ဒူဘိုင်းတွင် သုံးဖက်မြင်ပုံထုတ် စက်ဖြင့် ထုတ်လုပ်ထားသည့်ကမ္ဘာ့ပထမ ဦးဆုံး ရုံးအဆောက်အအုံသည် တည် ဆောက်ချိန်၁၇ ရက်သာ ကြာမြင့်သည်ဟု ဒီဇိုင်းထုတ်လုပ်ရေးမှူးများကဂုဏ်ယူဝင့်ကြွားစွာ ဆိုသည်။ သုံးဘက်မြင် ပုံထုတ် စက်ဖြင့်ထုတ်လုပ်ထားပြီး အပြည့်အဝ အသုံးပြု၍ရသည့် အထက်ပါအဆောက် အအုံဖွင့်ပွဲကိုခမ်းနားကြီးကျယ်စွာ ပြုလုပ် ခဲ့ပြီးအာရပ်စော်ဘွားများပြည်ထောင်စု၏ ဒုသမ္မတနှင့် ဝန်ကြီးချုပ်ဖြစ်သူ ရှိတ်ခ် မိုဟာမက်ကိုယ်တိုင် တက်ရောက်ခဲ့သည်။
ယင်းအဆောက်အအုံသည် ဗိသု ကာနှင့် အင်ဂျင်နီယာဆိုင်ရာ အောင်မြင်မှု ကြီးတစ်ရပ်ဖြစ်သည်။ ဒူဘိုင်းအနာဂတ် ဖောင်ဒေးရှင်းက ယင်းအဆောက်အအုံ တွင် ရုံးခန်းဖွင့်လှစ်ထားပြီဖြစ်သည်။ အဆောက်အအုံအတွင်းပိုင်းမှာလည်း သပ်ရပ်ခမ်းနား လှပလှသည်။ ရေ၊မီး အပြင်လေးအေးပေးစက်လည်း တပ်ဆင် ထားသည်။ ရုံးအတွက် လိုအပ်သည့် အစိတ်အပိုင်းအားလုံးကို အမြင့် ပေ ၂၀၊ အလျား ပေ ၁၂၀ နှင့်အနံ ပေ ၄၀ ရှိသည့် သုံးဖက်မြင်ပုံထုတ်စက်ဖြင့် ထုတ်လုပ်ခဲ့ သည်။ စက်ဖြင့်ထုတ်လုပ်ပြီးသား အစိတ် အပိုင်းများကို တပ်ဆင်ရာတွင် လုပ်သား အင်အား ခုနစ်ဦးသာ အသုံးပြုခဲ့သည်။ လျှပ်စစ်နှင့်အခြားသောကျွမ်းကျင်ဝန် ထမ်းပေါင်း ၁၀ ဦးက အဆောက်အအုံတွင် လိုအပ်သည့် အရာများကို တပ်ဆင်ပေး ခဲ့ကြသည်။ ထို့ကြောင့်သမားရိုးကျနည်းလမ်းများဖြင့် တည်ဆောက်ခြင်းထက် လုပ်သားကုန်ကျစရိတ်၅၀ ရာခိုင်နှုန်း သက်သာမည်ဟု ဒူဘိုင်းမီဒီယာရုံးက ခန့် မှန်းသည်။
( DM, 7.10.17)

တောင်ကိုရီးယားကုမ္ပဏီ LG က နှုန်းလွန်အသံလှိုင်းများကို အသုံးပြုကာ ခြင်များ အနားမကပ်နိုင်အောင် လုပ် ဆောင်ပေးနိုင်သည့် ကမ္ဘာ့ပထမဆုံး ခြင် ပြေးစမတ်ဖုန်းကို အိန္ဒိယတွင် စတင် ရောင်းချသွားမည်ဖြစ်သည်ဟု သိရသည်။
ပြီးခဲ့သည့်ရက်သတ္တပတ်က ကျင်းပသည့် India Mobile Congress တွင် LG K7I စမတ်ဖုန်းကိုပြသခဲ့ပြီး အစော ပိုင်းတုံ့ပြန်မှုများအရ ခြင်များသည့်နိုင်ငံ များတွင် ရောင်းအားကောင်းနိုင်သည်ဟု ခန့်မှန်းရသည်။ LG ၏ခြင်ပြေးစမတ်ဖုန်း သည် ဓာတုဗေဒပစ္စည်းအသုံးမပြုထားသည့်အပြင် ပြန်လည်ဖြည့်တင်းစရာ လည်း မလိုအပ်ဘဲ ဖုန်း၏နောက်ကျောရှိ ဆန်ကွက်စပီကာမှ ထုတ်လွှတ်ပေးသည့် 30KHz နှုန်းလွန်အသံလှိုင်းသည် ခြင်များကို မောင်းထုတ်ပေးမည်ဖြစ်သည်။ အိမ်၏ မည်သည့်နေရာတွင်မဆို ထောင် ထား၍ ခြင်ပြေးစေရန် အသုံးပြုနိုင်ရန် အထူးပြုလုပ်ထားသည့် ဖုန်းနောက်ပိုင်း Cover နှင့်အတူ ဖုန်းတင်သည့်ခုံငယ်လေးကိုပါထည့်သွင်းပေးထားသည်။ နှုန်းလွန် အသံလှိုင်းများသည် ခြင်များကိုနှိမ်နှင်းရာ တွင် အလွန်အစွမ်းထက်ပြီး လူသားများအ တွက် အန္တရာယ်ကင်းစိတ်ချရသည်ဆို၏။ သို့သော် အမေရိကန်ခြင်ထိန်းချုပ်ရေး အဖွဲ့က သုတေသနပေါင်း ၁၀ ခုကို ကိုးကား၍ ပြီးခဲ့သည့် ၁၅ နှစ်အတွင်း နှုန်း လွန်အသံလှိုင်းများသည် ခြင်များကို ထိ ရောက်စွာ မောင်းထုတ်ပေးနိုင်ခြင်းမရှိဟု ဆိုခဲ့သည်။ သို့သော် LG က ၎င်းတို့၏ ခြင်ပြေးနည်းပညာသည် အကြိမ်ပေါင်း များစွာစမ်းသပ်၍ အိန္ဒိယနိုင်ငံတကာဇီ၀ နည်းပညာဗေဒနှင့် အဆိပ်အတောက်ဗေဒဆိုင်ရာတက္ကသိုလ်၏ အသိအမှတ်ပြုမှု ကိုလည်းရရှိထားသည်ဟု ဆိုသည်။ LG က အိန္ဒိယတွင် အောင်မြင်မှုရရှိခဲ့သည် ဆိုပါက အင်ဒိုနီးရှားနှင့် ထိုင်းကဲ့သို့သော နိုင်ငံများတွင် ဈေးကွက်တိုးချဲ့ရောင်းချ သွားမည်ဟု ဆိုခဲ့ကြောင်း သိရသည်။
(OC,6.10.17)

မန်ချက်စတာ၊ ထရက်ဖို့ဒ်မြို့က Holiday Inn Express ဆိုတဲ့ ဟိုတယ် က ကွန်တိန်နာတွေ ရာနဲ့ချီထပ်ပြီး တည် ဆောက်ထားတဲ့ ပထမဆုံးသောဟိုတယ် အဆောက်အအုံဖြစ်ပါတယ်။ စတီးလ် ကွန်တိန်နာခန်းတွေကို ဟိုတယ်ခန်းတွေ အဖြစ် ဖွဲ့စည်းတည်ဆောက်ထားတာဖြစ် ပါတယ်။ ကွန်တိန်နာခန်းတွေကို အရှေ့ အနောက်နှစ်ဖက်ခွဲနေရာချထားပြီး နှစ် ဖက်ကြားအလယ်နေရာမှာ လျှောက်လမ်း ထားတဲ့ ပုံစံမျိုးဖြစ်ပါတယ်။ တစ်ဖက်စီမှာ ကွန်တိန်နာခန်းငယ်လေးတွေ ဘေးကပ် လျက်စီတန်းချသွားပြီး တစ်ထပ်ပြီး တစ် ထပ် ထပ်ဆင့်သွားကာ ဟိုတယ်အ ဆောက်အအုံကြီးအဖြစ် ဖန်တီးထားခဲ့တာ ဖြစ်ပါတယ်။ Chapman Taylor ဗိသု ကာအဖွဲ့က ဒီဇိုင်းရေးဆွဲပြီး ဟိုတယ်ရဲ့ အဓိကဆွဲဆောင်မှုအဖြစ် ကွန်တိန်နာ တွေကို အသားပေးတည်ဆောက်ထားခဲ့ တာဖြစ်ပါတယ်။ ပရိဘောဂတွေ၊ အခင်း အကျင်းတွေ၊ ကော်ဇောတွေ၊ ခန်းဆီး လိုက်ကာတွေနဲ့ ကြမ်းပြင်ကနေ မျက် နှာကြက်ထိ နံရံကပ်စက္ကူတွေပါတဲ့ အ တွင်းပိုင်း ပြင်ဆင်မွမ်းမံထားပြီးသား ကွန် တိန်နာခန်း ၂၂၀ကို ထပ်ဆင့်ဖွဲ့စည်းကာ တစ်လအတွင်းနဲ့တည်ဆောက်ခဲ့တဲ့ ဟို တယ်ဖြစ်တယ်လို့သိရပါတယ်။ ကွန်တိန် နာခန်းတစ်ခုနဲ့တစ်ခုကြားမှာ ရေငွေ့ထိန်း အလွှာနဲ့ ရေလုံကာချပ်ပြားတွေဆင်ထား တယ်လို့လည်းသိရပါတယ်။
(IHT, 7.10.17)

အိန္ဒိယနိုင်ငံတော်ဗဟိုတရားရုံးချုပ်က လေထုညစ်ညမ်းမှုကိုကာကွယ်ရန် လာမည့်ဒီပါဝလီနေ့တွင် ဒေလီမြို့၌ မီးရှူးမီးပန်းများရောင်းချခြင်းကို တားမြစ်ပိတ်ပင်လိုက်သည်ဟု သိရသည်။
ပြီးခဲ့သည့်နှစ်က ဒီပါဝလီပွဲတော်ကာလတွင် ထောင်နှင့်ချီသောမီးရှူးမီးပန်းများပစ်ဖောက်မှုကြောင့် ဒေလီမြို့တွင် အဆိပ်အတောက်ဖြစ်စေသည့်မြူခိုးများဖုံးလွှမ်းခဲ့ကာ စာသင်ကျောင်းများ၊လျှပ်စစ်ဓာတ်အားပေးစက်ရုံများနှင့် ဆောက် လုပ်ရေးလုပ်ငန်းခွင်များပိတ်ပစ်ခဲ့ရသည်။ကမ္ဘာ့ကျန်းမာရေးအဖွဲ့ကသတ်မှတ်ထားသည့်စံနှုန်းထက် ၂၉ ဆကျော်လေထု ညစ်ညမ်းမှုမြင့်တက်ခဲ့သောကြောင့် ပြီးခဲ့သည့်နိုဝင်ဘာလတွင် တရားရုံးက မီးရှူးမီးပန်းများကိုတားမြစ်ခဲ့သည်။ မီးရှူးမီးပန်းထုတ်လုပ်သူများ၏စိန်ခေါ်မှုကြောင့် တားမြစ်မှုကိုပြန်လည်ပယ်ဖျက်ပေးခဲ့ရသော်လည်း ယခုအခါ နိုင်ငံတော်တရားရုံးချုပ်က မီးရှူးမီးပန်းတားမြစ်မိန့်မှာ ဆက်လက်အသက်ဝင်နေမည်ဖြစ်သည်ဟု ဆိုခဲ့ကြောင်း သိရသည်။
(AP, 10.10.17) 

ထိုင်းနိုင်ငံတွင်း အထွေထွေရွေးကောက်ပွဲကြီးကို ၂၀၁၈ခုနှစ်၊ နိုဝင်ဘာလတွင် ကျင်းပသွားမည်ဟု ထိုင်းဝန်ကြီးချုပ်ပရာယုချန်အိုချာက ထုတ်ဖော်ပြောကြားခဲ့သည်။ ၂၀၁၄ခုနှစ်တွင် ထိုင်းနိုင်ငံတွင်း စစ်အာဏာသိမ်းခဲ့ပြီးသည့်နောက်ပိုင်း အထွေထွေရွေးကောက်ပွဲကျင်းပမည့်နေ့နှင့်ပတ်သက်၍ အနီးစပ်ဆုံးအတိအကျထုတ်ဖော်ကြေညာမှုပင်ဖြစ်သည်။ ကျင်းပမည့်ရက်အတိအကျကို ၂၀၁၈ခုနှစ်၊ ဇွန်လတွင် ထပ်မံကြေညာသွားမည်ဖြစ်ကြောင်း ထိုင်းဝန်ကြီးချုပ်ပရာယုက ပြောကြားခဲ့သည်။ ယခင်က အထွေထွေရွေးကောက်ပွဲကျင်းပမည့်ရက်ကို နှစ်ကြိမ်တိုင်တိုင် ကြေညာထားခဲ့ဖူးသေးသော်လည်း ဖွဲ့စည်းပုံအခြေခံဥပဒေပြောင်းလဲမှုနှင့် လုံခြုံရေးအခြေအနေများကြောင့်ဟု အကြောင်းပြကာ ရက်နောက်ရွှေ့ဆိုင်းခဲ့ခြင်းဖြစ်သည်။ စစ်တပ်အကြီးအကဲဖြစ်ခဲ့ဖူးသူ ပရာယုမှာ ၂၀၁၄ခုနှစ်၊ မေလတွင် စစ်အာဏာသိမ်းမှုပြုလုပ်ခဲ့ပြီးနောက် အနောက်နိုင်ငံများမှ ယင်းလုပ်ရပ်
အတွက် အပြင်းအထန်ဝေဖန်ပြစ်တင်ခဲ့ကြသည်။ ဒီမိုကရေစီပြန်လည်ဖော်ဆောင်ပေးမည့်ရွေးကောက်ပွဲတစ်ခုကိုကတိပြုထားသည့် စစ်တပ်နောက်ခံပြုထားသည့်ဖွဲ့စည်းပုံအခြေခံဥဒေကိုလည်း ပြီးခဲ့သည့်ဧပြီလက ထိုင်းဘုရင်မဟာဝဇီရာလောင်ကွန်က လက်မှတ်ရေးထိုးပေးခဲ့ခြင်းဖြစ်သည်။ ဝန်ကြီးချုပ်ပရာယုအနေဖြင့် ယခုလတွင်ကျင်းပမည့် နတ်ရွာစံဘုရင် ဘူမိဘော၏ လောင်တိုက်တော်သွင်းအခမ်းအနားမှာ ရွေးကောက်ပွဲအတွက် ဖိအားများဖြစ်လာစေပြီး ဆန္ဒပြမှုများဖြစ်လာနိုင်သည်ကို သိမြင်လျက် ယင်းဖိအားများကို ရှောင်လွှဲရန် ယခုကဲ့သို့ ရွေးကောက်ပွဲနေ့ရက်ကြေညာခဲ့ခြင်းဖြစ်ကြောင်း ထိုင်းနိုင်ငံရေးသုံးသပ်သူများက ဆိုနေကြသည်။
(Reuters, 10.10.17) 

More Articles ...