်းခံခဲ့ရသည်။ ထိုအချိန်က တရုတ်နိုင်ငံ၏ခေါင်းဆောင် တိန့်ရှောင်ဖိန် (Deng Xiaoping)၏ အမြော်အမြင်ကြီးမားမှုနှင့် မှန်ကန် သည့်ဆုံးဖြတ်ချက်များဖြင့် တရုတ်နိုင်ငံသည် ၁၉၇၈ ခုနှစ်မှစ၍ ပြုပြင်ပြောင်းလဲရေးနှင့် တံခါးဖွင့်ဈေးကွက်စီးပွားရေးစနစ်တို့ကို ပီပြင်စွာစတင်အကောင်အထည်ဖော်ရန်ကြိုး ပမ်းခဲ့ကြပြီး ၁၉၈၀ ပြည့်နှစ်တွင် တရုတ်ပြည်၏ပထမဆုံးအထူးစီးပွားရေးဇုန်(Special Economic Zone)ကို ရှန်းကျန့်မြို့၌ စတင်တည်ထောင်ခဲ့ကြသည်။ ယင်းနောက် နိုင်ငံရပ်ခြား ရင်းနှီးမြှုပ်နှံမှုများနှင့်အတူ ထိုအထူးစီးပွားရေးဇုန်နှင့်အခြားဇုန်များလည်း အသီးသီးလျင်မြန်စွာဖွံ့ ဖြိုးတိုးတက်လာခဲ့ပြီးနောက် တရုတ်နိုင်ငံ၏စီးပွားရေးသည်လည်း တစ်ဟုန်ထိုးတိုးတက်လာခဲ့ရာ ယခုအခါကမ္ဘာပေါ်တွင် အမေရိကန်နိုင်ငံကိုကျော်တက် တော့မည့် ကမ္ဘာ့ဒုတိယစီးပွားရေးအင်အားအကြီးဆုံးနိုင်ငံဖြစ်လာခဲ့သည်။
ရှန်းကျန့်မြို့သည်လည်း စီးပွားရေးနှင့်နည်းပညာတို့တွင် တစ်ဟုန်ထိုးဖွံ့ဖြိုးတိုး တက်လာခဲ့ရာ ယခုအခါ အမြဲတမ်းနေထိုင်သူဦးရေ ၁၉ သန်းကျော်ရှိသည့် စီးပွားရေး မြို့တော်ကြီးဖြစ်လာခဲ့သည်။ ယင်းဦးရေအနက် ဒေသခံမှာအနည်းငယ်သာဖြစ်၍ ၈၀ ရာခိုင်နှုန်းက အခြားဒေသမှလာရောက်အခြေချနေထိုင်ကာ စီးပွားရေးလုပ်ကိုင်ကြခြင်း ဖြစ်သဖြင့် တိုင်းရင်းသားမျိုးစုံနှင့်စကားပြောပုံစံမျိုးစုံကို စာရေးသူမြင်တွေ့ခဲ့ရပါသည်။ တရုတ်နိုင်ငံ၏ စီးပွားရေးဗဟိုချက်ဖြစ်လာသည့် ယင်းမြို့သည် ၁၉၉၀ ပြည့်လွန်နှင့် ၂၀၀၀ ပြည့်လွန်နှစ်များအတွင်း ကမ္ဘာပေါ်၌ဖွံ့ဖြိုးတိုးတက်မှုအမြန်ဆုံးမြို့များတွင် အပါအဝင် ဖြစ်ခဲ့သည်။ ဟောင်ကောင်ကျွန်း၏ နယ်မြေသစ်များဖြစ်သည့် ကုန်းတွင်းဒေသကောင်းလုံကျွန်းဆွယ်နှင့် ရေလက်ကြားလေးတစ်ခုသာခြားသည့် ရှန်းကျန့် မြို့သည် ဟောင်ကောင်နှင့်အပြိုင်တိုးတက်လာခဲ့၍ ၂၀၁၆ ခုနှစ်တွင် GDP (Gross Domestic Product) ထုတ်ကုန်ပမာဏစုစုပေါင်း ဒေါ်လာ ၂၉၄ ဘီလျံ(၁ ဘီလျံ = သန်း ၁၀၀၀) ရှိပြီး ယင်းပမာဏမှာ တရုတ်တစ်နိုင်ငံလုံး GDP ၏ ၁၀ ပုံ ၁ ပုံနီးပါးရှိကာ ပေါ်တူဂီ၊ အိုင် ယာလန်၊ ဗီယက်နမ်စသည့်နိုင်ငံများ၏တစ်နိုင်ငံစီထုတ်လုပ်သည့် GDP ပမာဏထက် ပိုများကြောင်း သိရသည်။ အထူးသဖြင့် ၁၉၈၁ ခုနှစ်မှ ၁၉၉၀ ပြည့်နှစ်အတွင်း လွန်စွာ ဖွံ့ဖြိုးတိုးတက်ခဲ့ရာ နှစ်စဉ် GDP ဖွံ့ဖြိုးတိုးတက်မှုမှာ ၄၀ ရာခိုင်နှုန်းအထိပင်ဖြစ်ခဲ့သည်။ ယခင်အမည် Shum Chun မှ Shenzhen ဟု ၁၉၇၉ ခုနှစ်တွင် အမည်ပြောင်းခဲ့ပြီး နောက် ၁၉၉၀ ပြည့်လွန်နှစ်များတွင် ဆောက်လုပ်ရေးလုပ်ငန်းများကို တွန်းအားပေး ဆောင်ရွက်ခဲ့ရာ တစ်နေ့လျှင် အထပ်မြင့်တိုက်တစ်လုံးနှုန်းစတင်တည်ဆောက်၍ ဆောက် လက်စတိုက်များကိုလည်း သုံးရက်လျှင် တစ်လွှာ(တစ်ထပ်)နှုန်းဖြင့် ပြီးစီးအောင် ဆောက်လုပ်ခဲ့ပြီး သုံးရက်လျှင်မြို့ တွင်းလမ်းမကျယ်တစ်လမ်းနှုန်းဖောက်လုပ်ခဲ့ကြောင်း သိရသည်။ ယခုအခါ မီတာ ၂၀၀ (၆၅၆ ပေ)ထက်မြင့်သည့် မိုးမျှော်တိုက် ၆၀ ခန့်နှင့် မီတာ ၃၀၀ (၉၈၄ ပေ)ထက်မြင့်သည့် မိုးမျှော်တိုက် ၁၀ လုံးခန့်ရှိသည့် မဟာမြို့တော် (Mega City)တစ်မြို့ဖြစ်လာခဲ့ရာ ၁၁၅ ထပ်ရှိ၍ ၁၉၆၉ ပေမြင့်သည့် Ping An ကုန်သွယ်မှုဗဟိုဌာန၊ အထပ် ၁၀၀ နှင့် ပေ ၁၄၅၀ ခန့်မြင့်သည့် Kingkey 100 ကုန် သွယ်မှုအဆောက်အအုံနှင့် ၁၂၆၀ ပေမြင့်သည့် Diwang အဆောက်အအုံတို့မှာ ထင်ရှားသည့် အဆောက်အအုံများဖြစ်ကြသည်။
ရှေ့တစ်ပတ်ဆက်လက်ဖတ်ရှုပါရန် 

တရုတ်နိုင်ငံ၌ ရှေးဟောင်းမြို့တော် အများအပြားရှိ၍ ယခုအခါ ယင်းတို့သည် ဖွံ့ဖြိုးတိုးတက်လာလျက်ရှိရာ ဂျင်ဂျိုးမြို့ (Jingzhou) သည်လည်း အပါအဝင်ဖြစ် သည်။ Hubei ပြည်နယ်၏ တောင်ပိုင်း၊ ဝူဟမ်မြို့အနီး အနောက်ဘက်တွင်ရှိသော ဂျင်ဂျိုးမြို့သည် ကမ္ဘာကျော် ယန်စီမြစ် (Yangtze) မြစ်ကမ်းနံဘေး၌ တည်ရှိပါသည်။ လွန်ခဲ့သည့် နှစ်ပေါင်း ၂၆၀၀ ကျော်က စတင်၍ထင်ရှားခဲ့သည့် သမိုင်းဝင် ရှေး ဟောင်းမြို့ဖြစ်၍ ယခုအခါစီရင်စုနယ်မြို့တော်တစ်မြို့လည်းဖြစ်သည်။ နှစ်ပေါင်း ၄၁၁ နှစ်အကြာ မင်းပေါင်း ၂၀ စိုးစံခဲ့သည့် ချူ (Chu) နိုင်ငံငယ်၏ မြို့တော်ဖြစ်ခဲ့၍ ချူ ယဉ်ကျေးမှုအထူးထွန်းကားရာဒေသ မြို့လည်းဖြစ်သည်။ တောတောင်များဝန်းရံလျက် မြို့တွင်း၌ ဥယျာဉ်များနှင့် ရေကန် ၃၀ ကျော်ရှိပြီး စိမ်းစိုသာယာလှပသဖြင့် Eco-Garden City (ဥယျာဉ်မြို့တော်) အဖြစ် ထင်ရှားသည်။ လူ ၇ သန်းနီးပါး နေထိုင် သည့် ယင်းမြို့သို့သာမက အနီးရှိ မြစ်ကျဉ်းသုံးခုဆုံရာ၌ တည်ဆောက်ထားသည့် ရေကာတာကြီး (Three Gorges်) နှင့် ယခင်က တည်ရှိခဲ့သည့် နိုင်ငံငယ်သုံးခု (Three Kingdoms) လေ့လာခရီးများသို့ လာရောက်ကြသည့် ပြည်တွင်း ပြည်ပခရီး သည်များဖြင့်လည်း စည်ကားလှသည်။ အထူးသဖြင့် မြစ်ကမ်းနံဘေး ဥယျာဉ်အတွင်း ရှိ ပေ ၁၉၀ မြင့်သော တရုတ်စစ်သူကြီး Guan Yu ရုပ်တုကြီးနှင့် အောက်ခြေရှိပြတိုက် သို့ လူအများအပြားလာရောက်ကြည့်ရှုလေ့လာလျက်ရှိသည်ကို စာရေးသူ မြင်တွေ့ခဲ့ ရပါသည်။ လွန်ခဲ့သည့်နှစ် ၁၈၀၀ ခန့်က ဟန်မင်းဆက်တွင် တာဝန်ထမ်းဆောင်ခဲ့သည့် စစ်သူကြီးဖြစ်၍ ၎င်း၏ သစ္စာရှိမှု၊ တာဝန်ကျေပွန်မှု၊ သတ္တိရှိမှုနှင့် တရားနည်းလမ်းကျ မှုတို့ကြောင့် ထင်ရှားကျော်ကြားခဲ့သည်။ ၁၃၂၀ တန်လေးသည့် ကွန်ကရစ်ရုပ်တုကြီးပေါ် တွင် ကြေးပြားပေါင်း ၄၀၀၀ ကျော် ဖုံးအုပ်တပ်ဆင်ထားသည့် ဧရာမရုပ်တုကြီး၏ပုံမှာ တရားနည်း လမ်းကျမှု၊ သမာဓိရှိမှုတို့ကို ဖော်ညွှန်းသည့် တရုတ်စာလုံးပုံစံနှင့် ဆင်တူ ဖြစ်ကြောင်း သိရပါသည်။

ဂျင်ဂျိုးမြို့ရှိ ဂျင်ဂျိုးပြတိုက်တွင် ပိုးထည်၊ ကျောက်စိမ်း၊ ယွန်း၊ ကြေး၊ ဆင်စွယ် စသည်တို့ဖြင့် ပြုလုပ်ထားသည့် ရှေးဟောင်းပစ္စည်း ၁၂၀၀၀၀ ကျော်ကို ပြသထား၍ လွန်ခဲ့သည့် နှစ်ပေါင်း ၂၀၀၀ ခန့်က တရုတ်အမျိုးသားတစ်ဦး၏အလောင်းကိုလည်း မပုပ်မသိုးအောင် စီမံပြသထားပါသည်။ လွန်ခဲ့သည့် နှစ်ပေါင်း ၂၃၀၀ ကျော်က မြို့ရိုး ဟောင်းကို လက်ရှိမြင်တွေ့ရသည့်အတိုင်း ၁၆၄၆ ခုနှစ်တွင် ပြုပြင်တည်ဆောက်ထား သည့် ဂျင်ဂျိုးမြို့ရိုးသည်လည်း စိတ်ဝင်စားစရာကောင်းလှပါသည်။ အောက်ခြေ၌ ၃၃ ပေကျယ်၍ ပေ ၃၀ မြင့်သည့် မြို့ရိုးသည် ၇ မိုင်ခန့်ရှည်ပြီး မျှော်စင်တစ်ခုစီရှိသောရှေး ဟောင်းမုခ်၀ကြီးခြောက်ခုရှိပါသည်။ မြို့ရိုးအပြင်ဘက်တွင် ကျုံးလည်းရှိ၍ ရှေးဟောင်း မြို့အတွင်းမှ ခေတ်သစ်မြို့ပြမြင်ကွင်းကို လှမ်းမျှော်ကြည့်ရှုရသည်မှာ လွန်စွာစက္ခုပ သာဒဖြစ်ရပါသည်။ ထို့အပြင် မြစ်ကြောင်းသယ်ယူပို့ဆောင်ရေးလုပ်ငန်းများ ထွန်းကား ၍ Yanka Port ၌ ကွန်တိန်နာကြီးများနှင့် ကုန်ပစ္စည်းအများအပြားကို မြစ်ကြောင်း အတိုင်းပို့ဆောင်ပေးလျက်ရှိသည်ကိုလည်း တွေ့မြင်ခဲ့ရသည်။ ချူလူမျိုးတို့၏ ယဉ် ကျေးမှုလက်ရာများကို စုစည်းဖော်ပြထားသည့် ဂျင်ဂျိုးမြို့ယဉ်ကျေးမှု အမွေအနှစ်ဌာန၊ Three Kingdoms ခေတ်ကတည်ထားခဲ့သည့် Longevity Pagoda စေတီတော်၊ သက်ကြီးပင်ပု (Bonsai) ဥယျာဉ်နှင့် သမင်ကောင်ရေ ၁၀၀၀ ခန့်ရှိသည့် သဘာ၀ ဘေးမဲ့ဥယျာဉ်တို့မှာ ဂျင်ဂျိုးမြို့နှင့် အနီးတစ်ဝိုက်တွင် လေ့လာစရာများပင်ဖြစ်ကြ သည်။ ရှေးဟောင်းမြို့ဖြစ်သည့်အပြင် ခေတ်မီမြို့ပြအဆောက်အအုံများဖြင့် ဖွံ့ဖြိုးတိုး တက်လာနေပြီး လေ့လာစရာများ များပြားလျက်ရှိရာ ဂျင်ဂျိုးမြို့သို့ ၂၀၁၅ ခုနှစ်က ပြည်တွင်းခရီးသည် ၂၆ သန်း နှင့် ပြည်ပခရီးသည် လေးသိန်းကျော်လာရောက်ခဲ့ကြ သည်ဟု မှတ်တမ်းများ၌ ဖော်ပြထားခြင်းမှာ စာရေးသူ၏ အမြင်အရ လွန်စွာဖြစ်နိုင်ခြေ ရှိပြီး အမှန်ပင်သွားရောက်လေ့လာစရာ မြို့တစ်မြို့လည်း ဖြစ်သည်ဟု စာရေးသူ ညွှန်း ဆိုချင်ပါတော့သည်။

 24-3-17jinjo

ဘန်ကောက်ကနေ နေ့ချင်းပြန်သွားလို့ရတဲ့ နေရာတွေ များစွာရှိပါတယ်။ အယုဒ္ဒယ၊ ပတ္တရားကမ်းခြေ၊ ဟွာဟင်းကမ်းခြေ၊ ကပ်ချနာပူရီစသဖြင့်ပေါ့။ ဒီနေရာတွေ ရောက်ဖူးပြီးသားပဲဖြစ်ဖြစ် တမူထူးခြားတဲ့ နေရာအသစ်အဆန်းလေးသွားလိုရင်ပဲ ဖြစ်ဖြစ် သွားသင့်တဲ့ နေရာလေးတစ်ခုကတော့ ခေါင်းရိုင်(Khao Yai) ပါ။ ခေါင်းရိုင်က ထိုင်းနိုင်ငံရဲ့ တတိယအကြီးဆုံးအမျိုးသားဥယျာဉ်ကြီး ဖြစ်ပြီး တောတွေ၊ တောင်တွေ၊ ရေတံခွန်တွေနဲ့ သဘာဝအတိုင်း သာယာလှပလှပါတယ်။ အနီးအနားရှိ စပျစ်ခင်းတွေ၊ နေကြာပန်းခင်းတွေက ခေါင်းရိုင်အလှကို ပိုကြွရွစေပါတယ်။ ပိုထူးခြားတာက ဘေးပတ်ဝန်းကျင်မှာ အီတလီနိုင်ငံက မြို့လေး၊ ရွာလေးတွေလိုပြင်ဆင်ထားတဲ့ နေရာလေးတွေရှိနေတာပါပဲ။
ခေါင်းရိုင်ကို ဘန်ကောက်ကနေ သွားရင် ၂နာရီကျော်ကျော်လောက်မောင်းရပါတယ်။ မနက်၇နာရီထွက်ရင် ၉နာရီကျော်ကျော်ရောက်ပါတယ်။ အဲ့မှာတစ်နေကုန်လည်ပြီး ညနေ၅နာရီလောက်ပြန်ထွက်ရင် ဘန်ကောက်ကို ၇နာရီကျော် ၈နာရီလောက်ပြန်ရောက်မှာပါ။ သွားမယ်ဆိုရင် ကားစင်းလုံးဌားသွားမှ အဆင်ပြေပါမယ်။ Public Transport နဲ့ သွားရင် ဟိုမှာ သွားလာရခက်ပါမယ်။ လူ၁ယောက် ၂ယောက်လောက်ပဲ သွားမှာဆိုရင် ဘန်ကောက်ကနေထွက်တဲ့ Day Tour package တွေ ဝယ်ပြီး သွားနိုင်ပါတယ်။
နေရာအစုံလည်း လည်ချင်တယ်။ အေးအေးဆေးဆေး နားနားနေနေသွားချင်တယ်ဆိုရင်တော့ တစ်ညအိပ်ပါ။ ကျွန်မသွားတုန်းကတော့ တစ်ညအိပ်ခဲ့ပါတယ်။ ဟိုတယ်တွေက Theme အမျိုးမျိုးနဲ့ ချစ်စရာလေးတွေပါ။ ဈေးလည်း သိပ်များပါဘူး။ ခေါင်းရိုင်ကို သွားလည်ကြတာ အဲ့ဒီက ဟိုတယ်တွေကြောင့်လည်းပါတယ်။ ဟိုတယ်တွေက Theme အမျိုးမျိုးနဲ့ အဆန်းလေးတွေလုပ်ထားတော့ ဟိုတယ်တွေကလည်း Tourist Attraction လို ဖြစ်နေပါတယ်။ ဟိုတယ်တွေက အာကာသယာဉ်ကြီးတွေလိုမျိုး၊ ဧရာမ မှိုပွင့်ကြီးတွေလိုမျိုး၊ ရဲတိုက်ကြီးလိုမျိုး၊ Lords of the Ring ကားထဲက Hobbit လူပုလေးတွေနေတဲ့ အိမ်ပုလေးတွေလိုမျိုး၊ သစ်ပင်အိမ်လိုမျိုး၊ အမေရိကန်ကောင်းဘွိုင်ရွာလိုမျိုး အဆန်းလေးတွေလုပ်ထားတာပါ။
ခေါင်းရိုင်မှာ ဥရောပ အငွေ့အသက်ရနိုင်တဲ့ နေရာတွေ အများကြီးရှိလို့နေပါတယ်။ အီတလီရောက်သွားသလို ခံစားရစေတာကတော့ Primo Piazza နဲ့ Palio Piazza ဆိုတဲ့ နေရာ၂ခုပါ။ Primo Piazza က ခေါင်းရိုင်မှာ မရောက်မဖြစ်ပေါ့။ ဂိတ်ထဲဝင်လိုက်တာနဲ့ အီတလီရွာလေးထဲ ရောက်သွားသလိုပါပဲ။ အဆောက်အအုံလေးတွေ၊ ကျောက်ခင်းလမ်းလေးတွေ လှမှလှ။ နောက်ပြီးရွာအငွေ့အသက်ရအောင် သိုးလေးတွေ မြည်းလေးတွေ ထားပေးထားတယ်။ မြက်လည်း အလကား ကျွေးလို့ရတယ်။ Palio Piazza ကိုတော့ အီတလီက Tuscany မြို့လေးကို ထိုင်းနိုင်ငံရွှေ့ထားတာလို့ တင်စားထားကြတယ်။ ဒီနေရာကတော့ ဈေးဆိုင်လေးတွေ၊ မုန့်ဆိုင်လေးတွေနဲ့ လေဟာပြင် Shopping Center သဘောမျိုးပါပဲ။ ဒါ့အပြင် ဂျာမနီရဲတိုက်ကြီးလို ဆောက်ထားတဲ့ ခမ်းနားထည်ဝါလှတဲ့ Mid Winter Garden စားသောက်ဆိုင်၊ လန်ဒန်နဲ့တူတဲ့ Thames Valley တို့လည်း ရှိပါသေးတယ်။
ခေါင်းရိုင်ဒေသရဲ့ ဆွဲဆောင်မှုနောက်တစ်ခုက ရေကစားကွင်းတွေ၊ စီးစရာတွေ အစုံရှိတဲ့ Scenic World ကစားကွင်းပါ။ တောတောင်နောက်ခံနဲ့ စိတ်လှုပ်ရှားပျော်ရွှင်ဖွယ်ရာ ကစားနည်းတွေကို ကစားနိုင်ကြမှာပါ။ ပန်းချစ်သူတို့အတွက် ဧက ၁၀၀ကျော်ကျယ်တဲ့ ခြံဝန်းကြီးထဲ ပန်းရောင်စုံတွေ စိုက်ထားတဲ့ The Bloom ဥယျာဉ်ကြီးကလည်း အရောင်အသွေးစုံစွာ လှပလှပါတယ်။ သူ့ရာသီချိန်ကျရင် Lavender ပန်းခင်းတောင်မြင်ရဦးမှာပါ။ ခေါင်းရိုင်က မျက်စိတစ်ဆုံးမြင်ရတဲ့ Saraburi နေကြာခင်းတွေကြောင့်လည်း ကျော်ကြားပါသေးတယ်။ ဒါပေမဲ့ ရာသီအချိန်မဟုတ်ရင်တော့ ပန်းခင်းတွေ သိပ်မလှတော့ပါဘူး။ စပျစ်ဝိုင်တွေ ထုတ်လုပ်ရာ စပျစ်ခြံလည်းရှိပါသေးတယ်။ PB Valley စပျစ်ခြံထဲ စပျစ်စိုက်ခင်းတွေ၊ ဝိုင်ချက်တဲ့ အခန်းတွေ၊ ဝိုင်တွေ သိုလှောင်တဲ့ အခန်းတွေတစ်ခန်းပြီး တစ်ခန်း လိုက်ရှင်းပြတာ စိတ်ဝင်စားစရာပါ။
နယ်မြို့လေးဖြစ်တဲ့အလျှောက် စိုက်ခင်းတွေ ပန်းခင်းတွေအပြင် သိုးခြံလေးတွေလည်း များစွာရှိလို့နေပါတယ်။ သိုးလေးတွေလွှတ်ထားတဲ့ ချစ်ဖို့ကောင်းတဲ့ A cup of Love၊ စိုက်ခင်းထဲက သီးပင်တွေ ကိုယ်တိုင်ခူးဆွတ်နိုင်တဲ့ Jim Thompson Farm၊ မှိုတွေကို စီးပွားဖြစ်စိုက်ပျိုးရာ Khao Yai Panorama Mushroom Farm နဲ့ အခြား Farm များစွာရှိလို့နေပါတယ်။ ခြုံပုတ်တွေနဲ့ ဝင်္ဂဘာလိုလုပ်ထားတဲ့ Pete Maze၊ ရှားပါးတိရစ္ဆာန်တွေ ပြသထားတဲ့ Exotic Zoo၊ ချောကလက်ကိုယ်တိုင်လုပ်နိုင်တဲ့ ချောကလက်အရောင်းဆိုင် Chocolate Factory တို့ကလည်း စိတ်ဝင်စားစရာပါ။ ခေါင်းရိုင်ဒေသက Wat Thep Phitak Punnaram Templeက တောင်စောင်းအလည်မှာ တည်ထားတဲ့ ဘုရားဆင်းတုကြီးဖြစ်လို့ ဟိုးအဝေးကြီးကနေတောင် ဖူးမြော်နိုင်ပါတယ်။ တောင်စိမ်းစိမ်းမှာ ဆင်းတုအဖြူက ဝင်းနေလို့ သပ္ပါယ်လှပါတယ်။ တကယ့်ကမ္ဘာကျော် Brand တွေကို စက်ရုံဈေးနဲ့ ရသလို Discount လည်း ထပ်လျှောပေးတဲ့ Factory Outlet မှာလည်း ဈေးဝယ်န်ိုင်ပါသေးတယ်။
ခေါင်းရိုင်ကို သွားမယ်ဆိုရင် သွားလို့အကောင်းဆုံးရာသီကတော့ နိုဝင်ဘာလကနေ ဖေဖော်ဝါရီလအထိပါ။ အဲ့အချိန် ရာသီဥတုအေးသလို ပန်းခင်းတွေ နေကြာခင်းတွေလည်း မျက်စိတစ်ဆုံး သာယာလှပါတယ်။ ကျန်တဲ့အချိန်တွေကတော့ ရာသီဥတုပူပါလိမ့်မယ်။ ထိုင်းနိုင်ငံ ဘန်ကောက်ရောက်တဲ့အခါ ဘန်ကောက်အနီးအနားနေရာတွေပါ သွားလည်မယ်ဆိုရင် ခေါင်းရိုင်ဟာလည်း သွားလည်လို့ရတဲ့ လည်စရာတွေစုံတဲ့နေရာတစ်ခု ဖြစ်ကြောင်း အသိပေးလိုက်ပါတယ်။

16-3--17kaoring

မကြာမီက ထိုင်ဝမ်ကျွန်း၊ တိုင်ပေမြို့တွင် ကျင်းပသည့် ၂၅ ကြိမ်မြောက် ထိုင်ဝမ် ၏ အရည်အသွေးသစ်အကောင်းဆုံးကုန်ပစ္စည်းသစ်များ ဆုချီးမြှင့်ပွဲ (2017 Taiwan Excellence  Award)အခမ်းအနားကို တက်ရောက်ရင်း ဆုရပစ္စည်းသစ်များထုတ်လုပ် ရာ ကုမ္ပဏီ၊ စက်ရုံအချို့သို့ သွားရောက်လေ့လာရန် ထိုင်ဝမ်၏တတိယမြို့တော်ဖြစ်သည့် ထိုင်ချွန်းမြို့(Taichung)သို့ စာရေးသူရောက်ခဲ့ပါသည်။
ထိုင်ဝမ်၏ အသေးစားနှင့်အလတ်စား စက်မှုပစ္စည်းများအဓိကထုတ်လုပ်သည့် စက်မှုမြို့တော်ဖြစ်သည့် ထိုင်ချွန်းမြို့သည် ထိုင်ဝမ်ကျွန်း၏ အလယ်ပိုင်းအနောက် ဘက် ကမ်းခြေအနီးတွင်တည်ရှိပြီး တိုင်ပေမြို့နှင့် ကောင်းရှုံမြို့(Kaohsiung)မြို့တို့ ပြီးလျှင် ထိုင်ဝမ်၏အကြီးဆုံးမြို့တစ်မြို့ဖြစ်သည်။ ကောင်းရှုံမြို့ကမူ အကြီးစားစက်မှု ပစ္စည်းများထုတ်လုပ်ရာဖြစ်သည်။ Made in Taiwan ဟု အမည်တွင်သည့် လျှပ်စစ်ပစ္စည်း၊ စက်ဘီး၊ ဆိုင်ကယ်၊ တူရိယာပစ္စည်း၊ လူသုံးကုန်ပစ္စည်း၊ ဖိနပ်၊ ကလေးကစားစရာ စသော အသေးစားနှင့်အလတ်စားစက်မှုထုတ်ကုန်ပစ္စည်းအများအပြားမှာ ထိုင်ချွန်းမြို့ တစ်ဝိုက်မှ အဓိကထုတ်လုပ်ခြင်းဖြစ်သည်။ တိုင်ပေမြို့မှ ၈၄ မိုင်အကွာတွင်ရှိသော ထိုင်ချွန်းမြို့သို့ မြန်နှုန်းမြင့်ရထားဖြင့်သွားခဲ့ရာ ၄၇ မိနစ်သာကြာမြင့်ပါသည်။ ယင်းမှ ကောင်းရှုံမြို့ သို့ဆက်သွားလျှင် ၄၅ မိနစ်ခန့်အကြာတွင်ရောက်နိုင်ကြောင်း သိရသည်။
ခေတ်မီအဆောက်အအုံအများအပြားရှိ၍ လူဦးရေ ၂ ဒသမ ၈ သန်းခန့်နေထိုင် လျက်ရှိသည့် ထိုင်ချွန်းမြို့တွင် အပြည် ပြည်ဆိုင်ရာလေဆိပ်ရှိ၍ ထိုင်ဝမ်၏ဒုတိယအကြီး ဆုံးပင်လယ်ဆိပ်ကမ်းလည်းရှိသည်။ Qing မင်းဆက်မှ ရှေးဟောင်းဘုရားကျောင်းများ၊ လူသိများသည့် ရေပူစမ်းများ၊ သာယာလှပသည့် အပန်းဖြေဥယျာဉ်များ၊ သဘာ၀အမျိုး သားဥယျာဉ်၊ ရုက္ခဗေဒဥယျာဉ်စသည်တို့ရှိ၍ ယင်းမြို့မှ ၅၆ မိုင်ခန့် အကွာတွင်ရှိသော ထိုင်ဝမ်၏ကျော်ကြားထင်ရှားလှသည့် နေလရေကန်ကြီး(Sun Moon Lake)သို့ ကား၊ ရထားဖြင့် အလွယ်တကူသွားရောက်လေ့လာနိုင်ပါသည်။
မြို့တွင်း၌ သမိုင်းဝင်မြို့တော်ခန်းမ၊ ထိုင်ဝမ်၏အာဇာနည်ဗိမာန်၊ ထူးခြားလှသည့် သဘာ၀သိပ္ပံဆိုင်ရာအမျိုးသားပြတိုက်၊ ပန်းချီကားအများအပြားရှိသော အနုပညာဆိုင် ရာ အမျိုးသားပြတိုက်၊ ကမ္ဘာ့ကုန်သွယ်မှုဗဟိုဌာနအဆောက်အအုံ၊ ဂျပန်ဗိသုကာလက် ရာဖြင့်တည်ဆောက်ထားသော ခေတ်မီဆန်းသစ်လှပသည့် မြို့မကဇာတ်ရုံကြီး၊ နိုင်ငံ တကာပြိုင်ပွဲများကျင်းပလေ့ရှိသော ဘေ့စ်ဘောအားကစားပြိုင်ကွင်း၊ Hayu Pier ငါးဈေးကြီးတို့သည် ထင်ရှားသော အဆောက်အအုံများဖြစ်ကြ၍ ပတ်ဝန်းကျင်စိမ်းလန်း စိုပြည်ရေးကိုအဓိကထားသည့်အနေဖြင့် သစ်ပင်နွယ်ပင်များဖြင့် စနစ်တကျစိုက်ပျိုးကာအလှဆင်ထားသည့် ကုန်တိုက်များကိုလည်း မြင်တွေ့ခဲ့ရသည်။ ထို့ပြင် စိတ်ဝင်စား စရာကောင်းလှသည့် ငလျင်ပြတိုက်လည်းရှိ၍ ၁၉၉၉ ခုနှစ်က ထိုင်ဝမ်ကျွန်းအလယ် ပိုင်းတွင်လှုပ်ခဲ့၍ လူ ၃၀၀၀ ခန့်အထိသေဆုံးစေခဲ့သည့်ငလျင်ဒဏ်ကြောင့် ပျက်စီးသွား ခဲ့သည့် စာသင်ကျောင်းနေရာတွင် တည်ဆောက်ထားခြင်းဖြစ်ကြောင်း သိရသည်။ သန်းခေါင်ကျော်အထိဖွင့်သည့် Zhong Xiao, Donghai, Zhong Hua နှင့် Fengjia ညဈေးတန်းအမည်ရှိ(Nitht Market)များလည်းရှိပြီး လာရောက်ကြည့် ရှုဝယ်ယူသူများဖြင့်လည်း စည်ကားလျက်ရှိသည်။ အထူးသဖြင့် Fengjia ညဈေးတန်း တွင် လမ်းတစ်လျှောက်ချိတ်ဆွဲထားသည့်မီးပုံများကြောင့် တမူထူးခြားလှပနေသည်ကို လည်း မြင်တွေ့ခဲ့ရပါသည်။
သာယာလှပသည့် သဘာ၀ရှုခင်းများနှင့်ဝန်းရံထား၍ ခေတ်မီဖွံ့ဖြိုးတိုးတက်သည့် အဆောက်အအုံများနှင့်အတူ စက်မှုစီးပွားလုပ်ငန်းများဖြင့်စည်ကားနေပြီး လေ့လာစရာနေရာများလည်းရှိကာ ထိုင်ဝမ်မြို့မှခဏအတွင်းရောက်ရှိနိုင်သဖြင့် ထိုင်ချွန်းမြို့မှာ ထိုင်ဝမ်သို့ရောက်သူတိုင်းသွားရောက်လေ့လာသင့်သည့် မြို့ကြီးတစ်မြို့ဟုပင် ညွှန်းဆို လိုက်ရပါတော့သည်။ 

8-3-17taichun

ကမ္ဘာပေါ်တွင် ခေတ်အဆက်ဆက်က တန်ဖိုးမဖြတ်နိုင်သည့် တရုတ်ရှေးဟောင်း ယဉ်ကျေးမှုအနုပညာလက်ရာများ၊ အသုံးအဆောင်ပစ္စည်းများ အများအပြားစုဆောင်း ထားရှိပြသထားသည့်နေရာမှာ ထိုင်ဝမ်ကျွန်း၊ တိုင်ပေမြို့ရှိ ထိုင်ဝမ်အမျိုးသားနန်းတော်ပြ တိုက်(National Palace Museum)ဖြစ်ပါသည်။ ၂၀၀၄ မှ ၂၀၀၉ ခုနှစ်အထိ ကမ္ဘာ့ အမြင့်ဆုံးအဆောက်အအုံဖြစ်ခဲ့ဖူးသည့် တိုင်ပေရှိ 101 Tower နှင့် ချန်ကေရှိတ်အမှတ်တရခန်းမကြီးအပါအဝင် လေ့လာသင့်သည့်နေရာများသို့ ယခင်က မိမိရောက်ခဲ့ သော်လည်း ကျန်ခဲ့သည့်ယင်းပြတိုက်ကို မကြာမီက ထိုင်ဝမ်သို့ စာရေးသူထပ်မံရောက် ရှိခဲ့စဉ် မဖြစ်မနေသွားရောက်လေ့လာခဲ့ပါသည်။
တရုတ်နိုင်ငံမြို့တော်ဘေဂျင်းမြို့ရှိ ကမ္ဘာကျော်တားမြစ်မြို့တော်(Forbidden City)တွင် ၁၉၂၅ ခုနှစ်က နန်းတော်ပြတိုက်(Palace Museum)အဖြစ် လွန်ခဲ့သည့် နှစ်ပေါင်း ၈၀၀၀ ခန့်မှစ၍ တရုတ်တို့၏ခေတ်အဆက်ဆက်၊ မင်းအဆက်ဆက်အသုံးပြု ခဲ့ကြသည့် နန်းတွင်းအသုံးအဆောင်များ၊ ဝတ်စုံများ၊ ရတနာပစ္စည်းများ၊ ငွေအကြွေ စေ့များ၊ လက်နက်များ၊ ပန်းချီ၊ ပန်းပုအနုပညာလက်ရာများစသည့် ပစ္စည်းမျိုးစုံကို စုဆောင်းထားခဲ့ကြသည်။ ဂျပန်တို့၏ကျူးကျော်မှုအရိပ်အယောင်သန်းလာချိန်တွင် ယင်းတို့၏ဖျက်ဆီးမှုမှကြိုတင်ကာကွယ်နိုင်ရန် ၁၉၃၃ ခုနှစ်တွင် ထိုပစ္စည်းများကို အနောက်တောင်ဘက်ဒေသများသို့ ရွှေ့ပြောင်းခဲ့ကြသည်။ ထို့နောက် တရုတ်နိုင်ငံတွင် အမျိုးသားရေးဝါဒီအစိုးရတပ်များနှင့် ကွန်မြူနစ်တို့၏တရုတ်ပြည်သူ့လွတ်မြောက်ရေး တပ်မတော်တို့ ပြည်တွင်းစစ်ဖြစ်ပွားခဲ့ပြီး ၁၉၄၈ ခုနှစ်အကုန်တွင် ယင်းပစ္စည်းများမှ အချို့ကို နန်ကျင်းမြို့ပြတိုက်တွင်ချန်ထား၍ အများစုကို ဘေဂျင်းမြို့နှင့် အချို့ကို ထိုင်ဝမ်ကျွန်းသို့ သင်္ဘောဖြင့်ပို့ဆောင်ခဲ့ကြောင်း သိရသည်။
မူလက ထိုင်ဝမ်ရှိ Taoyuan မြို့၊ ထိုမှတစ်ဆင့် Taichung မြို့နှင့် ယင်းနောက် တိုင်ပေ(Taipei)မြို့သို့ ယင်းပစ္စည်းများကို ရွှေ့ပြောင်းခဲ့ကာ ၁၉၆၅ ခုနှစ်တွင် အမျိုး သားနန်းတော်ပြတိုက်အဖြစ် ပြည်သူလူထုအားဖွင့်လှစ်ပြသခဲ့သည်။ ထို့နောက်ပစ္စည်း များကို ဆက်လက်စုဆောင်း၍ ပိုမိုခေတ်မီအောင်စုစည်းပြသခဲ့ရာ ယခုအခါစုစုပေါင်း ပစ္စည်းအရေအတွက် ၆၉၆၄၀၀ ကျော်ရှိ၍ ရွှေ၊ ငွေ၊ ကြေး၊ သံ၊ ကျောက်စိမ်း၊ ဆင်စွယ်၊ ကြွေထည်၊ ယွန်း ထည်၊ ပိုးထည်စသည်တို့ဖြင့် ပြုလုပ်ထားသည့် ပစ္စည်းမျိုးစုံဖြစ်ကြောင်း သိရသည်။ ထို့ပြင်ယင်း၏ ထိုင်ဝမ်တောင်ပိုင်းပြတိုက်ခွဲကို Taibao မြို့တွင် ၂၀၁၅ ခုနှစ်က ဖွင့်လှစ်ခဲ့၍ တရုတ်ယဉ်ကျေးမှုအနုပညာပစ္စည်းများအပြင် အာရှတိုက်၏ယဉ် ကျေးမှုဆိုင်ရာပစ္စည်းများကိုလည်း ထည့်သွင်းပြသထားခဲ့သည်။
တိုင်ပေရှိ ပြတိုက်ကြီးတွင် မုခ်၀၊ ယင်းမှ ပြတိုက်သို့ ကျယ်ဝန်းသည့်လျှောက်လမ်း ရင်ပြင်၊ ပင်မပြတိုက်ဆောင်ကြီး၊ အထူးပြပွဲများအတွက် အထူးပြခန်းဆောင်၊ စာ ကြည့်တိုက်၊ အစည်းအဝေးခန်းမ၊ စားသောက်ဆိုင်နှင့်ဥယျာဉ်များလည်းရှိ၍ နေ့စဉ် နံနက် ၈ နာရီခွဲမှ ညနေ ၆ နာရီခွဲအထိဖွင့်လှစ်ပြီး သောကြာနှင့်စနေနေ့များတွင် ည ၉ နာရီအထိ ဖွင့်လှစ်ထားပါသည်။ ပြသထားသည့်ပစ္စည်းများအနက် Qing မင်းဆက် ၏ မုန်လာထုပ်သဏ္ဌာန်ကျောက်စိမ်းရုပ်တုနှင့် မိုးတိမ်နှင့်နဂါးပုံများဖြင့် အလှဆင် ထွင်းထုထားသည့် ဘောလုံးသဏ္ဌာန်ဆင်စွယ်လုံးတို့မှာ အထူးထင်ရှား၍ လူအများ အပြားက တန်းစီစောင့်ဆိုင်းကာ စိတ်ဝင်စားစွာကြည့်ရှုနေကြသည်ကို မြင်တွေ့ခဲ့ ရသည်။ ဆင်စွယ်အတွင်း၌ အထပ်ပေါင်း ၁၇ ထပ်အထိ တစ်ခုနှင့်တစ်ခုထိမနေဘဲ လွတ်လပ်စွာလှည့်နိုင်အောင် ခက်ခက်ခဲခဲအနုစိပ်ထွင်းထုထားသည့် လက်ရာဖြစ်သဖြင့် လွန်စွာအံ့ဩဖွယ်ကောင်းလှပါသည်။
သမိုင်းကြောင်းအစဉ်အလာကြီးမားလှသည့် တရုတ်တို့၏ ခေတ်အဆက်ဆက်မှ ရှားပါးပစ္စည်းများကို အများအပြား စုဆောင်းထားပြီး စိတ်ဝင်စားဖွယ်ရာ အနုပညာလက် ရာများလည်းပြသထားသောကြောင့် ပြည်တွင်းပြည်ပခရီးသည်များစွာ လာရောက် ကြည့်ရှုလျက်ရှိရာ ယခင်နှစ်က လူခြောက်သန်းကျော်ပင် လာရောက်ကြည့်ရှုခဲ့ခြင်းမှာ မထူးဆန်းလှဟုပင် ဆိုရပေတော့မည်။

1-3-17taipei1

 

More Articles ...