ဆယ်ယူရရှိခဲ့ပြီးဖြစ်သည့် တပ်မတော် သယ်ယူပို့ဆောင်ရေး Y-8 လေယာဉ်အ မြီးပိုင်းတွင် FDR – Flight Data Recorder (Black Box) နှင့် CVR – Cockpit Voice Recorder တို့ပါ ရှိပြီး လေယာဉ်ပျက်ကျရသည့် အကြောင်း ရင်းကို ဖော်ထုတ်နိုင်ရေးအတွက် Aircraft Accident Investigation Procedures အတိုင်း စုံစမ်းစစ်ဆေးမှု များကို နိုင်ငံတကာသတ်မှတ်ချက်များနှင့် အညီ ဆက်လက်ဆောင်ရွက်သွားမည် ဖြစ်ကြောင်း တပ်မတော်ကာကွယ်ရေးဦးစီးချုပ်ရုံးက ဇွန်လ ၁၉ ရက် ညနေပိုင်းတွင် သတင်းထုတ်ပြန်လိုက်သည်။ “ဒီဟာ လွယ်လွယ်ကူကူကိစ္စမဟုတ်ဘူး။ လွယ်လွယ်ကူကူနဲ့ ဖော်ထုတ်လို့ရတဲ့ ကိစ္စမဟုတ်ဘူး။ နည်းပညာအရ လွယ် လွယ်ကူကူဖော်ပြလို့မရဘူး။ ပြီးသွားရင် သူ့လုပ်နည်း အဆင့်ဆင့်တွေ ရှိပါတယ်၊ နိုင်ငံတကာမှာလည်း ဒီအတိုင်းပါပဲ’’ ဟု ပြည်သူ့ဆက်ဆံရေးနှင့် စိတ်ဓာတ်စစ် ဆင်ရေး ညွှန်ကြားရေးမှူးရုံး ညွှန်ကြား ရေးမှူး ဗိုလ်ချုပ်အောင်ရဲဝင်းက ပြည်မြန်မာသတင်းဂျာနယ်ကို ပြောသည်။

ပင်လယ်ပြင်အတွင်းပျက်ကျခဲ့သည့် တပ်မတော်သယ်ယူပို့ဆောင်ရေး Y-8 လေယာဉ်၏ လေယာဉ်အမှတ်၊ ၅၈၂၀ အမှတ်အသားပါ လေယာဉ်အမြီးပိုင်းကို ပြီးခဲ့သည့် ဇွန် ၁၈ ရက် ညနေ ၃ နာရီခွဲ တွင် မတင်ဆယ်ယူရရှိခဲ့ပြီး ကျန်အစိတ် အပိုင်းများအားရရှိရေးအတွက် တပ်မ တော်(ရေ)မှ စစ်ရေယာဉ်များ၊ ဒေသခံငါး ဖမ်းစက်လှေများ၊ ကျွမ်းကျင်ရေငုပ်စစ် သည်များပူးပေါင်း၍ ဆက်လက်ဆောင် ရွက်လျက်ရှိကြောင်းလည်း အဆိုပါ ထုတ် ပြန်ချက်အရ သိရသည်။


Aircraft Investigation Team သည်လေယာဉ်ပျက်မှ Black Box အား လက်ခံရရှိပြီဆိုပါက သေချာထုပ်ပိုး၍ ချိတ်ပိတ်သိမ်းဆည်းရပြီး ထို Black Box ကို Investigation ပြုလုပ်ပေးနိုင်မည့် နိုင်ငံ၊ အဖွဲ့အစည်း၊ ကုမ္ပဏီကို ရှာဖွေရကြောင်း၊ လေယာဉ်ထုတ်လုပ်သည့်အဖွဲ့အစည်းတိုင်း Black Box ကို Investigation မလုပ်နိုင်ကြောင်း၊ အဆို ပါအဖွဲ့အစည်းနှင့် ဆက်သွယ်မိပြီဆိုလျှင် ဖြစ်ခဲ့သော Aircraft Type ကိုဖော်ပြ၍ Investigation လုပ်ပေးနိုင်၊ မနိုင် ဆက် သွယ်အကြောင်းကြားရကြောင်း၊ ဆောင် ရွက်ပေးနိုင်ကြောင်း ပြန်ကြားလာလျှင် ထိုနိုင်ငံ၊ ထိုအဖွဲ့အစည်းထံ Black Box ကို ပို့ရန်ပြင်ဆင်ရကြောင်း လေယာဉ် မှူးကြီး ဦးသိန်းဇော်က ၎င်း၏ Facebookု လူမှုကွန်ရက်စာမျက်နှာတွင် မျှဝေ ရေးသားထားသည်။
CVR၊ FDR Result များကို စိတ်တိုင်းကျ Investigation ပြုလုပ်ပြီးသော အခါ တွေ့ခဲ့ရသမျှအား Discussion ပြုလုပ်၍ Black Box Investigation ၏ ပဏာမအစီရင်ခံစာအား မိမိတို့အား ထုတ်ပေးကြောင်း၊ ယင်းအဆင့်အထိ ရက်သတ္တပတ်တစ်ပတ်မျှ ကြာမြင့် ကြောင်း၊ အသေးစိတ်အစီရင်ခံစာအား ၎င်းတို့မှ ဆက်လက်၍ပေးပို့ကြောင်း၊ Black Box Investigation သည် တာဝန်ယူလုပ်ဆောင်ပေးသော ပြည်ပအ ဖွဲ့အစည်းကသော်လည်းကောင်း၊ သက် ဆိုင်ရာ Aircraft Accident Investigation Team ကသော်လည်းကောင်း မရိုးမဖြောင့် ပြုလုပ်၍မရ ကြောင်းလည်း ၎င်း၏အတွေ့အကြုံကို အခြေခံ၍ ရေးသားထားသည်။


CVR – Cockpit Voice Recorder သည် လေယာဉ်မှူးနှစ်ဦး၊ လေယာဉ် အင်ဂျင်နီယာ၊ အချက်ပြဆက်သွယ်ရေးတစ်ဦး စသည်တို့အပါအဝင် ငါးဦး၏အသံများကို ဖမ်းထားခြင်း ဖြစ်ပြီး Black Box တွင်ပါသော Flight Data ဆိုသည်မှာ လေယာဉ်ပျံ စတင်ပျံ သန်းစဉ်ကပင် ပျံသန်းနှုန်း၊ အမြင့်ပေ စသည်တို့ကို မှတ်တမ်းတင်ထားခြင်းဖြစ် ကြောင်း အဆိုပါ အချက်အလက်များကို စစ်ဆေးပြီးမှ အထူးပြုလုပ်ချက်ဖြင့် ပုံဖော်၍ လေယာဉ်ပျက်ကျသည်အထိ အခြေအနေမှတ်တမ်းကို ပြန်လည်တည် ဆောက်ရခြင်းဖြစ်ကြောင်း တပ်မတော် (လေ) မှ လေယာဉ်မှူးဟောင်းတစ်ဦးက ရှင်းပြသည်။ “Black Box ကို စစ်ဆေးဖို့က ကြာတာပေါ့။ တစ်လ လောက်ကြာမယ်ဆိုရင်တောင် မြန် တာပေါ့” ဟု ၎င်းက ဆိုသည်။
Y-8 လေယာဉ်သည် ပြီးခဲ့သည့် ဇွန် လ ၇ ရက်မွန်းလွဲပိုင်းတွင် အဆက်အသွယ် ပြတ်တောက်သွားခဲ့ခြင်းဖြစ်ပြီး ဇွန် လ ၈ ရက် နံနက်ပိုင်း ၈ နာရီ ၁၈ မိနစ်အချိန် တွင် တာယာကွင်းတစ်ခု၊ အမျိုးသားရုပ် အလောင်းတစ်လောင်း၊ အမျိုးသမီးရုပ်အ လောင်းတစ်လောင်း၊ ကလေးရုပ်အလောင်းတစ်လောင်းနှင့် အသက်ကယ်အင်္ကျီ နှစ် ထည်၊ အဝတ်အစားထည့်သည့်အိတ်အ ချို့ကို ကျောက်နီမော်၏ အနောက်ဘက် ၁၄ မိုင်၊ လောင်းလုံမြို့၏ အနောက်တောင် ဘက် ၂၂ မိုင်အကွာ ပင်လယ်ပြင်အတွင်း စတင်ရှာဖွေတွေ့ရှိခဲ့ခြင်းဖြစ်သည်။


ယခုလေယာဉ်အမြီးပိုင်းကို ဆယ်ယူ ပြီးသည့်အချိန်ထိ ယင်းနှင့်အတူ အမျိုး သားရုပ်အလောင်း တစ်လောင်းအား ထပ် မံရှာဖွေတွေ့ရှိခဲ့သောကြောင့် စုစုပေါင်း ၉၂ လောင်းတွေ့ရှိသဂြိုဟ်ပြီးဖြစ်ကြောင်း တပ်မတော်ကာကွယ်ရေးဦးစီးချုပ်ရုံး၏သတင်းထုတ်ပြန်ချက်များအရ သိရသည်။ Air Bagan လေကြောင်းလိုင်းမှ ရန်ကုန်-မန္တလေး-ဟဲဟိုး ခရီးစဉ်အတိုင်း ပျံသန်းသည့် ဖော်ကာ F-100 အမျိုးအ စား လေယာဉ်အမှတ် XY-AGC (ခရီးစဉ် အမှတ် ၀၁၁)လေယာဉ်သည် ဟဲဟိုးလေ ဆိပ်သို့ဆင်းသက်စဉ် မတော်တဆမှုဖြစ် ပွားခဲ့ကာ လေယာဉ်ပေါ်ပါ ဧည့်လမ်းညွှန် အမျိုးသမီးတစ်ဦးနှင့် မြေပြင်ရှိ ဆိုင်ကယ် မောင်းသူတစ်ဦးတို့ သေဆုံးခဲ့သည့်ဖြစ်စဉ် တစ်ခု လွန်ခဲ့သော ၂၀၁၂ ခုနှစ်၊ ဒီဇင်ဘာ လ ၂၅ ရက်က ဖြစ်ပွားခဲ့သေးသည်။

ယင်းနောက် ၂၀၁၃ ခုနှစ် ဇန်နဝါရီ လ ၂၈ ရက်တွင် အဆိုပါ လေယာဉ်ပျက်ကျ ရာမှရှာဖွေတွေ့ရှိခဲ့သည့် Black Box အား အထူးစုံစမ်းစစ်ဆေးရေး ကော်မရှင် အား ဖွဲ့စည်း၍ ဩစတြေးလျနိုင်ငံ၊ ကင်ဘာရာမြို့တွင် သွားရောက်စစ်ဆေးခဲ့ကြရခြင်းဖြစ်ပြီး အစီရင်ခံစာထုတ်ပြန်ရန် အချိန်တစ်နှစ်ကျော် ကြာမြင့်ခဲ့ကြောင်း သိရသည်။
ထက်အောင်ဖြိုး  (ဓာတ်ပုံ - တပ်မတော်ကာကွယ်ရေးဦးစီးချုပ်ရုံး (FB))

 

 

ရောမအင်ပါယာကြီးထွန်းကားခဲ့ရာ အီတလီနိုင်ငံ ရောမမြို့ကြီးက ဘုန်းမီးနေလ တောက်ခဲ့စဉ် ဆောက်လုပ်ခဲ့တဲ့ ရှေးဟောင်းအဆောက်အအုံတွေနဲ့ ထူးခြားနေပါတယ်။ ရောမမြို့ထဲမှာ နိုင်ငံတစ်နိုင်ငံပါရှိနေတယ်ဆို ပိုပြီးထူးဆန်းမနေဘူးလား။ ဟုတ် ပါတယ်။ ရောမမြို့ထဲမှာ ကမ္ဘာ့အသေးဆုံးနိုင်ငံဖြစ်တဲ့ ဗာတီကန်စီးတီး(Vartican City) နိုင်ငံတည်ရှိလို့နေပါတယ်။ ဗာတီကန်နိုင်ငံဟာ ဘယ်လောက်များသေးလဲဆိုရင် အကျယ် အဝန်းအားဖြင့် ၁၁၀ ဧကသာကျယ်ဝန်းပါတယ်။ ရန်ကုန်မြို့နဲ့ယှဉ်ရင်တောင် အဆ ပေါင်း ၁၃၀၀ ကျော်သေးငယ်ပါတယ်။ ပန်းခြံကြီးတစ်ခု၊ အိမ်ရာစီမံကိန်းတစ်ခုစာ လောက်ပဲကျယ်တာပါ။ ရောမမြို့နဲ့နှစ်မိုင်ကျော် နယ်နိမိတ်ထိစပ်နေတယ်လို့ ပြောရမှာ ဖြစ်ပြီး နယ်နိမိတ်အများစုကို တံတိုင်းတွေကာထားပါတယ်။
ကမ္ဘာပေါ်မှာ အကြီးဆုံးနိုင်ငံသုံးနိုင်ငံက ရုရှား၊ ကနေဒါနဲ့ အမေရိကန်ပြည်ထောင် စုတို့ဖြစ်ကြပြီး အသေးဆုံးနိုင်ငံသုံးနိုင်ငံကတော့ ဗာတီကန်စီးတီး၊ မိုနာကိုနဲ့ ဩစတြေး လျတိုက်နားရှိ Nauru ကျွန်းနိုင်ငံတို့ပဲဖြစ်ပါတယ်။ ဒုတိယအသေးဆုံးနိုင်ငံ မိုနာကို အကြောင်းကိုတော့ ပြည်မြန်မာဂျာနယ်မှာ ရေးသားဖော်ပြပြီးပြီ ဖြစ်ပါတယ်။ ဗာတီကန် ကတော့ ၁၉၂၉ ခုနှစ်မှစတင်ကာ မြို့နိုင်ငံအဖြစ်စတင် သတ်မှတ်ခဲ့တဲ့နိုင်ငံဖြစ်ပြီး မြို့နဲ့ နိုင်ငံ တစ်ခုတည်းဖြစ်တဲ့ City-State ဖြစ်တာကြောင့် စင်္ကာပူတို့ မိုနာကိုတို့လိုပဲ မြို့ ဆိုပြီး သီးသန့်ရှိမနေပါဘူး။ ဗာတီကန်နိုင်ငံကို ၂၀၁၀ ခုနှစ်က စာရေးသူရဲ့ ဥရောပ ခရီးစဉ်ထဲမှာ ရောမမြို့သို့သွားရင်း သွားရောက်လေ့လာဖြစ်ခဲ့ပါတယ်။


နိုင်ငံက အသေးငယ်ဆုံးဖြစ်သလို လူဦးရေလည်း အနည်းဆုံးနိုင်ငံပါ။ လူဦးရေ စုစုပေါင်း ၁၀၀၀ တောင်မပြည့်ပါဘူး။ လူမျိုးအများစုက အီတလီလူမျိုးတွေဖြစ်လို့ အီတလီဘာသာစကားကိုသာ ပြောကြပါတယ်။ ဗာတီကန်နိုင်ငံတွင်းမှာ ဆေးရုံမရှိလို့ နိုင်ငံတွင်းမွေးဖွားတဲ့သူမရှိပါ။ နိုင်ငံထဲ နေထိုင်အလုပ်လုပ်ကိုင်သူတွေကိုသာ နိုင်ငံသား ပေးထားတာပဲဖြစ်ပါတယ်။ ဗာတီကန်ဟာ အီတလီနိုင်ငံတွင်းမှာရှိနေပေမဲ့ ဆွစ်ဇာလန် နိုင်ငံသားတွေကို အစောင့်တွေအဖြစ် ငှားရမ်းကာ တပ်ဖွဲ့ထားပါတယ်။ ကောင်းမွန်စွာ လေ့ကျင့်ထားပြီး အရည်အသွေးမြင့်မားတဲ့ အသက် ၁၉ နှစ်ကနေ ၃၀ အတွင်း အရပ် ၅ ပေ ၈ လက်မခွဲထက်အမြင့်ရှိတဲ့ ဆွစ်ဇာလန်လူမျိုး လူပျိုလူလွတ်တွေကိုသာ ရွေးချယ် ခန့်ထားတာကြောင့် ဗာတီကန်နိုင်ငံရဲ့ တပ်ကသေးငယ်ပေမဲ့ အထင်သေးလို့မရပါဘူး။
ဗာတီကန်နိုင်ငံဟာ သေးငယ်ပေမဲ့ ကိုယ်ပိုင်စာတိုက်နဲ့ ကိုယ်ပိုင်တံဆိပ်ခေါင်းရှိပြီး ဗာတီကန်စာပို့စနစ်က အီတလီထက်တောင်ပိုကောင်းပိုမြန်တယ်လို့ သိရပါတယ်။ ကိုယ်ပိုင်ရေဒီယိုအသံလွင့်ဌာနရှိကာ ကမ္ဘာအနှံ့အပြားသို့ ဘာသာစကားပေါင်း၂၀ ခု ဖြင့် ထုတ်လွှင့်လျှက်ရှိပါတယ်။ နိုင်ငံတော်အလံ၊ နိုင်ငံတော်သီချင်း၊ နိုင်ငံကူးလက်မှတ်၊ ငွေသားတို့လည်း ကိုယ်ပိုင်ရှိပါတယ်။


အသေးဆုံးတွေပိုင်ဆိုင်ထားတဲ့ ဗာတီကန်မှာ အကြီးဆုံးတွေလည်းရှိပါတယ်။ ဒါကတော့ ကမ္ဘာ့အကြီးဆုံးနက္ခတာရာကြည့်မှန်ပြောင်းကြီးကို ပိုင်ဆိုင်ထားတာပါ။ ဒါ ပေမဲ့ ဗာတီကန်စီးတီးနိုင်ငံတွင်းမှာ မဟုတ်ဘဲ အမေရိကန်ပြည်ထောင်စုနိုင်ငံ အရီဇိုး နားပြည်နယ်ထဲ ထားရှိထားတာပဲဖြစ်ပါတယ်။ ကမ္ဘာ့အကြီးဆုံး ခရစ်ယာန်ဘုရားရှိခိုး ကျောင်း စိန့်ပီတာဘုရားကျောင်းကြီးလည်း နိုင်ငံတွင်းရှိလို့နေပါတယ်။ ခရစ်ယာန်ဘာ သာဝင်အတွက် အမွန်မြတ်ထားရာ ဘုရားကျောင်းကြီးဖြစ်ပြီး လက်ရာမြောက်လှတဲ့ အနုစိတ်ဗိသုကာလက်ရာများကြောင့်လည်း ကမ္ဘာမှာကျော်ကြားလှပါတယ်။ နဂိုရှိပြီး သား ဘုရားကျောင်းအုတ်မြစ်ကိုအခြေခံပြီး အသစ်တည်ဆောက်တာ နှစ်ပေါင်း ၁၂၀ တိုင်ကြာသွားတယ်လို့သိရပါတယ်။ ပန်းရန်၊ ပန်းပု၊ ပန်းချီ၊ မှန်စီစတဲ့ အသေးစိတ်အလှ ဆင်တာက နောက်ထပ်နှစ်ပေါင်း ၂၀၀ ကြာသွားပါတယ်တဲ့။ အခန်းပေါင်းထောင်ကျော် ရှိပြီး အဆောက်အအုံတစ်ခုနဲ့တစ်ခုဆက်နေတဲ့ ဗာတီကန်နန်းတော်ကြီးတွေလည်းရှိ ပါတယ်။နန်းတော်တွေရှိပေမဲ့ ဘုရင်တော့ မရှိပါဘူး။ ပုပ်ရဟန်းမင်းကြီးလက်အောက် သက်ဦးဆံပိုင်စနစ်နဲ့အုပ်ချုပ်တဲ့နိုင်ငံဖြစ်ပါတယ်။


သေးငယ်လှတဲ့နိုင်ငံလေးမှာ ဝင်ငွေကတော့ ပြတိုက်ဝင်ကြေးနဲ့ တံဆိပ်ခေါင်း ရောင်းရာကနေ အဓိကရပါတယ်။ တစ်နှစ်ကို ဧည့်သည် ၅ သန်းလောက်လာလို့ နိုင်ငံတွင်း အမြဲလူပြည့်နေတတ်တယ်။ ဘုရားကျောင်းထဲ၊ ပြတိုက်ထဲ ဝင်ကြည့်ချင်ပါက အကြာကြီးတန်းစီရပါတယ်။ ဗာတီကန်ပြတိုက်တွေ အနှံ့သာသွားကြည့်မယ်ဆိုရင် ၉ မိုင်အရှည်ရှိလို့ ပန်းချီကားတစ်ချပ်ကို တစ်မိနစ်သာခံစားမယ်ဆိုရင်တောင် ပန်းချီကား အကုန်လုံးကို ခံစားကြည့်ရှုဖို့ လေးနှစ်လောက်အချိန်ယူရမယ်လို့ဆိုပါတယ်။ ဗာတီကန်စာကြည့်တိုက်နဲ့ Sistine Chapel ရှိ စတုရန်းပေပေါင်း ၆၀၀၀ကျော်ရှိ မိုင်ကယ်အန်ဂျလိုလက်ရာ မျက်နှာကျက်ပန်းချီ ကားကြီးကလည်း အနုစိတ်ကာ လက် ရာမြောက်လွန်းသဖြင့်ကျော်ကြားလှပါတယ်။ အနုပညာလက်ရာမြောက်တဲ့ အဆောက် အအုံတွေ၊ သမိုင်းအရ၊ ဘာသာရေးအရအရေးပါတဲ့နေရာနဲ့ အဆောက်အအုံ တွေများ စွာရှိလို့ UNESCO အသိအမှတ်ပြုသမိုင်းဝင်နေရာအဖြစ် တစ်နိုင်ငံလုံး အသိအမှတ် ပြုခံရတဲ့ တစ်ခုတည်းသောနိုင်ငံလည်း ဖြစ်လို့နေပါတယ်။

ဥရောပနိုင်ငံတွေထဲ လှပတဲ့နိုင်ငံတစ်ခုအဖြစ်ကမ္ဘာကျော်တဲ့ ပြင်သစ်နိုင်ငံမှာ မြို့ တော်ပဲရစ်အပြင် အခြားလှပတဲ့မြို့တွေအများကြီးရှိနေပါတယ်။ အဲ့ဒီမြို့တွေထဲ အရှေ့ တောင်ဘက်ကမ်းရိုးတန်းမှာရှိတဲ့ နိ(စ်)(Nice)လို့ခေါ်တဲ့ ကမ်းခြေမြို့လေးက တစ်မြို့ အပါအဝင်ပဲပေါ့။ ပြင်သစ်နိုင်ငံ အရှေ့တောင်ဘက်ရှိ မြေထဲပင်လယ်ကမ်းရိုးတန်းတလျှောက်ကို French Riviera လို့ခေါ်ပြီး ကမ်းရိုးတန်းတလျှောက်မှာ ကမ္ဘာ့ဒုတိယ အသေးဆုံးနိုင်ငံ မိုနာကိုနဲ့ နိ(စ်)မြို့အပါအဝင် မြို့တွေရွာတွေဟာ ကပ်လျက်တည်ရှိနေ ပါတယ်။


နိ(စ်)မြို့က ပြင်သစ်နိုင်ငံရဲ့အပန်းဖြေကမ်းခြေစခန်းမြို့ဖြစ်ပြီး သာယာလှပတဲ့ ရှုခင်း တွေကြောင့် ကမ္ဘာလှည့်ခရီးသည်တွေကြားရေပန်းစားပါတယ်။ တောင်တန်းတွေနဲ့ မြေထဲပင်လယ်ကြားတည်ရှိပြီး အီတလီနိုင်ငံ၊ မိုနာကိုနိုင်ငံတို့နဲ့ ကပ်လျှက်တည်ရှိနေတာ သူ့ရဲ့ထူးခြားချက်ပါ။ မျှတတဲ့ရာသီဥတု၊ ကြည်သန့်နေတဲ့ စိမ်းပြာရောင်ပင်လယ်ရေနဲ့ ကမ်း ခြေတွေ၊ ကမ်းခြေတစ်လျှောက် လှပတဲ့အဆောက်အအုံတွေကလည်း မြို့အလှကို ပိုတိုးစေပါတယ်။ ဒါကြောင့်လည်း ဧည့်သည်တွေ တစ်နှစ်ကို ၄ သန်းလာရောက် လည် ပတ်လျှက်ရှိပါတယ်။ အထူးသဖြင့် ရာသီဥတုအေးမြတဲ့ ဆောင်းတွင်းကာလတွေမှာ ရာသီဥတုသာယာတဲ့ နိ(စ်)မြို့လေးဆီ လာရောက်လေ့ရှိကြပါတယ်။


နိ(စ်)မြို့ကို ခရီးသွားတွေမျက်စိကျတာ အခုခေတ်မှ မဟုတ်ပါဘူး။ ရှေးနှစ်ပေါင်း ၄ သိန်း လောက်ကတည်းက ခရီးသည်တွေ ခဏတာလာရောက်ရာနေရာဖြစ်နေပါတယ် တဲ့။ ကျောက်ခေတ်ကဆိုတော့ ကျောက်ခေတ်လူသားတွေ ဒီနေရာမှာတွေ့ရတတ်တဲ့ ကျောက်ခေတ်သားမွှေးရှည်ဆင်ကြီးတွေကို တစ်နှစ်တစ်ခါလာရောက်အမဲလိုက်လေ့ ရှိတာကြောင့်ပါ။ နိ(စ်)မြို့ဆိပ်ကမ်းနားက တောင်ပေါ်မှာ ဒီအထောက်အထားတွေကို ရှေး ဟောင်းသုတေသီတွေရှာဖွေတွေ့ရှိခဲ့တာဖြစ်ပြီး အခုအခါ ထိုနေရာကို ပြတိုက်အဖြစ် ပြသထားပါတယ်။ ရောမအင်ပါယာကြီးစိုးခဲ့စဉ်အချိန်ကလည်း နိ(စ်)မြို့လေးဟာ အ ပန်းဖြေမြို့ဖြစ်ခဲ့ပါသေးတယ်။ ထိုအချိန်တုန်းက ကမ်းခြေမှာ မြို့မတည်သေးဘဲ ကမ်း ခြေမြင်ရတဲ့တောင် ပေါ်မှာမြို့တည်ထားတာမို့လို့ အခုအခါမှာ ပျက်စီးနေပြီဖြစ်တဲ့ ရောမ ခေတ်က ရေစိမ်ကန်ရယ်၊ သားသတ်ကွင်းရယ်၊ ဘုန်းကြီးကျောင်းရယ်၊ နှစ် ၅၀၀ သက် တမ်းရှိ သံလွင်တန်းရယ်ကို တောင်ပေါ်မှာ အခုချိန်ထိတွေ့မြင်နိုင်ပါတယ်။


နိ(စ်)မြို့က အရင်က အီတလီမြို့ဖြစ်ပြီး ၁၈၆၀ ခုနှစ်မှ ပြင်သစ်နိုင်ငံအောက်ရောက် ခဲ့တာပါ။ အီတလီကို ဩစတြီးယားက ဝင်တိုက်ခိုက်ရာမှာ အီတလီဘက်က ဝိုင်းခုခံ ပေးလို့ ကျေးဇူးတင်တဲ့အနေနဲ့ ပြင်သစ်ကိုပေးခဲ့တာလို့ သိရပါတယ်။ အီတလီလက် အောက်မှာရှိတုန်းက Nizza လို့ခေါ်ခဲ့ကြပြီး အဲ့ဒီကာလမတိုင်မီ နှစ် 500 BC အတွင်း ဂရိ အင်ပါယာကြီးစိုးခဲ့စဉ်က Nike လို့ခေါ်ခဲ့ကြတာပါ။ Nike ဆိုတာ ဂရိလို အောင်မြင် ခြင်းလို့အဓိပ္ပါယ်ရပါတယ်။ အခုအခါမှာတော့ နိ(စ်)ကို ပြင်သစ်လို ချစ်စနိုးနဲ့ Nice la Belle နိစ်အလှလေးလို့လည်း ခေါ်ကြပါတယ်။


ပြင်သစ်တွေ အမွှန်းတင်သလို နိ(စ်)မြို့ကလည်း တကယ်လှပါတယ်။ ကျောက် စရစ်ခဲတွေ ပြည့်နေတဲ့ သောင်ပြင်တွေပေါ် တစ်ချက်ချက်လှိုင်းပုတ်တိုင်းရိုက်ခတ်လာ တဲ့ စိမ်းပြာရောင်ပင်လယ်ရေတွေက ရှုမငြီးစရာပါ။ ကျွန်မတို့ရောက်ခဲ့တုန်းက ဧပြီလ နွေဦးရာသီမို့ ရာသီဥတုနည်းနည်းအေးစိမ့်စိမ့်ရှိလို့ ကမ်းခြေတွေမှာ လူသိပ်မများပေမဲ့ မြို့ ထဲလမ်းမတွေမှာတော့ ဧည့်သည်တွေနဲ့ စည်ကားလှပါတယ်။ နိ(စ်)မြို့ရိုးရာ Carnival ပွဲတော်ကျင်းပချိန်မှာဆို တိုးမပေါက်အောင် စည်ကားလှတယ်လို့ သိရပါတယ်။ ကမ်း ခြေတလျှောက်အပြင် မြို့ဟောင်း၊ ရဲတိုက်ကြီးရှိရာတောင်ကုန်း၊ ဆိပ်ကမ်း၊ ရုရှားဘုရား ကျောင်းနဲ့ ပြတိုက်တွေကိုပါ သွားရောက်လည်ပတ်လေ့ရှိကြပါတယ်။ နိ(စ်)မြို့ကိုလည် ရင်း အနီးအနားက မိုနာကိုနိုင်ငံ၊ ကန်းရုပ်ရှင်ပွဲတော်ကျင်းပရာ ကန်းမြို့ (Cannes) နဲ့ အခြားတောင်ပေါ်ရွာတွေဆီပါ တဆက်တည်း သွားရောက်လည်ပတ်လို့လည်း ရပါ တယ်။ မြို့ပြနဲ့ ရှေးဟောင်းအမွေအနှစ်၊ သဘာ၀အလှနဲ့ လူလုပ်အနုပညာပေါင်းဆုံရာ နိ(စ်)မြို့လေးဟာ လာရောက်လည်ပတ်သူတိုင်းကိုကျေနပ်စေနိုင်မှာ အမှန်ပါပဲ။ 

 

ဥရောပအလယ်ပိုင်း ကုန်းတွင်းပိတ်နိုင်ငံတစ်ခုဖြစ်တဲ့ ဩစတြီးယား (Austria) နိုင်ငံရဲ့ မြို့တော်ဗီယာနာကို ဂီတမြို့တော်လို့ အသိများပါတယ်။ ဘာကြောင့်လည်းဆို တော့ အခြားမြို့တွေထက်စာရင် ဗီယာနာမှာ နာမည်ကျော်ဂီတပညာရှင်တွေ နေထိုင် ခဲ့ကြလို့ပါ။ ဂီတသမိုင်းတလျှောက် နာမည်အကျော်ကြားဆုံး ဂန္ထဝင်ဂီတပညာရှင် ၁၀ ယောက်မှာ ၄ ယောက်က ဗီယာနာမြို့မှာ နေထိုင်ခဲ့ကြပါတယ်။ မိုးဇက်၊ ဗီသိုဗင်၊ ဂျိုး ဇက်ဟေဒန်၊ ဖရန့်ဇ်ရှုဘတ်ဇ်စတဲ့ဂီတပညာရှင်တွေဟာ ရှေးကတည်းက ဩဇာကြီးခဲ့တဲ့ ဗီယာနာမြို့မှာ အလုပ်လုပ်ရင်း ကမ္ဘာ့ဂန္ထဝင်သီချင်းကြီးတွေကို ရေးစပ်နိုင်ခဲ့ပါတယ်။ ဗီယာနာမြို့ဖွား ကမ္ဘာကျော်တစ်ယောက်ရှိပါသေးတယ်။ အိပ်မက်တွေအကြောင်းထဲထဲ ဝင်ဝင်လေ့လာခဲ့တဲ့၊ စိတ်စိစစ်မှုကို စတင်ဖော်ဆောင်ပေးခဲ့တဲ့ ဦးနှောက်နှင့်အာရုံကြော ပါရဂူ ဆစ်ဂမန်ဖရက်ပါ။ ဒါကြောင့်လည်း သူ့ကို အစွဲပြုပြီး အိပ်မက်မြို့တော်လို့လည်း ခေါ်ကြပါတယ်။


ဗီယာနာက ဂီတမြို့တော်အပြင် အကမြို့တော်လို့လည်း ပြောနိုင်ပါတယ်။ ဗီယာ နာမြို့ရဲ့ Ball Dance အကက သိပ်ကိုနာမည်ကြီးတာပါပဲ။ ခမ်းနားထည်ဝါလှတဲ့ ခန်းမ ကျယ်ကြီးမှာ ဝတ်စုံပြည့်ဝတ်ထားပြီး စုံတွဲအလိုက် စည်ချက်ညီညီကရတဲ့ ball dance က သိပ်ကြည့်ကောင်းပါတယ်။ တစ်နှစ်ကို ကပွဲပေါင်း ၄၀၀ ကျော် ကျင်းပလေ့ ရှိပြီး နှစ်စဉ်အရှေ့ပိုင်း ၃ လမှာ ကပွဲတွေပိုပြီး ကျင်းပလေ့ရှိပါတယ်။ သံစုံတီးဝိုင်းတွေ မြိုင်မြိုင်ဆိုင်ဆိုင်နောက်ခံပြီး မြူးမြူးကြွကြွကလေ့ရှိတဲ့ ဒီ Waltz အကဟာ ယနေ့ ထက်တိုင်ထိန်းသိမ်းထားဆဲ ဩစတြီးယားရိုးရာယဉ်ကျေးမှုတစ်ရပ်ပါပဲ။


ဗီယာနာကို ဝိုင်မြို့တော်လို့လည်းပြောကြပါတယ်။ ဘာကြောင့်လဲဆိုတော့ ဗီယာ နာဟာ ကမ္ဘာ့တစ်မြို့တည်းသော မြို့တော်တွင်း ဝိုင်ချက်လုပ်ရာမြို့တော်ဖြစ်နေတာကြောင့်ပါ။ တစ်နှစ်ကို ဝိုင်လီတာပေါင်း ၂ ဒသမ ၅ သန်းတောင်ချက်လုပ်နိုင်ပါသတဲ့။ ဗီယာနာဝိုင်လိုပဲ ဗီယာနာကော်ဖီလည်းသိပ်ကောင်းပါတယ်။ ရှေးကတည်းကစခဲ့တဲ့ ကော်ဖီဆိုင်ယဉ်ကျေးမှုက ယနေ့တိုင်ပါပဲ။ မြို့ကြီးရဲ့ လမ်းမတွေ လမ်းသွယ်တွေမှာ ကော်ဖီဆိုင်များစွာတွေ့ရမှာပါ။ ကော်ဖီနဲ့အတူတွဲဖက်စားလေ့ရှိတာကတော့ ဗီယာနာ မြို့ရဲ့ အထင်ကရ Sacher tote လို့ခေါ်တဲ့ ချောကလက်ကိတ်ပါ။


ဗီယာနာဟာ အနုပညာ၊ အစားအသောက်မှာသာမက ဗိသုကာလက်ရာတွေလည်း ကြွယ်ဝချမ်းသာပါတယ်။ မြို့လယ်ရှိ City Center မှာ ရှေးဟောင်းအဆောက်အအုံ များစွာကို တွေ့ရမှာပါ။ မြို့လယ်မှာ St. Stephen ဘုရားကျောင်း၊ မြို့တော်ခန်းမ၊ လွှတ်တော်၊ အော်ပရာကဇာတ်ရုံ၊ Hofburg နန်းတော်၊ Volksgarten ပန်းခြံအစရှိတဲ့ ခမ်းနားတဲ့ အဆောက်အအုံတွေ ကျယ်ဝန်းတဲ့ပန်းခြံတွေများစွာရှိနေပါတယ်။ ဂီတ ပညာရှင် မိုးဇက်နေသွားခဲ့တဲ့အိမ်၊ စိတ်ပညာရှင် ဆစ်ဂမန်ဖရက်နေသွားခဲ့တဲ့ အိမ်တွေ ကိုလည်း ပြတိုက်အဖြစ်ပြသထားလို့လေ့လာနိုင်ပါတယ်။


ဗီယာနာမြို့ရဲ့ အကျော်ကြားဆုံးအဆောက်အအုံကတော့ ရွှန်းဘရွန်း (Schonbrunn)နန်းတော်ကြီးပဲဖြစ်ပါတယ်။ အခန်းပေါင်း ၁၄၄၁ ခန်းပါဝင်ဖွဲ့စည်းထားတဲ့ ဒီ နန်းတော်ကြီးဟာ ကျယ်ဝန်းလှတဲ့ ဥယျာဉ်တော်ကြီးအလယ်မှာ ခန့်ညားထည်ဝါစွာရှိနေ ပါတယ်။ UNESCO အသိအမှတ်ပြု ဒီနန်းတော်ဝင်းကြီးထဲ လက်မှတ်ဝယ်ကာ သွား ရောက်လေ့လာနိုင်ပါတယ်။ နန်းတော်ဝင်းထဲရှိ တိရစ္ဆန်ရုံကလည်း ၁၇၅၂ ခုနှစ်မှာ ဖွင့်လှစ်ခဲ့တာမို့ ကမ္ဘာ့သက်တမ်းအရင့်ဆုံး တိရစ္ဆာန်ရုံဖြစ်ပြီး ယခုထက်တိုင်ဖွင့်လှစ်ထား ဆဲဖြစ်လို့ သွားရောက်လေ့လာနိုင်ပါတယ်။ ကမ္ဘာ့သက်တမ်းအရင့်ဆုံး ချားရဟတ်လည်း ဗီယာနာမြို့မှာ ရှိပါသေးတယ်။ Vienna Giant Wheel လို့ခေါ်ပြီး ယနေ့ထက်တိုင် ပြေးဆွဲနေတုန်းပါ။ ဥရောပရဲ့ ဒုတိယအကြီးဆုံး သချုØင်းကုန်းလည်းရှိပြီး ရုပ်အလောင်း ပေါင်း ၂ ဒသမ ၅ သန်း မြှုပ်နှံထားလို့ ဗီယာနာမြို့ လူဦးရေထက်တောင် ပိုများနေတယ် လို့ သိရပါတယ်။ မြို့လယ်ဖြတ်သန်းစီးဆင်းနေတဲ့ ဒန်နျူ(Danube)မြစ်ဟာ ဥရော ပရဲ့ ဒုတိယအရှည်ဆုံးမြစ်ဖြစ်ပြီး မြို့တော်လေးခုကို ဖြတ်သန်းစီးဆင်းနေတဲ့ တစ်ခု တည်းသော မြစ်ပါ။ ဩစတြီးယားနိုင်ငံ၊ ဗီယာနာမြို့အပြင် ဆလိုဗက်ကီးယား၊ ဟန်ဂေ ရီနဲ့ ဆားဘီးယားနိုင်ငံမြို့တော်တွေကိုပါ ဖြတ်သန်းစီးဆင်းနေပါတယ်။


နောက်ထူးခြားတာတစ်ခုက ဂျာမနီနိုင်ငံ ဘာလင်မြို့လိုပဲ ဗီယာနာမြို့ဟာလည်း ဒုတိယကမ္ဘာစစ်ပြီးနောက် ၁၉၅၅ ခုနှစ်အထိ ၄ ပိုင်းပိုင်းခံရပြီး အမေရိကန်ပြည်ထောင်စု၊ ပြင်သစ်၊ ယူကေ၊ ဆိုဗီယက်ယူနှီယံတို့က တစ်ပိုင်းစီခွဲအုပ်ချုပ်ခံခဲ့ရတယ်လို့သိရပါ တယ်။ လွတ်လပ်ရေးရပြီးနောက် ဗီယာနာဟာ တဖြည်းဖြည်းကြိုးစားခဲ့ရာ ယခုဆိုရင် ရွှေထီးပြန်ဆောင်းနေပြီလို့ ပြောလို့ရပါတယ်။ ဘာကြောင့်လဲဆိုတော့ နှစ်စဉ်စစ်တမ်း ကောက်ယူချက်အရ ဗီယာနာမြို့ဟာ ကမ္ဘာ့နေချင်စဖွယ်အကောင်းဆုံးမြို့ ဘဝအရည် အသွေးအပြည့်မီဆုံးမြို့အဖြစ် ၂၀၀၉ ခုနှစ်ကစပြီး ၈ နှစ်ဆက်တိုက် သတ်မှတ်ခံခဲ့ရတာကြောင့်ပါ။

1-6-17-Vienna

ဂရိလို့ပြောလိုက်တာနဲ့ ပင်လယ်ကမ်းစပ်ကျောက်ကမ်းပါးတွေမှာ အစီအရီထပ်နေ တဲ့ ဖွေးဖွေးဖြူတဲ့ ချစ်စဖွယ်အိမ်လှလှလေးတွေကို မြင်မိကြမှပါ။ ဒီလိုလှပလွန်းတဲ့ ရှုခင်းတွေရှိနေတဲ့ နေရာကတော့ ဂရိ(Greece)နိုင်ငံရှိ ဆန်တိုရီနီ(Santorini) လို့ ခေါ်တဲ့ကျွန်းပဲဖြစ်ပါတယ်။ ရေပြာပြာနောက်ခံထားတဲ့ ကျောက်ကမ်းပါးနီနီ၊ အိမ်ဖြူဖြူ၊ ခေါင်မိုးပြာပြာဘုရားကျောင်းတွေနဲ့ ဆန်တိုရီနီကျွန်းက ရှုခင်းတွေကလှလွန်းလို့ ကမ္ဘာ့ ကဗျာအဆန်ဆုံးနေရာတစ်ခုလို့ ပြောကြပါတယ်။


ဆန်တိုရီနီဆိုတာ မြေထဲပင်လယ်ထဲရှိ အေဂျင်ပင်လယ်တွင်းက ဂရိကျွန်းစုတစ် စုပါ။ တကယ့်နာမည်ရင်းက သီရာ(Thira)ကျွန်းဖြစ်ပေမဲ့ ကမ္ဘာလှည့်ခရီးသည်များ အကြား ဆန်တိုရီနီလို့သာ အသိများပါတယ်။ ဒီကျွန်းစုလေးဟာ အလှအပတစ်ခုတည်း ကြောင့်မဟုတ်ဘဲ သူ့ရဲ့သမိုင်းဝင်တဲ့အချက်ရယ်၊ ထူးခြားတဲ့ပထဝီမြေအနေအထားရယ်ကြောင့်လည်း ကမ္ဘာကျော်တာပါ။ နောက်ပိုင်းလေ့လာမှုတွေအရ ပလေတိုရဲ့ ဒဏ္ဏာရီတစ်ခုဖြစ်ခဲ့တဲ့ လွန်ခဲ့တဲ့ နှစ်ပေါင်းများစွာက ရေအောက်ကမ္ဘာထဲ ပျောက်ဆုံး သွားတဲ့ အတ္တလန္တိတ်မြို့တော်ကြီးဟာ ဆန်တိုရီနီကျွန်းမှာရှိခဲ့တယ်လို ယူဆနေကြပါ တယ်။ ဘာကြောင့်လဲဆိုတော့ အခုမြင်ရတဲ့ လခြမ်းပုံဆန်တိုရီနီကျွန်းဟာ ယခင်က စက်ဝိုင်းပုံပါတဲ့။ လွန်ခဲ့တဲ့ နှစ်ပေါင်းများစွာက ကျွန်းပေါ်ရှိ မီးတောင်ကြီးပေါက်ကွဲ လာတဲ့အခါ မီးတောင်ပတ်လည်မြေသားတွေ ရေထဲအကုန်နစ်မြုပ်ကုန်တာကြောင့် စက်ဝိုင်းအနားသတ်ပဲကျန်တော့ကာ လက်ရှိမြင်ရတဲ့ လခြမ်းပုံဖြစ်ပေါ်လာတာပါ။ မြုပ် သွားတဲ့ထဲမှာ အတ္တလန္တိတ်မြို့တော်ကြီးလည်းပါပြီး လက်ရှိ ဆန်တိုရီနီကျွန်းကြီးပေါ်မှာ ကျန်ရှိနေတဲ့ Akrotiri မြို့ပျက်ကြီးက အဲ့ဒီမြို့ကြီးနဲ့ဆက်စပ်နေပါတယ်လို့ ယူဆ နေကြပါတယ်။


ဆန်တိုရီနီကျွန်းမကြီးအပါအဝင် ကျွန်းသုံးကျွန်းက ခလယ်က မီးတောင်ကြီးကို ပတ်လည်ဝိုင်းထားသလို ဖြစ်နေပါတယ်။ အဲဒီမီးတောင်ကြီးရာဇဝင်ကလည်း ဆန်း ကျယ်ပါတယ်။ ၁၆၁၃BC က ဆန်တိုရီနီမှာဖြစ်တဲ့ ကမ္ဘာ့ဒုတိယအပြင်းထန်ဆုံး မီး တောင်ပေါက်ကွဲမှုထပ်ဖြစ်ပြီး ရေထဲမြုပ်သွားတဲ့ ကျွန်းအလည်သားနဲ့အတူ မီးတောင် ကြီးပါမြှုပ်သွားခဲ့ပြီး ၄၆BC ကနေစပြီး နှစ်ပေါင်းမြောက်မြားစွာအတွင်း ချော်ခဲတွေနဲ့ ပြည့်နေတဲ့ မီးတောင်ကြီး ပင်လယ်ထဲကနေ ဖြည်းဖြည်းချင်းဖြစ်ပေါ်လာတာပါ။ ဒီမီး တောင်ကြီးက ၁၉၅၀ ခုနှစ်မှာနောက်ဆုံးအဖြစ် ၂၂ ရက် ကြာပေါက်ကွဲထားပြီး အခုထိမီးတောင်ရှင်အဖြစ်ရှိနေပါတယ်။ ဒီမီးတောင်ကျွန်းပေါ် ကျွန်မတို့ ဧပြီလတုန်းက ဆန်တိုရီနီသွားလည်ရင်း သွားလေ့လာခဲ့တုန်းကဆို မီးတောင်၀မှာ အငွေ့တွေထွက်နေ ဆဲပဲဖြစ်နေတာကို တွေ့ခဲ့ရပါတယ်။


မီးတောင်ပေါက်ကွဲထားမှုကြောင့် ဆန်တိုရီနီကျွန်းကြီးမှာ မီးတောင်ဘက်ခြမ်းမှာ မတ်စောက်တဲ့ ကျောက်ကမ်းပါးကြီးတွေရှိနေပြီး ကျန်တစ်ဖက်မှာတော့ ပုံမှန်ကျွန်းတွေ လို ပြေပြစ်တဲ့ကမ်းခြေတွေရှိနေပါတယ်။ ဒါပေမဲ့ တခြားကျွန်းတွေနဲ့မတူ ထူးခြားတာက တော့ ချော်ရည်တွေကြောင့် ကမ်းခြေတွေမှာ သဲမည်းကမ်းခြေ၊ သဲနီကမ်းခြေ၊ သဲဖြူ ကမ်းခြေဆိုပြီး အမျိုးမျိုးရှိနေတာပါ။ ကျောက်ကမ်းပါးဘက်အခြမ်းမှာတော့ ကမ္ဘာကျော် ထုံးသုတ်အဆောက်အအုံဖြူဖြူလေးတွေ အစီအရီရှိနေပါတယ်။
စတုရန်းမိုင် ၄၈ မိုင်သာကျယ်တဲ့ ဆန်တိုရီနီကျွန်းမကြီးကသေးငယ်လို့ ကျွန်းပေါ် မှာရှိတဲ့ မြို့ရွာလေးတွေက နီးနီးလေးတွေပါ။ ကျွန်းပေါ်ရှိ လေဆိပ်နားက Fira မြို့က ကျွန်းရဲ့မြို့တော်ဖြစ်ပေမဲ့ ရွာကြီးဖြစ်တဲ့ Oia(အီးယာ)က ရှုခင်းအရမ်းလှလို့ အကျော် ကြားဆုံးပါ။ ပုံတွေမှာမြင်နေကြရှုခင်းတွေက Oia မှာရိုက်ထားတာတွေပါ။ ခရီးသည် အလာဆုံးနေရာဖြစ်လို့ တစ်ရွာလုံးနီးပါးက ဟိုတယ်၊ စားသောက်ဆိုင်နဲ့ ဈေးဆိုင်ခန်း တွေနဲ့ပြည့်နေပါတယ်။ အမိုးပြာပြာအခုံးလေးတွေနဲ့ Church ကျောင်းတွေကိုလည်း Oia မှာတွေ့မြင်ရမှာပါ။ ရွာကနေလှမ်းမြင်ရတဲ့ ရေပြာပြာထဲက မီးတောင်ရှုခင်းတွေ၊ နေဝင်ချိန်ရှုခင်းတွေ သိပ်လှပါတယ်။ မီးတောင်ဆီ သွားချင်ရင်တော့ Fira မြို့ သင်္ဘော ဆိပ်ကနေ မီးတောင်သွားတဲ့ အပျော်စီးသင်္ဘောခရီးစဉ်ရှိပါတယ်။ မြို့ပေါ်ကနေ ဆိပ်ကမ်းဆီဆင်းရာမှာ လှေကားထစ်ပေါင်း ၆၀၀ ကျော်ရှိပြီး လမ်းလျှောက်မဆင်းချင်ပါက ဆန်တိုရီနီရဲ့ နာမည်ကျော်မြင်းပုလေးတွေစီးသွားရင်သွား၊ မစီးရင် Cable Car နဲ့ဆင်း လို့ရပါတယ်။


ဆန်တိုရီနီဟာ ဥရောပရှိနှစ်ခုတည်းသော ပူအိုက်တဲ့ကန္တာရလို ရာသီဥတုရှိရာ ဒေသထဲက တစ်ခုဖြစ်ပါတယ်။ ရာသီဥတုခြောက်သွေ့နွေးထွေးလို့ ဝိုင်ချက်လုပ်ရာမှာ အောင်မြင်ပြီး ဆန်တိုရီနီဝိုင်က ကမ္ဘာကျော်ပါတယ်။ နေသာတဲ့ရာသီဥတုရှိလို့ ဧည့်လာ များပါတယ်။ ကျွန်းပေါ်လူပေါင်း ၁၅၀၀၀ သာနေပေမဲ ဧည့်သည်တွေကတော့ တစ်နှစ် ကို ၁ ဒသမ ၅ သန်းလာရောက်ပါတယ်တဲ့။ ဒါကြောင့် ကမ္ဘာလှည့်ခရီးသည်အများစုရဲ့ အိပ်မက်နေရာဖြစ်တဲ့ ဆန်တိုရီနီကိုသွားရောက်လည်ပတ်ဖို့ စာရင်းထဲထည့်ထားသင့် ပါကြောင်း ညွှန်းဆိုလိုက်ရပါတယ်။

 

More Articles ...