ရခိုင်ပြည်နယ် သံတွဲခရိုင်၊ ငပလီ ကမ်းခြေမြို့၊ မြပြင်ရပ်ကွက်၊ မြရတနာ တောင်ထိပ်ပေါ်တွင် မြောက်ဦးခေတ် လက် ရာပုံစံတူ ပုထိုးတော်များတည်ထားကာ ခရီးသွားများကို ဆွဲဆောင်သွားမည် ဖြစ် ကြောင်း သံတွဲမြို့ ပြည်နယ်လွှတ်တော် ကိုယ်စားလှယ် ဦးဝင်းနိုင်က ဒီဇင်ဘာလ ၈ ရက်တွင် ပြောသည်။ ''ဒီပုထိုးတော်ကို ဒေသခံ ပြည်သူ တွေ ဖူးမြော်နိုင်ဖို့နဲ့ သာသနာပြန့်ပွားရေး အတွက် တည်ထားဖို့စီစဉ်ရတာ ဖြစ်ပါတယ်။ ပုထိုးတော်တည်ထားဖို့အတွက် အခုလုပ်ငန်းဆောင်ရွက်မှုတွေ စတင်လုပ်နေပါပြီ။ ဒီဇင်ဘာ ၄ ရက်က ပန္နက်တင်ပွဲ လုပ်ထားပါတယ်''ဟု ၎င်းက ပြောသည်။

14-12-2017myaik


မြောက်ဦး ခေတ်လက်ရာ ပုထိုးတော်များကို မြရတနာကျောင်း ဆရာတော်ကြီး အဂ္ဂမဟာ သဓမ္မဇောတိက ဘဒ္ဒန္တဝိမလ ဦးဆောင်မှုဖြင့်ဆောင်ရွက်ခြင်းဖြစ်ကာ နိုင်ငံသားခရီးသွားများကို ဆွဲဆောင်ရန်၊ သာသနာပြန့်ပွားရန် နှင့် ရခိုင်အမျိုးသားအချင်းချင်း ချစ်ခင်ရင်းနှီးမှုကိုတည်ဆောက်ရန်အတွက် ရည်ရွယ်ဆောင်ရွက်ခြင်း ဖြစ်ကြောင်း သိရသည်။ အဆိုပါ မြရတနာဆုတောင်းပြည့် ပုထိုးတော်ကြီးတည်ဆောက်မှုကို ဉာဏ်တော် အမြင့် ၄၅ ပေ၊ အောက်ခြေ ဂူ၀အမြင့် ၁၂ ပေရှိမည် ဖြစ်သဖြင့် ပုထိုးတော် အမြင့်ပေ စုစုပေါင်း ၅၇ ပေ ရှိမည် ဖြစ်ကာ အရန်ပုထိုးတော်ငယ် များစွာဖြင့် နှစ်နှစ်အတွင်းအပြီးတည်ဆောက်ရန် စီစဉ်ထားကြောင်း မြပြင်ဂေါပက အဖွဲ့အတွင်းရေးမှူး ဦးမြင့်ဇော်က ပြောသည်။ ရခိုင်ပြည်နယ်မြောက်ဦးမြို့တွင် လွန်ခဲ့သောနှစ် ၆၀၀ ခန့်က တည်ထားခဲ့သည့် သမိုင်းဝင်စေတီပုထိုးများကို မြင်တွေ့နိုင်မည်ဖြစ်ကာ စေတီ၊ ပုထိုး၊ ဘုရား၊ ပိဋကတ်တိုက်၊ သိမ်အစရှိသည့် ရှေးဟောင်းအဆောက်အအုံ ၃၀၀ ကျော် တည်ရှိသည့်အနက် သျှစ်သောင်း ပုထိုးတော်၊ ကိုးသောင်း ပုထိုးတော်၊ ထုက္ကန်သိမ်ပုထိုးတော်၊ အံတော်သိမ်ပုထိုးတော်တို့သည် အထူးထင်ရှားပြီး ရခိုင်ယဉ်ကျေးမှုနှင့် ဆက်နွှယ်နေသည့် ဘာသာရေးအဆောက်အအုံများဖြစ်ကြောင်း သိရသည်။ ယခုအခါ ပြည်တွင်း၊ ပြည်ပမှ ဘုရားဖူးဧည့်သည်များအနေဖြင့် မြောက်ဦးမြို့ ရှေးဟောင်းသုတေသန ပြတိုက်တွင် ရှေးရခိုင်လူမျိုးများ၏ ရှေးဟောင်း ဗိသုကာ လက်ရာများ၊ အနုပညာလက်ရာများနှင့် အသုံးအ ဆောင်ပစ္စည်းလက်ရာများကို လာရောက်လေ့လာများရှိကြောင်း သိရသည်။

ရှိန်းဝင်းထိုက် (သတင်း၊ ဓာတ်ပုံ)

17777

ရွှေအိုရောင်သန်းနေတဲ့ နေထွက်ချိန်မှာ တောင်တွေဟာ အထပ်လိုက် အထပ်လိုက်၊ ပုစွန်ဆီရောင်သမ်းနေတဲ့ ညနေဆည်းဆာမှာ တိမ်ပင်လယ်တွေဟာ အလိပ်လိုက် အလိပ်လိုက်၊ စိမ်းလန်းနေတဲ့ တောအုပ်ထဲ ပန်းနုရောင်ချယ်ရီပန်းတွေ အဆုပ်လိုက် အဆုပ်လိုက်။ ဒီလိုလှပတဲ့ တောတောင်ရေမြေရှုခင်းတွေရှိတဲ့ ချင်းပြည်နယ်တောင်တန်းတွေဆီ ကျွန်မအရင်တစ်ပတ်က အလည်ရောက်ခဲ့ပါတယ်။ သုခလမ်းညွှန် Tour ရဲ့ အစီအစဉ်နဲ့ပါ။
ချင်းပြည်နယ်ဆိုရင် တောင်ဇလပ်ပန်းနီနီ၊ ထင်းရူးပင်အစီအရီ၊ သစ်ခွ၊ ချယ်ရီ စတဲ့ သဘာဝအလှတွေ မြင်ယောင်မိသလို အသည်းပုံသဏ္ဏာန်ရိဒ်ရေကန်၊ အဆင့်ပေါင်း၇ဆင့်ရှိတဲ့ ဘုံတလာရေတံခွန်နဲ့ ပါးရဲထိုးချင်းအမျိုးသမီးတွေကိုလည်း မြင်ယောင်မိကြမှာပါ။ ဒီအရာတွေအပြင်ချန်မထားသင့်တာကတော့ နတ်မတောင်ပါပဲ။ ချင်းပြည်နယ်ရဲ့အမြင့်ဆုံးတောင် ခေါနူးစုမ်ဟာ အရှေ့တောင်အာရှမှာ အမြင့်ဆုံး မြေသားတောင်လည်းပဲဖြစ်ပါတယ်။ နတ်မတောင်မှာ အမည်အမျိုးမျိုးရှိနေပါတယ်။ အင်္ဂလိပ်ကိုလိုနီခေတ်က အင်္ဂလန်ဘုရင်မကြီးကို ဂုဏ်ပြုတဲ့အနေနဲ့ ဝိတိုရိယတောင် (Mount Victoria)လို့ အမည်ပေးခဲ့ပြီး ချင်းအခေါ်အဝေါ်ကတော့ ခေါနူးစုမ်တဲ့။ မြန်မာလို မြေကမ္ဘာရဲ့ မိခင်နတ်သမီးလို့ အဓိပ္ပါယ်ရနေတော့ အနီးစပ်ဆုံး နတ်မတောင်လို့ မြန်မာလိုအမည်ပေးခဲ့ကြတာပါ။
နတ်မတောင်က ပင်လယ်ရေ အမြင့်ပေ ၁၀၀၁၆ပေ (၃၀၅၃ မီတာ) ရှိပြီး ကချင်ပြည်နယ်ရှိ ခါကာဘိုရာဇီ၊ ဂန်လန်ရာဇီတောင်တွေပြီးရင် မြန်မာပြည်ရဲ့တတိယမြောက် အမြင့်ဆုံးတောင်လည်းပဲ ဖြစ်ပါတယ်။ ဧရိယာ အကျယ်အဝန်းအားဖြင့် ကန်ပက်လက်၊ မင်းတပ်၊ မတူပီ သုံးမြို့နယ်အတွင်းကျရောက်နေတာပါ။ သွားခဲ့တဲ့လမ်းကြောင်းကတော့ ရန်ကုန်ကနေ ပုဂံ၊ ညောင်ဦးဆီ လေယာဉ်နဲ့ ဒါမှမဟုတ် ကားနဲ့အရင်သွားပြီးမှ နတ်မတောင်နဲ့ အနီးဆုံးကန်ပက်လက်မြို့ကို ဆက်သွားရတာပါ။ ပုဂံကနေ ချောက်မြို့၊ ဆောမြို့တို့ကို ဖြတ်ပြီး ကားလမ်းအတိုင်း ကြာချိန် ခြောက်နာရီလောက်မောင်းရပါတယ်။ ကန်ပက်လက်မြို့လေးမှာ တစ်ညနားပြီး နောက်တစ်နေ့မနက်စောစောမှာ တောင်တက်ပါတယ်။ ကန်ပက်လက်မြို့လေးကနေ ၁ဝမိုင် လောက်မောင်းရင်ရောက်တဲ့ တောင်ခြေစခန်းကနေ ဆိုင်ကယ်နဲ့ နာရီဝက်လောက်မောင်းတက်ရပါတယ်။ လမ်းလျှောက်တက်မယ်ဆိုရင်တော့ ၃နာရီလောက်ကြာနိုင်ပါတယ်။ များသောအားဖြင့် ဆိုင်ကယ်နဲ့တောင်ပေါ်တက်ပြီး လမ်းလျှောက်ပြန်ဆင်းကြတယ်။ ကျွန်မတို့ကတော့ ဆိုက်ကယ်နဲ့တဝက်လောက်ထိဆင်းပြီး တောလမ်းအတိုင်း Trekking လျှောက်ခဲ့ကြပါတယ်။
ကျွန်မတို့ရောက်တဲ့အချိန်က တောင်ဇလပ်ပွင့်ချိန်မဟုတ်တော့ နတ်မတောင်ပေါ် တောင်ဇလပ်ပန်းတွေ မတွေ့ခဲ့ရဘူး။ ဒီဇင်ဘာလနဲ့ ဇန်နဝါရီလမှာဆိုရင်တော့ တောင်တွေမှာ အနီရောင် တောင်ဇလပ်ပန်းတွေ အဆုပ်လိုက်အဆုပ်လိုက်နဲ့ အရမ်းကို လှနေလေရောတဲ့လေ။ တောင်ဇလပ်ပန်းတွေက အနီရောင်အပြင် အဖြူရောင်နဲ့ အဝါရောင်တွေပါရှိတာတဲ့။ အနီရောင်တောင်ဇလပ်ပန်းတွေက အပင်မြင့်တွေမှာ ပွင့်တာဖြစ်ပေမဲ့ အဝါရောင်တွေကတော့ ချုံပုတ်လိုအပင်တွေမှာပွင့်တာ။ အမြင့်ပေ ၉၀၀၀ နဲ့ ၁၀၀၀၀ကြားမှာပဲ ပွင့်တာတဲ့လေ။ တောင်ပေါ်မှာ ရှားပါးအပင်တွေ၊ သတ္တဝါမျိုးစိတ်တွေရှိနေပြီး Burmese Tit နဲ့ မျက်ခုံးဖြူ ငှက်ပြာခြောက် (White Browed Nuthatch)လို့ခေါ်တဲ့ ငှက်မျိုးစိတ်တွေက တစ်ကမ္ဘာလုံးမှာ မြန်မာပြည်နတ်မတောင်မှာပဲ ရှိတာလို့သိရပါတယ်။ အာဆီယံအမွေအနှစ်ဥယျာဉ် (ASEAN Heritage Park) ဖြစ်တဲ့ နတ်မတောင်အမျိုးသားဥယျာဉ်ကြီးအတွင်းက တောင်ထိပ်မှာ စကျင်ကျောက်ဘုရားဆင်းတုတစ်ဆူ၊ စေတီတစ်ဆူနဲ့ လက်ဝါးကပ်တိုင်တစ်ခုပဲရှိတယ်။ ဟိုတယ်မရှိ၊ စားသောက်ဆိုင်မရှိ သဘာဝနဲ့ တစ်သားတည်းကျနေတာ။ တောင်ပေါ်က မြက်ခင်းပေါ်ထိုင်ချပြီး တောတောင်သဘာဝအလှတွေခံစားရတာ တကယ်ကြည်နူးဖို့ကောင်းပါတယ်။
ချယ်ရီပန်းတွေ ဝေဆာနေတဲ့ ကန်ပက်လက်မြို့ထဲမှာ ပါးရဲထိုးချင်းအမျိုးသမီးကြီးက ချင်းရိုးရာ ဆေးတံကြီးသောက်ပြ၊ နှာခေါင်းနဲ့ပုလွေမှုတ်ပြ၊ ရိုးရာတူရိယာတွေတီးမှုတ်ပြလေရဲ့။ ချင်းလူမျိုးတွေမှာ လူမျိုးစုပေါင်း ၅၀ကျော်ရှိတဲ့အနက် သူက ဒိုင်းလူမျိုးစုတဲ့။ တောင်ပေါ်က ပြန်အဆင်း ကန်ပက်လက်မှာအိပ်ပြီး မင်းတပ်မြို့နဲ့ မတူပီမြို့ကို ဆက်သွားလည်းရတယ်။ မင်းတပ်မြို့နားမှာက တစ်ရွာလုံးနီးပါးရှိ ချင်းအမျိုးသမီးကြီးတွေ ပါးရဲထိုးထားတဲ့ လွန်းပဲကျေးရွာဆီ Trekking လျှောက်နိုင်သလို မိုင်၁၀၀ကျော်အကွာရှိ မတူပီမြို့ဆက်သွားကာ မတူပီမြို့အနားမှာ ရှိတဲ့ ဘုံတလာရေတံခွန်ကြီးဆီပါ တစ်ဆက်တည်း သွားလည်နိုင်ပါတယ်။
သဘာဝအလှတွေနဲ့ ပြည့်နေတဲ့ ချင်းပြည်နယ်က မတူညီတဲ့ယဉ်ကျေးမှုတွေနဲ့ စိတ်ဝင်စားစရာပါ။ လမ်းပန်းဆက်သွယ်ရေးသာ ကောင်းလိုက်ရင် ခရီးသွားလုပ်ငန်း ဘယ်လောက်များ ဖွံ့ဖြိုးတိုးတက်လိုက်လေမလဲလို့လည်း တွေးမိပါတယ်။

ဒေါက်တာနုမြတ်သိင်္ဂီဦး

အမေရိကန်နိုင်ငံ အီလီနွိုက်စ်ပြည် နယ် ချီကာဂိုမြို့တွင်နေထိုင်သည့်အသက် ၇၃ နှစ်အရွယ်ဒွန်ဖာရစ်သည် မြောက်ကိုရီးယားအပါအဝင် နိုင်ငံပေါင်း ၁၉၃ နိုင်ငံရှိ နေရာပေါင်း ၈၅၂ ခုသို့သွားရောက်လည်ပတ်ခဲ့သည့်အတွက် ကမ္ဘာ့ ခရီးသွားလာမှုအများဆုံးပုဂ္ဂိုလ်အဖြစ် သတ်မှတ်ခံခဲ့ရကြောင်း သိရသည်။
ဒွန်ဖာရစ်သည် ဆွစ်ဇာလန်ရှိ ဒေသ စိတ်နယ်မြေပေါင်း ၂၆ ခု၊ဂျာမနီရှိပြည် နယ်ပေါင်း ၁၆ ခု၊ရုရှားသို့ ၁၃ ကြိမ်လည်ပတ်ရာတွင် ဒေသပေါင်း ၈၅ ခုအထိ ရောက်ရှိခဲ့သည်။ ၁၉၆၅ ခုနှစ်က ဂျာမနီ၌ သတ္တုစက်ရုံတစ်ခုအတွင်းအလုပ်လုပ်ကိုင်စဉ် မက္ကဆီကိုသို့ပထမဆုံးခရီးစ ထွက်ခဲ့ခြင်းဖြစ်သည်။နောက်ပိုင်းတွင် အခြားသူများအတွက် စိတ်ကူးယဉ်ရုံသာ တတ်နိုင်သည့်ကမ္ဘာ့ကြီး၏နေရာအချို့ကို ပင် အခြားစွန့်စားခန်းထွက်သူများနှင့်အ  တူရောက်ရှိခဲ့သည်။ မြောက်ကိုရီးယားသာမက ဆိုမာလီယာ၊မဒါဂါစကာ၊ပါကစ္စတန် နှင့်အာဖဂန်နစ္စတန်ကြားမှ ခီဘာလမ်းမ ကြီး၊ဖင်လန်နိုင်ငံမှအာတိတ်စက်ဝိုင်းတို့ အထိပင်သွားရောက်ခဲ့သည့် ဒွန်ဖာရစ် သည် မိန်းမနှင့်သားသမီးများမရှိသူဖြစ်သည်။ ဒွန်ဖာရစ်က မည်သည့်အခါမှခရီး ထွက်ခြင်းကိုရပ်တန့်သွားမည်မဟုတ်ဟု ဆိုထားပြီး ယခုအခါ ဖီဂျီနိုင်ငံ ကွန်းဝေး သန္တာကျောက်တန်းသို့ရောက်ရှိနေသည်ဟု သိရသည်။
(DM, 1.12.2017)

ချင်းပြည်နယ်တွင် ပြည်တွင်းပြည်ပ ခရီးသွားများ ဝင်ရောက်မှုများသော အသည်းပုံသဏ္ဌာန် ရိဒ်ရေကန်ကို ၂၀၁၈ ခုနှစ် အတွင်း အာဆီယံရှေးဟောင်းအမွေ အနှစ် ဒေသအဖြစ် အသိအမှတ်ပြုရန် ဆောင်ရွက်မည်ဖြစ်ကြောင်း ချင်းပြည် နယ်လွှတ်တော်ဥက္ကဋ္ဌ ဦးဇိုဘွဲကနိုဝင်ဘာ လ၂၄ ရက်တွင်ပြောသည်။ မြန်မာနိုင်ငံ၏ အနောက်မြောက် ဘက်ဒေသ၊ ချင်းပြည်နယ်၏ အနောက် မြောက်ဘက် ဖလမ်းမြို့နယ်အတွင်းရှိ ရိဒ်ရေကန်သည် မြန်မာ-အိန္ဒိယနယ်စပ် မျဉ်း နှင့် နှစ်မိုင်အကွာပင်လယ်ရေမျက်နှာ ပြင်အထက် အမြင့် ၂၉၆၆ ပေ၌ တည် ရှိသော ထူးခြားသည့် ရေကန်ဖြစ်သည်။


အလွန်လှပ
''အခု တပ်မတော်က အဲ့ဒီနေရာကို သိမ်းထားတာဖြစ်လို့ အာဆီယံရှေး ဟောင်းအမွေအနှစ် ဒေသအဖြစ်လုပ်ရအောင် ပြည်နယ် အစိုးရကနေပြန်တောင်း ထားပါတယ်။ တပ်မတော်ကလည်း ပြန် ပေးမှာပါ။ ပြန်ပေးပြီးမှလည်း လုပ်လို့ရမှာ ပါ။ ရိဒ်ရေကန်က အရမ်းလှသလို သဘာ ၀ ပတ်ဝန်းကျင်အနေအထားကလည်း ကောင်းတော့ ခရီးသွားလာရောက်မှုများပါတယ်''ဟု ၎င်းက ပြောသည်။
ဒဏ္ဍာရီမျိုးစုံ၊ ဆန်းပြားသော ယုံ ကြည်မှု၊ ထူးခြားမှုများဖြင့်နာမည် ကျော်ကြားသော ရိဒ်ရေကန်သည် အိန္ဒိယ နိုင်ငံဘက် ကြံဖိုင်းမြို့ နှင့် မိုင် ၂၀ ဝေးပြီး မီဇိုရမ်ပြည်နယ်ရှိ မြို့တော် အိုက်ဇောနှင့် လည်း မိုင် ၁၃၀ သာဝေးသောကြောင့် လာရောက်လည်ပတ်သူများတွင် အိန္ဒိယနိုင်ငံ ဘက်ကပို၍များကြောင်း သိရသည်။''ထူးခြားမှုတွေပိုင်ဆိုင်ထားတာ ကြောင့် အာဆီယံရှေးဟောင်းအမွေအနှစ် စာရင်းထည့်သွင်းခွင့်ရဖို့ လုပ်နေတာပါ။ ရေကန်က တောင်တန်းတွေပေါ်မှာရှိနေ ပေမယ့် ရေခန်းခြောက်မှုမရှိသလို ဘေး ပတ်လည်မှာလည်း အံ့ဩဖွယ်ရာတွေရှိတယ်''ဟု ချင်းပြည်နယ်ယဉ်ကျေးမှုဌာနမှတာဝန်ရှိသူတစ်ဦးကပြောသည်။


အသည်းနှလုံးပုံသဏ္ဌာန်
အသည်းနှလုံးပုံသဏ္ဌာန် ရိဒ်ရေ ကန်ကို အေဒီ ၁၅၀၀ ခန့်တွင် စတင်တွေ့ ရှိခဲ့သည်ဟု ခန့်မှန်းထားကာ အေဒီ၁၅၀၀ -၁၆၀၀ ကြားတွင် ချင်းအနွယ်ဝင် ဆေး ပွီး မြို့သူကြီး၏သား ဦးဇခူးမာဆိုသူက ရိဒ်ရေကန်၏ အရှေ့ဘက်ရှိ တောင်ကုန်း ပေါ်တွင် ရိခေါဒါရ် (Rihkhawdar)ရွာကို တည်ထောင်ခဲ့ကြောင်းသိရသည်။ ချင်း ပြည်နယ်သည် ဘင်္ဂလားဒေ့ရှ်၊ အိန္ဒိယ နိုင်ငံများနှင့် နယ်နိမိတ်ချင်း ထိစပ်လျက် ရှိပြီး ရှားပါးငှက်မျိုးစိတ်များ၊ သဘာ၀ ပေါက်ပင်နှင့် သစ်ပင်ပန်းမန်များ၊ သဘာ ၀ရေကန်များ၊ လိပ်ပြာများနှင့် တောရိုင်း တိရစ္ဆာန် များကို လေ့လာနိုင်သည့်အပြင် ဒေသခံ တိုင်းရင်းသားမျိုးနွယ်စုများ၏ဓလေ့ စရိုက်များနှင့် နေထိုင်မှုပုံစံများ၊ ယဉ်ကျေး မှု ဓလေ့ထုံးတမ်းများ၊ ဝတ်စား ဆင်ယင်ပုံ များကိုပါ လေ့လာနိုင်သောဒေသတစ်ခု ဖြစ်ကြောင်း သိရသည်။

ရှိန်းဝင်းထိုက်

ရှမ်းပြည်တောင်ပိုင်းအင်းလေးဒေသသို့ လာရောက်သူများ လွိုင်ကော်သို့ စက်လှေဖြင့် ဝင်ရောက်နိုင်သော ခရီးစဉ်သစ်တစ်ခုကို မကြာမီအကောင်အထည်ဖော်ဆောင်ရွက်သွားမည် ဖြစ်ကြောင်း ကယားပြည်နယ်အစိုးရအဖွဲ့မှ ယခုလ ၂၄ ရက်တွင် သိရသည်။
အဆိုပါအစီအစဉ်ကို ကယားပြည်နယ်အတွင်း ပြည်တွင်းပြည်ပ ခရီးသွားများကို ပိုမိုဆွဲဆောင်နိုင်ရန်အတွက် ဆောင်ရွက်ခြင်းဖြစ်ကာ အင်းလေးမှတစ်ဆင့် လွိုင်ကော်-မိုးဗြဲ-ဖယ်ခုံ ရေလမ်းကြောင်းဖြင့် ဝင်ရောက်နိုင်မည်ဖြစ်ကြောင်း သိရသည်။ ''အရင်က မိုးဗြဲရေတံခါးကြံ့ခိုင်မှုနဲ့ပတ်သက်လို့ အဖွင့်အပိတ်မလုပ်နိုင်လို့ ရပ်ထားတာပါ။ ဒါကို အစိုးရအဖွဲ့ရယ် သက်ဆိုင်ရာတာဝန်ရှိသူတွေညှိ နှိုင်းဆောင်ရွက်မှုကြောင့် ရသွားပါပြီ။ စက်လှေဖြတ်သန်းသွားလာနိုင်ရေးကိုလည်း ဝန်ကြီးချုပ်နဲ့ တာဝန်ရှိသူတွေ လေ့လာထားပါတယ်''ဟု ကယားပြည်နယ်အစိုးရအဖွဲ့မှ တာဝန်ရှိသူတစ်ဦးက ပြောသည်။ ရေလမ်းကြောင်းဖြင့် သွားရောက်လည်ပတ်ရာတွင် အင်းလေးမှဖယ်ခုံအထိ လေးနာရီခန့် ကြာမြင့်နိုင်မည်ဖြစ်ကာ ခရီးသွားဧည်သည်များ လုံခြုံရေးနှင့် ခရီးစဉ်ဖွံ့ဖြိုးတိုးတက်ရေး အစီအမံများ ကို ချမှတ်ဆောင်ရွက်သွားမည်ဖြစ်ကြောင်း သိရသည်။ ''ခရီးသွားလုပ်ငန်းကို ဆွဲဆောင်နိုင်မယ့်အစီအစဉ်မျိုးစုံကို ကျယ်ကျယ်ပြန့်ပြန့်ဆောင်ရွက်နေတာရှိပါတယ်။ ရှမ်းနဲ့ကယားနယ်စပ်နားက ရွာတွေမှာလည်း လည်ပတ်ရင်းနဲ့ မိုးချုပ်သွားရင် ညအိပ်တည်းခိုနိုင်အောင်ရယ်၊ ရပ်ရွာအခြေပြုခရီးသွားလုပ်ငန်းဆောင်ရွက်နိုင်အောင်စီစဉ်နေပါတယ်။ အထူးသဖြင့် ထိုင်းနယ်စပ်ဘက်က ခရီးသည်တွေ ဝင်ရောက်လည်ပတ်မှုတွေ ပြုလုပ်စေဖို့ ဆောင်ရွက်နေပါတယ်''ဟု ဟိုတယ်နှင့်ခရီးသွား ညွှန်ကြားမှု ဦးစီးဌာန၊လွိုင်ကော်ရုံးတာဝန်ခံ ဦးလင်းဇော်ထွဋ်က ပြောသည်။

ရှိန်းဝင်းထိုက် (သတင်း၊ ဓာတ်ပုံ)

More Articles ...