ယူကရိန်းလွှတ်တော်အပြင်ဘက်တွင် ကိုယ်လုံးတီးဆန္ဒပြခဲ့သော အမျိုးသမီးတစ်ဦး ဖမ်းဆီးခံလိုက်ရကြောင်း သိရသည်။ ၎င်းက ယူကရိန်းသမ္မတ ပက်ထရိုပိုရိုရှန်ကိုနှင့် သမ္မတ၏ နိုင်ငံရေးပြိုင်ဘက် မက်ခီလ်ဆာကက်ရှ်ဗီလီတို့ကို မကျေနပ်ကြောင်း စာသားအား ခန္ဓာကိုယ်တွင် ရေးသားထားသည်။ တိုင်းပြည်ကို ထိုလူနှစ်ဦး ဖျက်ဆီးနေသည်ဟု အသက် ၃၆ နှစ်အရွယ် ၎င်းက စွပ်စွဲပြီး နည်းသစ်ဖြင့် တစ်ကိုယ်တော်ဆန္ဒပြခြင်းဖြစ်သည်။ ၎င်းက ၎င်းကိုယ်ပေါ်ရှိ အဝတ်များကို ဆွဲချွတ်လိုက်ပြီး နာမည်ကျော် ရုရှားဆိုရှယ်လစ်ရုပ်တုတစ်ခုကို မူလအတိုင်း ပြန်ထားနိုင်ရန် ကြိုးပမ်းခဲ့သည်။ သို့သော် ၎င်းအဝတ်ချွတ်လိုက်အပြီးတွင်ပင် လုံခြုံရေးများက ရောက်လာပြီး ၎င်းအား တရွတ်တိုက်ဆွဲခေါ်သွားတော့သည်။ ၎င်းကိုကြည့်ကာ လမ်းသွားလမ်းလာများက မပြုံးရမနေနိုင်အောင်ဖြစ်သွားကြသည်။ ပြီးနောက် ၎င်းတို့က ဆန္ဒပြသူကို ကြိုးစားကူညီပေးခဲ့ကြသေးပြီး နောက်ဆုံးတွင်မှ ဆန္ဒပြသူက အဝတ်ကို ပြန်ဝတ်တော့သည်။ ၎င်းကို စစ်ဆေးမေးမြန်းရန် ရဲတပ်ဖွဲ့က ဖမ်းဆီးသွားပြီဖြစ်သည်။

( DM , 9.12.17)

ပါရီတွင် နှစ်သစ်ကူးနေ့၌ တိုက်ခိုက်သွားမည်ဟု အိုင်အက်စ်က ဝါဒဖြန့်ပိုစတာ ထုတ်ကာ ခြိမ်းခြောက်လိုက်သည်။ ပြင်သစ်ရှိလူအုပ်ကြီးပုံကို ပိုစတာတွင်မြင်တွေ့ရပြီး ထိုပုံပေါ်တွင် သွေးသံရဲရဲ ဓားတစ်ချောင်းကို ထပ်ထားသည်။ ''နှစ်သစ်ကူးနေ့မှာ ငရဲတမျှ ပွက်ပွက်ဆူသွားစေရမယ်'' ဟု ယင်းတွင် ရေးသားထားသည့်စာက ဆိုသည်။ လမ်းသွားလမ်းလာများအား အကြမ်းဖက်တိုက်ခိုက်သွားမည်ဟု ဥရောပတစ်လွှားတွင် ခရစ္စမတ်ဈေးများ စပေါ်လာအပြီး မကြာမီတွင် အိုင်အက်စ်က သတိပေးချက် ထုတ်ခဲ့သေးသည်။ ဘာလင်တွင် ပြီးခဲ့သည့်နှစ်က လမ်းသွားလမ်းလာများ ကားဖြင့်တိုက်သတ်ခံရကာ လူ ၁၂ ဦး သေဆုံးသွားခဲ့ပြီး အလားတူဖြစ်ရပ်မျိုး ထပ်မဖြစ်စေရန် လုံခြုံရေးတင်းကျပ်ထားသည်။ ဥရောပရှိမြို့ကြီးများ၊ အမေရိကန်ပြည်ထောင်စုနှင့် ရုရှားတို့တွင် ခရစ္စမတ်ကာလနှင့် နှစ်သစ်ကူးကာလအတွင်း တိုက်ခိုက်နိုင်ရန် စီစဉ်ထားကြောင်း အိုင်အက်စ်က ဆိုသည်။

( DM, 9.12.17)

အမေရိကန်ပြည်ထောင်စု၊ ကယ်လီဖိုးနီးယားပြည်နယ်အနောက်တောင်ပိုင်း ဗန်တူရာမြို့ပတ်ဝန်းကျင်တွင် ဆန်တာအန်နာလေပူများတိုက်ခတ်မှုကြောင့် တောမီးများအပြင်းအထန်လောင်ကျွမ်းလျက်ရှိပြီး ထောင်သောင်းချီသည့်ဒေသခံပြည်သူများ နေအိမ်များကိုစွန့်ခွာထွက်ပြေးနေရကြောင်း သတင်းရရှိသည်။ သောမတ်ဖိုင်းယားဟုအမည်ပေးထားသည့် အဆိုပါတောမီးမှ မီးတောက်များမှာ ဒီဇင်ဘာလ ၄ရက် ညနေပိုင်းအချိန်တွင် ဗန်တူရာအထက်ပိုင်းတောင်ခြေမှ စတင်လောင်ကျွမ်းခဲ့ခြင်းဖြစ်ပြီး လေကြောင့် အနောက်ဘက်သို့ရွေ့လျားလာခဲ့ပြီး လော့စ်အိန်ဂျလိစ်မြို့ဟအနောက်မြောက်ဘက် မိုင်၅ဝအကွာတွင်တည်ရှိသည့် ဗန်တူရာမြို့ထိရောက်ရှိလာခဲ့ကြခြင်းဖြစ်သည်။ ဒီဇင်ဘာလ ၅ရက် ညနေပိုင်းတွင် ဧကပေါင်း ၅၀၀၀၀ကျော်ကို လောင်ကျွမ်းပြာကျစေ ခဲ့ပြီးဖြစ်ကြောင်း ကယ်လီဖိုးနီးယားမီးသတ်တပ်ဖွဲ့က ပြောကြားခဲ့သည်။ ကယ်လီဖိုးနီးယားပြည်နယ်အုပ်ချုပ်ရေးမှူးဂျယ်ရီဘရောင်းက အရေးပေါ်အခြေအနေထုတ်ပြန်ကြေညာထားခဲ့ပြီး နေအိမ်များ မီးတောက်ထဲထပ်မံပါမသွားစေရေးအတွက် မီးသတ်ဝန်ထမ်း အင်အား ၁၀၀၀ကျော်အသုံးပြုနိုင်ရေးအတွက် နိုင်ငံတော်ရန်ပုံငွေထောက်ပံ့ပေးထားကြောင်းသိရသည်။ အန္တရာယ်အလွန်များသည့်မီးဖြစ်ပြီး အမြန်အဆန်ပြန့်နှံ့ရောက်ရှိနေသည့်အတွက် မီးသတ်များဖြင့် အတတ်နိုင်ဆုံးခုခံပေးနေကြောင်း၊ အရေးကြီးသည့် အခြေ အနေဖြစ်လာခဲ့သည့်အတွက် ဒေသခံများကို ချက်ချင်းရွှေ့ပြောင်းရန်ညွှန်ကြားထားခဲ့ကြောင်း ပြည်နယ်အုပ်ချုပ်ရေးမှူးဂျယ်ရီဘရောင်းက ပြောကြားခဲ့သည်။ တောမီးကြောင့် သေဆုံးသူသတင်းမရှိသေးသော်လည်း မီးမှထွက်ပြေးလွတ်မြောက်ရန် ကားဖြင့်ထွက် ပြေးလာသူတစ်ဦးက မီးသတ်နေသည့် မီးသတ်ဝန်ထမ်းတစ်ဦးကို တိုက်မိခဲ့သဖြင့် ကားတိုက်ခံရသည့်မီးသတ်ဝန်ထမ်းကို ဆေးရုံသို့အရေးပေါ်ပို့ဆောင်ကုသပေးလျက်ရှိကြောင်းသိရသည်။ ကယ်လီဖိုးနီးယားတောမီးကြောင့် အိမ်ခြေ ၂၅၀၀၀ဝခန့် လျှပ်စစ်မီးပြတ် တောက်လျက်ရှိပြီး ဗန်တူရာမြို့ရှိစာသင်ကျောင်းများအားလုံးကိုလည်း ပိတ်ထားရကြောင်း သတင်းရရှိသည်။
(Aol, 7.12.17) သံသာ

မြောက်ကိုရီးယားမှ တစ္ဆေလှေများဟု ဆိုနေကြသည့် လူသေအလောင်းများပါလာသော မြောက်ကိုရီးယားလှေများ ဂျပန်နိုင်ငံကမ်းခြေသို့ ထပ်မံဆိုက်ကပ်လာခဲ့ကြောင်း သတင်းများထွက်ပေါ်လာသည်နှင့်တစ်ချိန်တည်းမှာပင် မြောက်ကိုရီးယားခေါင်း ဆောင်ကင်ဂျုံအန်က အာလူးစက်ရုံသို့ သွားရောက်လည်ပတ်နေသည့်ဓာတ်ပုံများနှင့် သတင်းများလည်းထွက်ပေါ်လာခဲ့သည်။ စားနပ်ရိက္ခာပြတ်လပ်မှုများနှင့်ရင်ဆိုင်ကြုံတွေ့ခဲ့ရပြီး အသက်ရှင်သန်နိုင်ဖို့ရာ လှေများဖြင့် ထွက်ပြေးလာရင်း ပင်လယ်ပြင်တွင် သေဆုံးခဲ့ ရသည့် မြောက်ကိုရီးယားပြည်သူများ၏အလောင်းများဖြစ်နိုင်ကြောင်း၊ ပြီးခဲ့သည့် နိုဝင်ဘာလတစ်လအတွင်း၌ပင် လူသေအလောင်းများပါလာသည့် မြောက်ကိုရီးယားလှေ ၂၈စီး ဂျပန်နိုင်ငံသို့ရောက်လာခဲ့ခြင်းဖြစ်ကြောင်း ဂျပန်အာဏာပိုင်များက ထုတ်ဖော်ပြော ကြားခဲ့သည်။ စားနပ်ရိက္ခာပြတ်လပ်မှုကြောင့် ပြည်သူအများအပြားအငတ်ဘေးဆိုက်ကာ ဒုက္ခပင်လယ်ဝေနေချိန်တွင် မြောက်ကိုရီးယားခေါင်းဆောင်ကင်ဂျုံအန်မှာမူ အာလူးစက်ရုံနှင့် အစားအစာစက်ရုံများသို့ လည်ပတ်နေပြီး ပြည်သူများအတွက် လုံလောက်သည့်
အစားအစာများ ပံ့ပိုးပေးနေသည့် စက်ရုံများဖြစ်ကြောင်း မြောက်ကိုရီးယားသတင်းတွင် ကြေညာထားခဲ့ခြင်းဖြစ်သည်။ အပြောနှင့်လက်တွေ့ အလွန်ခြားနားလွန်းလှသည့်မြောက်ကိုရီးယားနိုင်ငံတွင်း ပြည်သူများအငတ်ဘေးဆိုက်နေရသည့် ဖြစ်ရပ်ကို လှည့်ဖျားရန် ဝါဒဖြန့်သတင်းသာဖြစ်ပြီး စီးပွားရေးပိတ်ဆို့ပြစ်ဒဏ်ခတ်မှုများအကြား ပြည်သူများပြေလည်ဖူလုံရေးထက် နျူကလီးယားလက်နက်ထုတ်လုပ်ရေးကိုသာ ဦးစားပေးနေသည့်အတွက် မြောက်ကိုရီးယားလူသေအလောင်းပါတစ္ဆေလှေများ ဂျပန်ကမ်းခြေသို့ ထပ်မံဆိုက် ကပ်လာနေရခြင်းကသာ ဖြစ်ရပ်မှန်ဖြစ်ကြောင်း ဆိုးလ်တက္ကသိုလ် မြောက်ကိုရီးယားအရေးလေ့လာရေးဌာနပါမောက္ခ ယန်မူဂျင်က ပြောကြားခဲ့သည်။
(DM, 7.12.17) သံသာ

ဂျေရုစလင်ကို အစ္စရေး၏မြို့တော်အဖြစ်အသိအမှတ်ပြုလိုက်သည့် အမေရိကန်သမ္မတဒေါ်နယ်လ်ထရမ့်၏ဆုံး ဖြတ်ချက်ကိုဝေဖန်သူများတွင် အမေရိကန်၏မဟာမိတ်များပင်ပါဝင်နေသည်ဟု သိရသည်။
ဆော်ဒီအာရေဗျက တရားမျှတမှုမရှိဘဲ တာဝန်မဲ့ရာကျသည့်လုပ်ရပ်ဖြစ်သည်ဟုဆိုခဲ့ပြီး ပြင်သစ်နှင့်ဗြိတိန်က လည်း ဆုံးဖြတ်ချက်ကိုမထောက်ခံကြောင်း ဆိုထားသည်။သို့သော် အစ္စရေးဝန်ကြီးချုပ်ဘင်ဂျမင်နေတင်ယာဟုက သမိုင်း ဝင်သည့်နေ့အဖြစ် ဟစ်ကြွေးခဲ့သည်။ဒေါ်နယ်လ်ထရမ့်၏လုပ်ရပ်သည် ဆယ်စုနှစ်များစွာကျင့်သုံးခဲ့သောအမေရိကန်၏ မူဝါဒကို ပြောင်းပြန်လှန်လိုက်ခြင်းဖြစ်သည်။ဂျေရုစလင်၏ကံကြမ္မာသည် အစ္စရေးနှင့်ပါလက်စတိုင်းကြားမှ အကဲဆတ် သည့်ပြဿနာတစ်ခုဖြစ်သည်။ပါလက်စတိုင်းသမ္မတမာမွတ်အာဘတ်စ်က ထရမ့်၏လုပ်ရပ်သည် စိတ်ပျက်စရာဖြစ်သည် ဟု ဆိုခဲ့သည်။ကုလသမဂ္ဂလုံခြုံရေးကောင်စီက အဆိုပါကိစ္စကို ဒီဇင်ဘာလ ၈ ရက်တွင် ဆွေးနွေးသွားရန်ရှိနေပြီး ဒီဇင်ဘာ လ ၉ ရက်တွင် အာရပ်နိုင်ငံများလည်း တွေ့ဆုံရန်ရှိနေသည်။ထရမ့်က ၎င်း၏လုပ်ရပ်သည် အမေရိကန်၏အကျိုးစီးပွားအ တွက် အကောင်းဆုံးဖြစ်ပြီး အစ္စရေးနှင့်ပါလက်စတိုင်းကြား ငြိမ်းချမ်းရေးဖော်ဆောင်နိုင်ရန်ဖြစ်သည်ဟု ဆိုသည်။ထရမ့်က အမေရိကန်သံရုံးအား တယ်လ်အာဗစ်မြို့မှ ဂျေရုစလင်သို့ရွှေ့ပြောင်းရန်ပြင်ဆင်ရေးအတွက် အမိန့်ပေးထားပြီဖြစ်သည်။ အာရပ်နှင့်မွတ်စလင်နိုင်ငံများက ထရမ့်၏ကြေညာချက်ကိုရှုတ်ချခဲ့ပြီး တူရကီနိုင်ငံ အီစတန်ဘူးလ်မြို့ရှိ အမေရိကန်ကောင် စစ်ဝန်ရုံးအပြင်ဘက်တွင်လည်း ဆန္ဒပြပွဲများပြုလုပ်ခဲ့ကြသည်။မလေးရှားဝန်ကြီးချုပ်နာဂျစ်ရာဇက်ကလည်း နေရာတိုင်းမှ မွတ်စလင်အားလုံးအား ထရမ့်၏လုပ်ရပ်ကိုဆန့်ကျင်ကြရန် တိုက်တွန်းထားသည်ဟု သိရသည်။
(BBC,7.12.17) မေဇွန်

More Articles ...