30-9-2017lotte

 

တစ်နိုင်ငံနဲ့ တစ်နိုင်ငံ အပြိုင်အဆိုင် မိုးမျှော်တိုက်တွေ ဆောက်လုပ်နေကြလို့ ဂင်းနစ်ကမ္ဘာ့စံချိန်က တစ်နှစ်နဲ့ တစ်နှစ်စံချိန်တွေမတူညီတော့ပဲ ပြောင်းနေတတ်တာ တွေ့ရပါတယ်။ စာရေးသူ အရင်တစ်ပတ်က ကိုရီးယားခရီးသွားအဖွဲ့အစည်းရဲ့ ဖိတ် ကြားမှုအရ တောင်ကိုရီးယားနိုင်ငံကို သွားရောက်လည်ပတ်ခဲ့စဉ်က ဒီနှစ်ဧပြီလကမှ စတင်ဖွင့်လှစ်ခဲ့တဲ့ Lotte World Tower ကြီးဆီ ရောက်ဖြစ်ခဲ့ပါတယ်။ အသစ် ဆောက်လုပ်ဖွင့်လှစ်ထားတဲ့ အဆောက်အအုံဖြစ်တာနဲ့အညီ Lotte World Tower က စံချိန်တွေများစွာ ချိုးထားတာကို တွေ့ရှိခဲ့ရပါတယ်။


Tower ကြီးဟာ အမြင့်ပေပေါင်း ၁၈၂၀ကျော် (၅၅၅ မီတာ) ရှိပြီး ယခင် တောင်ကိုရီးယားရဲ့ အမြင့်ဆုံးအဆောက်အအုံဖြစ်တဲ့ Northeast Asia Trade Tower ထက် ၂၅၀မီတာပိုမြင့်တာကြောင့် နှစ်ဆနီးပါး ပိုမြင့်ကာ တောင်ကိုရီးယားမှာ အမြင့်ဆုံး အဆောက်အအုံအဖြစ် စံချိန်ချိုးခဲ့ပါတယ်။ ကမ္ဘာမှာတော့ အမေရိကန် နိုင်ငံရှိ One World Trade Center အဆောက်အအုံကို ကျော်တက်ပြီး ပဥ္စမမြောက် အမြင့်ဆုံးအဆောက်အအုံဖြစ်လာခဲ့ပါတယ်။ ကမ္ဘာ့အမြင့်ဆုံးအဆောက်အအုံကတော့ ဒူဘိုင်းမြို့မှာရှိတဲ့ Burj Khalifa အဆောက်အအုံကြီးပဲဖြစ်ပြီး အမြင့် မီတာပေါင်း ၈၂၉.၈ မီတာ မြင့်ကာ အထပ်ပေါင်း ၁၆၀ထပ်ရှိပါတယ်။
Lotte World Tower  မှာ စုစုပေါင်း အထပ်၁၂၃ ထပ်ရှိပြီး တာဝါကြီးရဲ့ ၁၁၇ ထပ်ကနေ ၁၂၃ ထပ်အထိကို ဆိုးလ်မြို့ရှုခင်းတွေကြည့်လို့ရတဲ့ မှန်ချပ်နံရံတွေကာ ထားတဲ့ Sky Observatory Deck အဖြစ်ဖွင့်ပေးထားပါတယ်။ အမြင့်မီတာ ၅၀၀ မှာရှိတာကြောင့် ကမ္ဘာ့တတိယအမြင့်ဆုံး Observatory Deckအဖြစ်စံချိန်ချိုးထား ပါတယ်။ ယခင်ဆိုးလ်မြို့ရှုခင်းတွေ ကြည့်လေ့ရှိတဲ့ ဆိုးလ်မျှော်စင် (နမ်(မ်)ဆန်) မျှော်စင်ထက်လည်း များစွာပိုမြင့်နေပါတယ်။ Observatory Deckမှာ မှန်ချပ်တွေ ပတ်ပတ်လည်ကာရံထားလို့ ဆိုးလ်မြို့ရှုခင်းကို ၃၆၀ဒီဂရီ လှည့်ပတ်ကြည့်ရှုနိုင်ပါတယ်။ ရာသီဥတုကြည်လင်တဲ့အချိန်တွေမှာဆိုရင် ဆောင်းဒို၊ အင်ချွန်းနဲ့ ပင်လယ်ဝါထိ တောင်လှမ်းမြင်နိုင်ပါတယ်။


ထူးခြားတာက ၁၁၈ထပ်မှာ အောက်ကိုတိုးလျှိုပေါက် မြင်ရတဲ့ မှန်ကြမ်းပြင်ကြီး ရှိနေတာပါပဲ။ မြေပြင်ကနေ မီတာ ၅၀၀ အကွာမှာရှိနေတာကြောင့် ကမ္ဘာ့အမြင့်ဆုံး မှန်ကြမ်းပြင်အဖြစ် စံချိန်ချိုးထားပြန်ပါတယ်။ အောက်က တိုးလျှိုပေါက်ကြီးဆိုတော့ အောက်ငုံ့ကြည့်ရင် အသည်းယားစရာကောင်းလှပါတယ်။ တချို့နေရာတွေဆို မှန်ချပ် ကိုပိတ်ကာထားပြီး ကိုယ်ရပ်လိုက်တော့မှ ဖြည်းဖြည်းချင်းပွင့်လာကာ အောက်ကို တိုး လျှိုးပေါက် လှမ်းမြင်ရအောင်လုပ်ထားလို့ စိတ်လှုပ်ရှားစရာကောင်းလှပါတယ်။
ရှုခင်းကြည့်တဲ့ အထပ်တွေဆီ ပို့ဆောင်ပေးတဲ့ ဓာတ်လှေကားကြီးကလည်း အဆင့်မြင့်လွန်းလှပါတယ်။ Sky Shuttle Elevator လို့ခေါ်ပြီး ကမ္ဘာပေါ်မှာ အမြင့် ဆုံး ၂ ထပ် ဓာတ်လှေကားဖြစ်ပါတယ်။ အဝေးဆုံးအကွာအဝေးကိုတက်ပေးတဲ့ ဓာတ် လှေကားအဖြစ်လည်း စံချိန်ချိုးပါတယ်။ တစ်မိနစ်ကို မီတာ ၆၀၀နှုန်းနဲ့ အတက်အ ဆင်းပြုလုပ်နိုင်တာကြောင့် Lobby ရှိရာ မြေအောက်ထပ် B1 နဲ့ B2 ကနေ ၁၂၁ ထပ်အထိကို ၁မိနစ်ထဲနဲ့ အရောက်သွားပေးပါတယ်။ ဓာတ်လှေကား ဘေး ၃ဖက်နဲ့ မျက်နှာကျက်ပါမကျန် Monitor တပ်ထားပြီး ဓာတ်လှေကားစီးနေတဲ့တလျှောက်လုံး ဒီ Tower အကြောင်း Shသမအ ဠငိနသ ဃူငစ ပြတာ အတော့်ကို အဆင့်မြင့်လှပါတယ်။ Sky Observatory ရဲ့ ဝင်ကြေးကတော့ လူကြီး ဝမ် ၂၇၀၀၀ နဲ့ ကလေးဝမ် ၂၄၀၀၀ ဖြစ်ပြီး မနက် ၉ နာရီကနေ ည ၁၁ နာရီထိဖွင့်ပါတယ်။


အဆောက်အအုံကြီးထဲမှာ ခေတ်ပေါ်မြို့ပြလူနေမှုအဆင့်အတန်းအတွက် လို အပ်ချက်တွေ အကုန်ဖြည့်ပေးထားပါတယ်။ အဆင့်မြင့် ကုန်ပစ္စည်းတွေ ရောင်းချပေးတဲ့ Lotte World Mall၊ အခွန်ကင်းလွတ်တဲ့ Lotte Duty Free Shop နဲ့ ဆိုင်ခန်းတွေ၊ လူနေအိမ်ခန်းတွေ၊ ရုံးခန်းတွေ ပါရှိပါတယ်။ ကြယ်ခုနစ်ပွင့်ဇိမ်ခံဟိုတယ် Signiel Seoul Hotel ၊ ကိုရီးယားအကောင်းဆုံး မြို့ပြ ငါးပြတိုက်ကြီး ၊ ဂန္ထဝင်ဂီတခန်းမကြီးနဲ့ အာရှရှိအကြီးဆုံး ရုပ်ရှင်ရုံကြီးတို့လည်း ရှိနေပါတယ်။
Lotte World Tower ကို ၂၀၁၁ ခုနှစ်က စတင်ဆောက်လုပ်ခဲ့ပြီး ကိုရီးယား ဗိသုကာပညာရပ်ဆိုင်ရာ သရဖူဆောင်းခဲ့တဲ့ အဆောက်အအုံလို့ပြောလည်းရပါတယ်။ ကိုရီးယားရိုးရာ ကြွေထည်နဲ့ စာရေးနည်းတို့ကနေ ဒီဇိုင်းယူထားတာဖြစ်ပြီး တောင် တန်းတွေ နောက်ခံထားတဲ့ ဆိုးလ်မြို့ရှုခင်းတွေကြား မိုးပေါ်ထောင်ထွက်လို့ နေတာကို တွေ့ရပါတယ်။ ခေတ်ပေါ်နဲ့ ရိုးရာပေါင်းစပ်ထားတဲ့ ဒီဇိုင်းဖြစ်ပြီး ကိုရီးယားရဲ့ အလှ တန်ဆာနှင့် ဂုဏ်ယူဖွယ်ရာ အဆောက်အအုံကြီးဖြစ်လို့နေပါတယ်။

ယခင်တစ်ပတ်မှအဆက် . . .
ဟန်ဂေရီနိုင်ငံ ဘူဒါပက်စ်မြို့ရှိ အခြားထင်ရှားသည့် အဆောက်အအုံတစ်ခုမှာ ပက်စ် (Pest) ဘက်ခြမ်းရှိ ကမ္ဘာ့တတိယအကြီးဆုံး လွှတ်တော်အဆောက်အအုံကြီး ဖြစ်ပါသည်။ ၃၈၇ ပေမှ ၈၇၉ ပေအထိ မြင့်သည့်အဆောက်အအုံများ ဆက်စပ်တည် ဆောက်ထား၍ ခေါင်မိုးချွန်များစွာပါဝင်ပြီး ခမ်းနားထည်ဝါလှသည့် ဟန်ဂေရီန်ိုင်ငံ လွှတ်တော်အဆောက်အအုံကြီးကို ၁၈၈၅ မှ ၁၉၀၄ ခုနှစ်အတွင်း တည်ဆောက်ခဲ့၍ ၁၈၆၉ ခုနှစ်တွင် ယင်း၌ လွှတ်တော်အစည်းအဝေးများကို ပထမဆုံး ကျင်းပခဲ့သည်။ ဝင်ပေါက် ၂၇ ခုရှိ၍ ၆၉၁ခန်း ပါရှိသည့် ယင်းအဆောက်အအုံတွင် ရုပ်တုပေါင်း ၂၃၃ ခုရှိရာ ယင်းတို့အနက် ၈၈ ခုမှာ အဆောက်အအုံအပြင်ဘက်တွင် ခမ်းနားလှပစွာ တည်ရှိနေပြီး ယင်းသို့ နှစ်စဉ်ကမ္ဘာလှည့်ခရီးသည် လေးသန်းခွဲခန့် လာရောက်ကြည့် ရှုလေ့လာကြကြောင်းသိရပါသည်။


ဘူဒါပက်စ်မြို့၏ ထူးခြားလှပသည့် အကြောင်းရင်းတစ်ခုမှာ မြို့လယ်တွင် ဖြတ် သန်းစီးဆင်းသွားသည့် ဒန်ညုမြစ်ပေါ်တွင် အနောက်ဘက် ဘူဒါအခြမ်းနှင့် အရှေ့ ဘက် ပက်စ်အခြမ်းတို့ကို ပုံစံမတူသည့် တံတား ၈ စင်းဖြင့် ဆက်သွယ်ထားခြင်းပင် ဖြစ်သည်။ ယင်းတို့အနက် ကျောက်တုံး၊ ကျောက်သားတိုင်ကြီးနှစ်တိုင်ဖြင့် တည် ဆောက်ထားသည့် Szechenyi Chain Bridge တံတားကြီးသည် သက်တမ်းအရင့် ဆုံးဖြစ်၍ ၁၀ နှစ်ကြာ တည်ဆောက်ခဲ့ပြီး ၁၈၄၉ ခုနှစ်တွင် ဖွင့်လှစ်ခဲ့ကာ ၁၉၄၉ ခုနှစ်၌ ပြန်လည်ပြုပြင်ခဲ့သည်။ ၁၂၄၆ ပေ ရှည်လျား၍ တံတားထိပ် တစ်ဖက်တစ်ချက်တွင် ခြင်္သေ့ရုပ်တု နှစ်ခုစီရှိသည်။ ၁၈၉၆ ခုနှစ်တွင် တည်ဆောက်ခဲ့၍ ၁၉၄၆ ခုနှစ်တွင် ပြုပြင်ခဲ့သော Liberty တံတားဟု အမည်တွင်သည့် အစိမ်းရောင်သံမဏိတံတားကြီး သည်လည်း ၁၁၀၅ ပေ ရှည်၍ ယင်း၏ အလယ်တိုင်ကြီးလေးတိုင်ထိပ်တွင် ဟန်ဂေရီ ဒဏ္ဍာရီလာ ငှက်တစ်ကောင်စီ ပျံသန်းနေသည့် ရုပ်တုများ ထားရှိသည်မှာ ထူးခြား လှသည်။ ၁၉၀၃ ခုနှစ်တွင် တည်ဆောက်ခဲ့၍ ၁၉၆၄ ခုနှစ်တွင် ပြုပြင်ခဲ့သည့် ခြောက်လမ်းသွား Elizabeth တံတားကြီးမှာ ဟန်ဂေရီလူမျိုးတို့ ချစ်ခင်လေးစားသည့် အင်္ဂ လန်နိုင်ငံ ဘုရင်မကြီး အဲလိဇဘက်ကို ဂုဏ်ပြု၍ အမည်ပေးထားခဲ့ကြောင်းလည်း သိရပါသည်။


မြို့လယ်ရှိ သမိုင်းဝင် သူရဲကောင်းရင်ပြင်ကြီးတွင် သူရဲကောင်းရုပ်တုများစွာ တည်ရှိ၍ ရင်ပြင်အလယ်ရှိ တိုင်ထိပ်တွင် လက်နှစ်ဖက်ကိုမြှောက်ပြီး တစ်ဖက်၌ မြင့်မြတ်သော သရဖူနှင့် အခြားတစ်ဖက်၌ လက်ဝါးကပ်တိုင်ကို ကိုင်ဆောင်ထားသော တောင်ပံပါသည့် Gabriel တန်ခိုးရှင်နတ်သားရုပ်တုရှိသည်။ ၁၁၈ ပေမြင့်၍ ၁၉၂၉ ခုနှစ်က တည်ဆောက်ပြီးစီးခဲ့သည့် ယင်းကျောက်တိုင်ကြီးကို အဝေးမှထင်ရှားစွာ မြင် တွေ့ခဲ့ရပါသည်။ ထို့ပြင် အသုံးချအနုပညာပြတိုက်၊ အမျိုးသားပြဇာတ်ရုံ၊ အမျိုးသား ဇာတ်ရုံကြီး၊ ရှေးခေတ်ဈေးရုံကြီး၊ ၁၈၇၇ ခုနှစ်က တည်ဆောက်ခဲ့သည့် Nyugati ဘူတာရုံကြီးနှင့် Trinity ရင်ပြင်စသည်တို့လည်း ဘူဒါပက်စ်မြို့၏ ထင်ရှားသော အဆောက်အအုံနှင့် နေရာများပင်ဖြစ်ကြပါသည်။
အချိန်မရသဖြင့် ယင်းတို့ကို စာရေးသူ အသေးစိတ်မလေ့လာဖြစ်ခဲ့ရုံသာမက ယင်းတို့အပြင် အခြားထင်ရှားသည့်အဆောက်အအုံများ၊ ဥယျာဉ်များ၊ ပြတိုက်များ၊ ရုပ်တုများစသည့် လေ့လာသင့်သည့်နေရာအများအပြား ကျန်ရှိနေပါသေးသည်။ ၁၉၈၇ ခုနှစ်တွင် ဘူဒါရဲတိုက်၊ လွှတ်တော်အဆောက်အုံနှင့် Chain Bridge တို့အပါ အဝင် ဒန်ညုမြစ် တစ်ဖက်တစ်ချက်နေရာများသည် ယူနက်စကို၏ ကမ္ဘာ့ယဉ်ကျေးမှု အမွေအနှစ်နေရာများ စာရင်းဝင်ခဲ့သည့်အပြင် ၂၀၀၂ ခုနှစ်တွင် သူရဲကောင်းရင်ပြင် သည်လည်း ယူနက်စကိုစာရင်းဝင်ခဲ့ပြန်သဖြင့် အရှေ့ဥရောပ၏ သမိုင်းဝင် ယဉ်ကျေးမှု အမွေအနှစ်အများအပြားထွန်းကားရာ၊ စုဝေးတည်ရှိရာ ဘူဒါပက်စ်မြို့တော်သို့ စာရေး သူ နောက်ထပ်တစ်ကြိမ် သွားရောက်လေ့လာရန် ရည်ရွယ်ထားခဲ့မိပါတော့သည်။

အလယ်ဥရောပရှိ ဟန်ဂေရီနိုင်ငံသည် ဩစတြီးယား၊ ဆလိုဗက်ကီးယား၊ ယူကရိန်း၊ ရိုမေးနီးယား၊ ဆားဗီးယား၊ ခရိုအေးရှားနှင့် ဆလိုဗီးနီးယားနိုင်ငံတို့အကြား တည်ရှိသည့် ကုန်းတွင်းပိတ်နိုင်ငံဖြစ်သော်လည်း ဥရောပတိုက်၌ လူသိများ၍ ထင်ရှားလှသည့် နိုင်ငံတစ်နိုင်ငံဖြစ်ပါသည်။ ဂျာမနီနိုင်ငံမှ မြစ်ဖျားခံ၍ နိုင်ငံပေါင်း ၁၀ နိုင်ငံကို ဖြတ်သန်းစီးဆင်းပြီး ပင်လယ်နက်ထဲသို့ စီးဝင်ကာ ဥရောပတိုက်၏ ဒုတိယအရှည်ဆုံး မြစ်ဖြစ်သည့် ဒန်ညု (Danube) မြစ်သည် ဟန်ဂေရီနိုင်ငံကိုလည်း အလယ်မှ ဖြတ် သန်းစီးဆင်းသွားပါသည်။ (မြေပုံကိုရှုပါ။) ရောမ၊ တူရကီနှင့် ဂျာမနီတို့၏ လွှမ်းမိုး အုပ်ချုပ်မှု ခံခဲ့ရပြီး ယခင်ဆိုဗီယက်ပြည်ထောင်စု၏ ဩဇာလွှမ်းမိုးမှုခံခဲ့ရသော်လည်း သမိုင်းကြောင်း အစဉ်အလာကြီးခဲ့သည့် ဟန်ဂေရီနိုင်ငံသည် ယခုအခါ လွတ်လပ်၍ ခေတ်မီဖွံ့ ဖြိုးတိုးတက်နေသည့် နိုင်ငံတစ်နိုင်ငံဖြစ်သည်။ လူဦးရေ ၁၀ သန်းခန့်ရှိ၍ ဟန်ဂေရီ လူမျိုး ၈၀ ရာခိုင်နှုန်းခန့် နေထိုင်ပြီး ခရစ်ယာန်ဘာသာဝင် ၇၆ ရာခိုင်နှုန်း ခန့်ရှိသော ဟန်ဂေရီနိုင်ငံတွင် မြို့တော်မှာ ဘူဒါပက်စ် (Budapest) မြို့ဖြစ်၍ ယင်း ကိုလည်း ဒန်ညုမြစ်က ဖြတ်သန်းစီးဆင်းလျက်ရှိသည်။


ဥရောပတိုက်တွင် ''ဥရောပ၏ အသည်းနှလုံး''၊ ''ဒန်ညုမြစ်၏ ဘုရင်မ''၊ ''လွတ် လပ်မှု၏မြို့တော်''၊ ''ရေပူစမ်းမြို့တော်''နှင့် ''ပွဲတော်များ၏မြို့တော်''ဟုလည်း ခေါ် ဝေါ်သုံးနှုန်းလေ့ရှိကြသော ဘူဒါပက်စ်မြို့တွင် တောင်ကုန်းထူထပ်သည့် ဘူဒါ (Buda)နှင့် မြေပြန့်ပိုင်းဖြစ်သည့် ပက်စ် (Pest) တို့ကို ဒန်ညုမြစ်က ပိုင်းခြားထားသော်လည်း ၁၈၇၃ ခုနှစ်မှစ၍ ဘူဒါ၊ ပက်စ်နှင့် Obudaa ဒေသတို့ကို ပေါင်းပြီး ဘူဒါပက်စ်မြို့ကြီး အဖြစ် သတ်မှတ်ခဲ့ကြသည်။ မြို့တော်၌ လူနှစ်သန်းခန့်နှင့် မြို့တော်ဧရိယာ တစ်ခု လုံးတွင် လူသုံးသန်းခွဲခန့် နေထိုင်သော ဘူဒါပက်စ်မြို့သည် ဥရောပရှိ လူနေထူထပ် သည့် မြို့ကြီးတစ်မြို့ဖြစ်၍ ကုန်သွယ်ရေး၊ စီးပွားရေး၊ ပညာရေး၊ ဖျော်ဖြေရေး၊ ဖက်ရှင်၊ အနုပညာ၊ သုတေသနနှင့် နည်းပညာတို့တွင် ထင်ရှားကျော်ကြားပါသည်။ အလယ်နှင့် အရှေ့ဥရောပ၏ အကြီးဆုံး စတော့အိတ်ချိန်း (Stock Exchange)ရှိ၍ လွန်ခဲ့သည့် နှစ်ပေါင်း ၁၂၀ ကျော်၊ ၁၈၉၆ ခုနှစ်ကတည်းက ကမ္ဘာ့ဒုတိယ အစောဆုံး မြေအောက်ရထားလိုင်းလည်းရှိသည်။ ရေပူစမ်းများပြား၍ မြို့လယ်တွင် ဒန်ညုမြစ်ကြီးက ကွေ့ ဝိုက်ဖြတ်သန်းစီးဆင်းလျက်ရှိသည့် ယင်းမြို့သည် ဥရောပတိုက်၏ အလှဆုံးမြို့တော် များတွင်လည်း အပါအဝင်ဖြစ်ကြောင်း သိရသည်။


ဘူဒါဘက်ခြမ်း တောင်ကုန်းပေါ်တွင် တည်ရှိ၍ ခမ်းနားလှပသော ဘူဒါရဲတိုက် (Buda Castle) သည် ဘူဒါပက်စ်မြို့၏ ကျော်ကြားလှသည့် အဆောက်အအုံတစ်ခုဖြစ် ပြီး ဒန်ညုမြစ်အတွင်း အပျော်စီးသင်္ဘောပေါ်မှ စာရေးသူတို့ ထင်ထင်ရှားရှား တွေ့မြင် ခဲ့ရပါသည်။ ၁၂၄၂ ခုနှစ်က တည်ဆောက်ခဲ့၍ တော်ဝင်ရဲတိုက်နှင့် ဘုရင့်နန်းတော်ဖြစ် ခဲ့ပြီး ၁၇၄၈ မှ ၁၇၇၀ ပြည့်နှစ်နှင့် ၁၉၄၆ ခုနှစ်တို့တွင် ပြန်လည်ပြုပြင်ခဲ့ကြသည်။ ၁၉၄၆ ခုနှစ် နောက်ပိုင်းမှစ၍ ဟန်ဂေရီနိုင်ငံ၏ အမျိုးသားယဉ်ကျေးမှုပြခန်းမကြီး၊ ဘူဒါပက်စ်မြို့သမိုင်းပြတိုက်နှင့် ဟန်ဂေရီအမျိုးသားစာကြည့်တိုက်တို့အဖြစ် ရပ်တည် လျက်ရှိသည်။ ယင်း၌ ကမ္ဘာ့ဒုတိယ အစောဆုံး တောင်ကမ်းပါးယံစောင်းကြိုးဆွဲ ရထားရှိ၍ ၁၈၇၀ ပြည့်နှစ်ကပင် ဒီဇိုင်းဆွဲကာ တည်ဆောက်ခဲ့ပြီး ၃၁၂ ပေခန့် ရှည်လျားကာ ၄၈ ဒီဂရီအထိ မြင့်သည့် တောင်စောင်းပေါ်သို့ ကြိုးဆွဲရထားဖြင့် တက်ရောက်နိုင်ခြင်းဖြစ်ရာ လွန်စွာအံ့ဩဖွယ်ကောင်းလှပါသည်။


ထို့အပြင် Gellert တောင်ကုန်းပေါ်၌ တည်ရှိသော Citadel ခံတပ်ကြီးနှင့် လွတ်လပ်ရေးရုပ်တုကြီး (Statue of Liberty) တို့သည်လည်း ဘူဒါဘက်ကမ်းတွင် ခမ်းနားထည်ဝါစွာ တည်ရှိနေပါသည်။ တောင်ကုန်းထိပ်သို့ ကားဖြင့်သွား၍ ခံတပ်ကြီး အနီးမှ အတန်ငယ်လမ်းလျှောက်ကြပြီးနောက် လွတ်လပ်ရေးရုပ်တုကြီးသို့ ရောက်ရှိ ပါသည်။ တစ်ဖက်တွင် အမှတ်တရပစ္စည်းအရောင်းဆိုင်တန်းတည်ရှိ၍ အခြားတစ်ဖက် တွင် သာယာလှပသည့် ဘူဒါပက်စ်မြို့ မြင်ကွင်းကို ရှုမငြီးဖွယ်ရာ မြင်တွေ့ခဲ့ရပါသည်။ ဒန်ညုမြစ်ကြီး၏ ဝဲဘက်တွင် တောင်တန်းများ နောက်ခံထား၍ သမိုင်းဝင်ရှေးဟောင်း နှင့် ခေတ်မီအဆောက်အအုံများ တည်ရှိနေသည့် ဘူဒါဘက်ခြမ်း၊ တံတားများ ဖြတ် သန်းတည်ဆောက်ထား၍ သင်္ဘောများ ဖြတ်သန်းသွားလာနေကြသည့် ဒန်ညုမြစ်ကြီး နှင့် ယာဘက်တွင် ခေတ်မီမြို့ပြအဆောက်အအုံအများအပြားတည်ရှိရှာ ပက်စ်ဘက် ခြမ်းတို့ပါဝင်သော မြင်ကွင်းကျယ်ရှုခင်းကို စာရေးသူတို့ အတန်ကြာ ငေးမောကြည့်ရှု နေခဲ့မိပါတော့သည်။ ၇၂၂ ပေခန့်ရှည်၍ ၁၅၀ မှ ၂၀၀ ပေအထိ ကျယ်ပြီး ပေ ၄၀ မှ ၅၂ ပေအထိ မြင့်သော ယင်းခံတပ်ကြီးမှာ ၁၈၁၃ ခုနှစ်က တည်ဆောက်ခဲ့ခြင်း ဖြစ်၍ ၁၈၄၈-၄၉ ခုနှစ် လွတ်လပ်ရေးတိုက်ပွဲကာလတွင် ထင်ရှားခဲ့သည်။ ခံတပ်ပေါ်တွင် ၄၆ ပေ မြင့်သော လွတ်လပ်ရေးရုပ်တုရှိ၍ ထန်းလက်ကို လက်နှစ်ဘက်ဖြင့် ကိုင် မြှောက်ထားသည့် အမျိုးသမီးပုံ ကြေးရုပ်တုဖြစ်ပြီး အောက်ခံအုတ်ခုံမှာ ၈၅ ပေခန့် မြင့်သည်။ လွတ်လပ်ရေးတိုက်ပွဲအတွက် အသက်စွန့်ခဲ့ကြသည့် သူရဲကောင်းများအား ရည်စူး၍ ၁၉၄၇ ခုနှစ်တွင် တည်ဆောက်ခဲ့ခြင်းဖြစ်ကြောင်းသိရသည်။

ရှေ့တစ်ပတ်တွင် ဆက်လက်ဖတ်ရှုပါရန် 

စင်္ကာပူကို ခြင်္သေ့မြို့တော်လို့ခေါ်ရတာဟာ မလေးရှားဘာသာစကားနဲ့ Singa (ခြင်္သေ့)နဲ့ Pura (မြို့တော်) ဆိုတာကိုပေါင်းပြီး Singapura လို့ခေါ်ရာကနေ အချိန် ကာလရွှေ့ပြောင်းလာတာနဲ့အမျှ Singapore ဆိုပြီး အမည်တွင်လာတာကြောင့်လို့ သိရပါတယ်။ ခြင်္သေ့မြို့တော်လို့ခေါ်တဲ့ စင်္ကာပူက မြန်မာတွေနဲ့ သိပ်တော့မစိမ်းပါဘူး။ စင်္ကာပူမှာ ပညာရေးကောင်းလို့ ကျောင်းထားကြတယ်။ လခကောင်းလို့ အလုပ်သွား လုပ်ကြတယ်။ ဆေးကုသမှုနည်းပညာတွေ တိုးတက်လို့ ဆေးသွားကုကြတယ်။ ဒီတော့ လည်း Singapore မှာ မြန်မာတွေများတာ မဆန်းပါဘူး။


စင်္ကာပူနိုင်ငံကသေးသေးလေးပါ။ သေးလွန်းလို့ နိုင်ငံနဲ့မြို့အတူတူဖြစ်နေတဲ့ နိုင်ငံတွေထဲက တစ်ခုပေါ့။ တချို့က စင်္ကာပူကို ကမ္ဘာ့အသေးဆုံးနိုင်ငံလို့တောင် ထင် ကြတယ်။ တကယ့်အသေးဆုံးနိုင်ငံကတော့ အီတလီနိုင်ငံ ရောမမြို့ထဲရှိနေတဲ့ ဗာတီ ကန်စီးတီးနိုင်ငံပါ။ စင်္ကာပူကတော့ ကမ္ဘာပေါ်မှာ နံပါတ်၂၀မြောက်အသေးဆုံးနိုင်ငံ ပေါ့။ အာရှတိုက်မှာဆိုရင်တော့ မော်ဒိုက်နိုင်ငံပြီးရင် ဒုတိယအသေးဆုံးနိုင်ငံပေါ့။ အကျယ်အဝန်းအားဖြင့် စတုရန်းမိုင်ပေါင်း ၂၇၇.၆မိုင်ရှိပါတယ်။
နိုင်ငံကသေးပေမဲ့ Tourism ကို အဓိကမှီခိုတဲ့နိုင်ငံဆိုတော့ ခရီးသည်တွေ များများလာအောင် Tourist Attraction တွေကို တစ်နှစ်ထက်တစ်နှစ်ပိုများလာအောင် တိုးချဲ့နေတာကိုလည်း တွေ့ရတယ်။ စင်္ကာပူမှာ သွားလည်စရာတွေ၊ လေ့လာစရာတွေ၊ ကစားကွင်းတွေ၊ ရှော့ပင်းစင်တာတွေ အများကြီးပါ။ ဆန်တိုဆာကတော့ အရင်က တည်းက နာမည်ကြီးခဲ့တဲ့ စင်္ကာပူနိုင်ငံရဲ့ အပန်းဖြေကျွန်းကြီးပေါ့။ လည်ပတ်စရာတွေ များလွန်းလို့ အကုန်နှံ့အောင်သာသွားမယ်ဆိုရင် ဆန်တိုဆာမှာတင် ၂ရက် - ၃ရက် ကတော့ အသာလေးပါပဲ။


ဆန်တိုဆာကျွန်းထဲမှာ စင်္ကာပူရောက်ရင် မသွားမဖြစ်သွားသင့်တဲ့ ကစားကွင်း Universal Studio၊ စိတ်လှုပ်ရှားဖွယ်ရာ စီးစရာတစ်ခုဖြစ်တဲ့ Skyline Luge၊ ရေပြင် ကျယ်ကြီးကို ဖြတ်ကာ တစ်ဖက်ကနေတစ်ဖက်ကို အရှိန်နဲ့ ကြိုးတန်းခိုစီးရတဲ့ Mega Zip၊ လင်းပိုင်လေးတွေနဲ့ အတူတူဆော့ကစားလို့ရတဲ့ Dolphin Island၊ သုံးဘက် မြင်ရုပ်ကြွ ပန်းချီကားတွေနဲ့ အသက်ဝင်နေတဲ့ Trick Eye Museum၊ ကမ္ဘာကျော် တွေနဲ့ အတူတကွ ဓာတ်ပုံရိုက်နိုင်တဲ့ Madame Tussauds Wax Museum၊ ကလေးတွေအတွက် Kidzania ၊ ရေအောက်သတ္တဝါမျိုးစိတ်ပေါင်း ၈၀၀ကျော်နဲ့ ငါးမန်းအကောင်ပေါင်း ၂၀၀ကျော်ရှိတဲ့ ကမ္ဘာ့အကြီးဆုံး ငါးပြတိုက်ကြီး S.E.A Aquarium၊ ရေလွှာလျှောစီးမျိုးစုံကစားနိုင်တဲ့ Adventure Cove စတာတွေ အများကြီးပါ။ ဆန်တိုဆာမှာ အာရှတိုက်ကုန်းမကြီးရဲ့ တောင်ဘက်အကျဆုံးနေရာလည်းရှိပါတယ်။ Palawan ကမ်းခြေလို့ခေါ်ပါတယ်။ တခြားကမ်းခြေတွေမှာလည်း အပန်းဖြေနိုင်ပါတယ်။


စင်္ကာပူနိုင်ငံရဲ့ ဂုဏ်ယူရတဲ့ နေရာနောက်တစ်ခုဆိုရင် Gardens by the Bay ပါပဲ။ ကမ္ဘာ့အကြီးဆုံး မှန်နဲ့လုပ်ထားတဲ့ ဖန်လုံအိမ်ဥယျာဉ်ကြီးဖြစ်တယ်လို့လည်း သိရ တယ်။ Flower Dome နဲ့ Cloud Forest ဆိုပြီး ဖန်လုံအိမ်နှစ်ခုခွဲထားပြီး Cloud Forest ထဲက ရေတံခွန်ကြီးက ကမ္ဘာ့အကြီးဆုံး မိုးလုံလေလုံ ရေတံခွန်ကြီးလို့လည်း သိရပါတယ်။ စင်္ကာပူနိုင်ငံရဲ့ ရှုခင်းကြည့်ချင်ရင်တော့ သင်္ဘောကြီးကို တိုက် ၃ လုံး ပေါ်တင်ထားသလို ဆောက်ထားတဲ့ Marina Bay Sands ဟိုတယ်ရဲ့ ၅၇ထပ်မှာရှိတဲ့ Sky Park Observation Deck ကနေ လှမ်းမြင်နိုင်မှာပါ။ စင်္ကာပူရဲ့ညအလှကိုတော့ စားသောက်ဆိုင်တွေ ဘားတွေနဲ့ စည်ကားလှတဲ့ Clarke Quay ဆိပ်ကမ်းကနေထွက်တဲ့ River Cruise စီးရင်း ရှုစားနိုင်ပါသေးတယ်။ နောက်ပြီး တိရစ္ဆာန်မျိုးစုံရှိတဲ့ Sin- gapore Zoo, Jurong Park ငှက်ဥယျာဉ်၊ ကမ္ဘာမှာ ထင်ရှားတဲ့ မြစ်ကြီးတွေနဲ့ မြစ်နား တဝိုက် တွေ့ရတတ်တဲ့ သတ္တဝါတွေကိုတွေ့ရမယ့် River Safari နဲ့ ညဘက်မှာ ကျင် လည်ကျက်စားတဲ့ တိရစ္ဆာန်တွေကို ပြသထားတဲ့ Night Safari တို့က တစ်နေရာထဲ မှာပဲ ကပ်ရပ်ရှိနေတော့ အဲ့နေရာတွေကိုပေါင်းပြီးလည်း သွားလည်လေ့ရှိ ကြပါတယ်။


စင်္ကာပူကို ကြိုက်တဲ့အချက်က အရမ်းသန့်ရှင်းလို့ပါ။ စည်းကမ်းလည်း အရမ်းရှိ တယ်။ Singapore ကို Gardens City ဥယျာဉ်မြို့တော်လို့လည်း ခေါ်ကြတယ်။ နေရာတကာမှာ သစ်ပင်တွေ မြက်ခင်းတွေ စိမ်းစိမ်းစိုစိုနဲ့ အရမ်းသာယာပါတယ်။ ပြီး တော့ Singapore က သွားရလာရ အဆင် ပြေတယ်။ လမ်းညွှန်တွေ၊ ဆိုင်းဘုတ်တွေကို English လိုပဲ ရေးထားတော့ ကိုယ့်ဟာ ကိုယ်သွားဖို့လွယ်တယ်။ Public Transport တွေ တအားကောင်းတယ်။ မြေအောက်ရထား MRT နဲ့ ဘတ်စ်ကားလိုင်းတွေ အများ ကြီးရှိပြီး သန့်လည်းသန့်တယ်။ အခု နောက်ပိုင်း စင်္ကာပူနိုင်ငံမှာ မြန်မာနိုင်ငံသားတွေ ဗီဇာကင်းလွတ်ခွင့်ရသွားပြီဆိုတော့ သွားရလာရပိုပြီးလွယ်ကူသွားလို့ နီးနီးနားနားသွား လည်သင့်တဲ့ နိုင်ငံတစ်ခုပဲဖြစ်ပါတယ်။

 

တရုတ်နိုင်ငံ ယူနန်ပြည်နယ်တောင်ဘက်စွန်း၊ မြန်မာနိုင်ငံ၊ လာအိုနိုင်ငံတို့နှင့် ကပ်လျက်တည်ရှိသည့် ဆစ်ဆောင်ပန်နား (Xishaungbanna) ကိုယ်ပိုင်အုပ်ချုပ်ခွင့် ရဒေသသည် သဘာ၀အလှနှင့် ရိုးရာယဉ်ကျေးမှုများကြောင့် ပြည်တွင်းပြည်ပ ခရီးသည်များအကြား ရေပန်းစားလျက်ရှိရုံသာမက ထေရဝါဒဗုဒ္ဓဘာသာကို ကိုးကွယ် သည့် ရှမ်းလူမျိုးများလည်း နေထိုင်ရာဖြစ်သဖြင့် စာရေးသူ အထူးစိတ်ဝင်စားခဲ့မိပါသည်။ များမကြာမီက တရုတ်နိုင်ငံတွင် တိုင်(Dai) (Tai) လူမျိုးများဟု သတ်မှတ်ထားသည့် ရှမ်းလူမျိုးများ အဓိကနေထိုင်ရာ ဆစ်ဆောင်ပန်နားဒေသ၏မြို့တော် ကျင်းဟောင် (Jinghong)မြို့နှင့် ယင်းအနီးရှိ ဖူအာ (Pu'er) မြို့သို့ စာရေးသူရောက်ခဲ့ပါသည်။


ဆစ်ဆောင်ပန်နားကို Sipsong Panna ဟုလည်း ရေးသားလေ့ရှိ၍ ထိုင်းဘာ သာစကားနှင့် ရင်းမြစ်တူသည့် Sipsong မှာ '၁၂' ဖြစ်၍ Pan က 'မြို့နယ်' နှင့် na က'ဆန်စပါး'ဟု အဓိပ္ပာယ်ရသည်။ ဆန်စပါးစိုက်ပျိုးသော မြို့နယ် ၁၂ ခု စုပေါင်းတည် ရှိရာဟု အဓိပ္ပာယ်ဖွင့်ဆိုနိုင်ပါသည်။ ၁၉၅၅ ခုနှစ်က စတင်၍ သတ်မှတ်ခဲ့သော ယင်း ကိုယ်ပိုင်အုပ်ချုပ်ခွင့်ရဒေသတွင် မဲခေါင်မြစ်(တရုတ်အခေါ် Lancang မြစ်)ကမ်းနံ ဘေးတွင်တည်ရှိသည့် ကျင်းဟောင်မြို့တော်၊ Menghai နှင့် Mengla ခရိုင်နှစ်ခု ပါဝင်ပါသည်။ ဆစ်ဆောင်ပန်နားတွင် လူဦးရေ ၁ သန်းခန့်ရှိပြီး တိုင်လူမျိုးတို့ အများ ဆုံးနေထိုင်ကာ ၃၀ ရာခိုင်နှုန်းခန့်ဖြစ်သည်။ ဒုတိယအများဆုံးမှာ ဟန် (တရုတ်)လူမျိုး တို့ဖြစ်၍ အခြားတိုင်းရင်းသားများလည်း နေထိုင်ကြသည်။ တိုင်(ရှမ်း)လူမျိုးတို့သည် ဆစ်ဆောင်ပန်နားဒေသနှင့် ယင်းအနီးတဝိုက် ယူနန်ပြည်နယ်အတွင်း၌ စုစုပေါင်း လူဦးရေ ၁ ဒသမ ၂ သန်းခန့် နေထိုင်၍ ထိုင်းနှင့် လာအိုနိုင်ငံတို့တွင် ၁ သိန်းခွဲခန့်စီ နေထိုင်ပြီး၊ ရှမ်းလူမျိုး စုစုပေါင်း ၈ သန်းခန့်ရှိရာ မြန်မာနိုင်ငံတွင် ၆ သန်းခွဲခန့် နေထိုင် ကြောင်း သိရပါသည်။ တိုင်လူမျိုးတို့သည် ရိုးရာယဉ်ကျေးမှုများကို ထိန်းသိမ်းထားကြ၍ ဆင်၊ ဒေါင်း စသည့် သတ္တဝါများကို အမြတ်တနိုးထားကြပြီး ခေတ်မီအဆောက်အ အုံများကိုပင် ရိုးရာဟန်များ ထည့်သွင်းတည်ဆောက်ကြကာ မြို့တွင်းရှိ လမ်းများတစ် လျှောက်ရိုးရာ အနုပညာလက်ရာများ ဖန်တီးအလှဆင်ထားသည်ကိုလည်း မြင်တွေ့ခဲ့ရ သည်။ နှစ်စဉ် ဧပြီလ ၁၃ ရက်မှ ၁၅ ရက်အထိ ရိုးရာသင်္ကြန်ပွဲတော်ကျင်းပလေ့ရှိ၍ ရေသဘင်ပွဲအပြင် နဂါးလှေပြိုင်ပွဲ၊ မီးပုံးပျံလွှတ်ပွဲ၊ မီးကျည်လွှတ်ပြိုင်ပွဲ စသည်တို့ကို လည်းထည့်သွင်း ကျင်းပလေ့ရှိသည်။ ထို့အပြင် အချို့ကလည်း ကဆုန်ညောင်ရေသွန်းပွဲကိုပင် ဆင်နွှဲကြကြောင်း သိရသည်။ Mengle ဘုရားကျောင်းဝင်းအတွင်းနှင့် တိုင်လူမျိုးတို့၏ အမျိုးသားဥယျာဉ်တို့၌ ရေသဘင်ပွဲတော် သရုပ်ပြပွဲကို ပြသလေ့ရှိရာ လာရောက်လေ့လာသူများကိုယ်တိုင် ပါဝင်ဆင်နွှဲနိုင်ကြောင်းသိရသည်။


ဆစ်ဆောင်ပန်နားဒေသ ကျင်းဟောင်မြို့တစ်ဝိုက်တွင် စေတီ၊ ဘုရားကျောင်း ကန်များစွာရှိ၍ ရုက္ခဗေဒဥယျာဉ်များလည်း ရှိသည်။ ယင်းတို့အနက် ၁၄၇၇ ခုနှစ်က တည်ဆောက်ခဲ့၍ တရုတ်နိုင်ငံတွင် အကြီးဆုံးသော ထေရဝါဒဗုဒ္ဓဘာသာ ဘုရား ကျောင်းဖြစ်သည့် Mengle မဟာဗုဒ္ဓဘုရားကျောင်းနှင့် ယင်းဥယျာဉ်အတွင်းရှိ ဗုဒ္ဓ ရုပ်ပွားတော်ကြီး၊ ၁၉၅၉ ခုနှစ်တွင် တည်ထောင်ခဲ့၍ ၁၁၀၀ ဟက်တာ ကျယ်ဝန်းပြီး အပင်မျိုးစိတ်ပေါင်း ၁၃၀၀၀ ခန့်ရှိသော တရုတ်နိုင်ငံ၌ အကြီးဆုံးနှင့် အပင်အများဆုံး ရုက္ခဗေဒဥယျာဉ်ဖြစ်သည့် ဆစ်ဆောင်ပန်နား အပူပိုင်းဒေသရုက္ခဗေဒဥယျာဉ်၊ တိုင် လူမျိုးတို့၏ ယဉ်ကျေးမှုနှင့် နေထိုင်ပုံများကို ပြသထားသည့် တိုင်အမျိုးသားဥယျာဉ်နှင့် ဒေါင်းဥယျာဉ်တို့သည် အဓိကသွားရောက်လေ့လာသင့်သည့်နေရာများပင်ဖြစ်ပါသည်။ ကျင်းဟောင်မြို့တွင် အပြည်ပြည်ဆိုင်ရာလေဆိပ်ရှိ၍ တရုတ်နိုင်ငံမြို့ကြီးများနှင့် ထိုင်း နိုင်ငံ ဘန်ကောက်မြို့၊ လာအိုနိုင်ငံ လွမ်ပရာဘွန်မြို့များသို့ ပြေးဆွဲလျက်ရှိပြီး ပြည် တွင်းပြည်ပခရီးသွား အများအပြားလာရောက်လေ့ရှိကာ မြန်မာနိုင်ငံနှင့်လည်း နီးကပ် စွာတည်ရှိနေသဖြင့် သွားရောက် လေ့လာသင့်သည့် စိတ်ဝင်စားဖွယ်နေရာတစ်ခု ဖြစ် ကြောင်း ညွှန်းဆိုလိုက်ရပါတော့သည်။

 

More Articles ...